കോഴിക്കോട് പഞ്ചായത്തംഗത്തെ പെട്രോളൊഴിച്ച് തീ കൊളുത്താൻ ശ്രമം; സംഭവം വേളം പഞ്ചായത്ത് ഓഫീസിൽ!

കോഴിക്കോട്: പഞ്ചായത്ത് അംഗത്തിന് ഭീഷണി. കുറ്റ്യാടി വേളം പഞ്ചായത്ത് ഓഫീസിലാണ് സംഭവം. ലൈഫ് ഭവന പദ്ധതിയിൽ വീട് നിഷേധിച്ചു എന്നാരോപിച്ച് വാർഡ് മെമ്പറുടെ മേല്‍ പെട്രൊളൊഴിച്ച് ഗുണഭോക്താവ് ഭീഷണിപ്പെടുത്തുകയായിരുന്നു. ഗ്രാമപഞ്ചായത്തംഗം ലീലയെ ചേർത്തുനിർത്തി ബാലൻ എന്നയാളാണ് തീ കൊളുത്തുമെന്ന് ഭീഷണി മുഴക്കിയത്. കോണ്‍ഗ്രസിന്‍റെ പഞ്ചായത്തംഗമാണ് ലീല.

ഭീഷണിപ്പെടുത്തിയ ബാലൻ സിപിഎം അനുഭാവിയാണെന്നാണ് റിപ്പോർട്ട്. പഞ്ചായത്ത് ഓഫീസിലെത്തിയ ബാലന്‍ കൈവശമുണ്ടായിരുന്ന രണ്ടു കുപ്പി പെട്രോള്‍ തന്‍റെയും ലീലയുടേയും ശരീരത്തിലേക്ക് ഒഴിക്കുകയായിരുന്നു. തുടർന്ന് തീ കൊളുത്തുമെന്ന് ഭീഷണിപ്പെടുത്തി. ഓടിയെത്തിയ നാട്ടുകാര്‍ ചേര്‍ന്ന് ബലംപ്രയോഗിച്ച് ഇയാളെ പിടിച്ചുമാറ്റുകയായിരുന്നു.

ബാലനെ നാട്ടുകാർ പോലീസിനു കൈമാറി. ഇയാള്‍ക്കെതിരെ വധശ്രമത്തിന് കേസെടുത്തു. പഞ്ചായത്ത് മെമ്പർ ലീലയെ ആശുപത്രിയില്‍ പ്രവേശിപ്പിച്ചിരിക്കുകയാണ്. ലൈഫ് ഭവന പദ്ധതിയിലുള്‍പ്പെടുത്തി ബാലന്‍റെ ഭാര്യക്ക് നേരത്തെ വീട് നല്‍കിയിട്ടുണ്ട് എന്നാണ് പഞ്ചായത്തിന്റെ വിശദീകരണം. എന്നാല്‍, താന്‍ വേറെ അപേക്ഷ നല്‍കിയിട്ടുണ്ടെന്നും പട്ടികയില്‍ പേരുണ്ടെന്നുമാണ് ബാലന്‍ പറയുന്നത്.

English summary

Attempt to set fire to Panchayat member in Kozhikode