നാക്ക് പിഴച്ചു; കെസി അബു വീണ്ടും വിവാദത്തില്
കോഴിക്കോട്: വാഗ്വിലാസത്തിനു പേരുകേട്ട ഡിസിസി പ്രസിഡന്റ് കെസി അബു വീണ്ടും പെട്ടു. ബേപ്പൂര് നിയോജകമണ്ഡലം യുഡിഎഫ് സ്ഥാനാര്ഥി ആദം മുല്സിയുടെ പ്രചാരണ യോഗത്തിലാണ് വീണ്ടും അബു വാര്ത്തയായിരിക്കുന്നത്. ഒരു മുസ്ലിം നേതാവിന്റെ പേരിലായിരുന്നു അബു കത്തിക്കയറിയത്. വിഷയം ഇപ്പോള് യുവമോര്ച്ച ഏറ്റെടുത്തിരിക്കുകയാണ്.
ബേപ്പൂരിലെ എല്ഡിഎഫ് സ്ഥാനാര്ഥി വികെസി മമ്മദ് കോയയെ തോല്പ്പിക്കണമെന്ന് ഒരു മുസ്ലിം നേതാവ് പറഞ്ഞുവെന്നായിരുന്നു അബു പ്രസംഗത്തില് പറഞ്ഞത്. കോഴിക്കോട് മേയറാണ് വികെസി. അദ്ദേഹം ബേപ്പൂരില് തോറ്റാല് കോഴിക്കോട് മേയറായി അദ്ദേഹം തന്നെ തുടരും. അങ്ങനെ വന്നാല് കോഴിക്കോട് മേയറും ബേപ്പൂര് എംഎല്എയും മുസ്ലിമായിരിക്കും എന്ന് അയാള് പറഞ്ഞുവെന്നുമാണ് അബു പറഞ്ഞത്.
കോഴിക്കോട് മേയര് മുസ്ലിമാണെന്നു സിപിഎം ആവര്ത്തിച്ചു പ്രചരിപ്പിച്ചതുകൊണ്ടാണ് ആളുകള് ഇങ്ങനെ ചിന്തിക്കുന്നതെന്നും കെ.സി അബു കൂട്ടിച്ചേര്ത്തു. മുഖ്യമന്ത്രി ഉമ്മന്ചാണ്ടിയുടെ സാന്നിധ്യത്തിലായിരുന്നു ഡിസിസി പ്രസിഡന്റിന്റെ പ്രസംഗം.
സംഭവം ഏതായാലും യുവമോര്ച്ച സംസ്ഥാന കമ്മിറ്റി ഏറ്റെടുത്തു. തെരഞ്ഞെടുപ്പു കമ്മിഷനും പൊലീസിനും പരാതി നല്കാനുള്ള ഒരുക്കത്തിലാണ് യുവമോര്ച്ച. മുന്പ് നിയമസഭയില് ഇ.എസ് ബിജിമോളും മന്ത്രി ഷിബു ബേബിജോണും തമ്മില് നടന്ന സംഭവങ്ങളെ കളിയാക്കിയും കെസി അബു കുടുങ്ങിയിരുന്നു.