ഗോപാലകൃഷ്ണന്റെ വര്ഗീയ പരാമര്ശം; എന്ത് നടപടിയെടുത്തു? തിരഞ്ഞെടുപ്പ് കമ്മീഷനോട് ഹൈക്കോടതി
കൊച്ചി: ബിജെപി നേതാവും ഗുരുവായൂരിലെ എന് ഡി എ സ്ഥാനാര്ഥിയുമായ ബി ഗോപാലകൃഷ്ണന്റെ വര്ഗീയ പരാമര്ശത്തില് തിരഞ്ഞെടുപ്പ് കമ്മീഷനെ രൂക്ഷമായി വിമര്ശിച്ച് ഹൈക്കോടതി. തിരഞ്ഞെടുപ്പ് പ്രഖ്യാപിച്ചിരിക്കുന്ന സംസ്ഥാനത്ത് മാതൃകാ പെരുമാറ്റച്ചട്ടം നിലനില്ക്കെ തിരഞ്ഞെടുപ്പ് കമ്മീഷന് എന്ത് നടപടിയെടുത്തു എന്ന് ഹൈക്കോടതി ആരാഞ്ഞു. രണ്ട് മാസത്തിനകം ഉചിതമായ നടപടി സ്വീകരിക്കണം എന്നും കോടതി നിര്ദേശിച്ചു.
മാതൃക പെരുമാറ്റച്ചട്ടം എന്തിനാണ് എന്ന് കോടതി ചോദിച്ചു. അതേസമയം വിദ്വേഷ പരാമര്ശത്തില് ഇതിനോടകം തന്നെ നടപടികള് ആരംഭിച്ചതായി തിരഞ്ഞെടുപ്പ് കമ്മീഷന് കോടതിയെ അറിയിച്ചു. വിവാദമായ വീഡിയോ സമൂഹമാധ്യമങ്ങളില് നിന്ന് നീക്കം ചെയ്തു. പരാമര്ശത്തിന്റെ ഗൗരവം കണക്കിലെടുത്ത് നിയമപരമായ തുടര്നടപടികള് സ്വീകരിക്കുമെന്നും തിരഞ്ഞെടുപ്പ് കമ്മീഷന് പറഞ്ഞു.
കെ എസ് യു ജില്ലാ പ്രസിഡണ്ട് ഗോകുല് ആണ് ഗോപാലകൃഷ്ണന്റെ വിദ്വേഷ പരാമര്ശത്തിന് എതിരെ ഹര്ജി നല്കിയത്. 48 ശതമാനം ഹൈന്ദവ ജനസംഖ്യയുള്ള ഗുരുവായൂരില് കഴിഞ്ഞ 50 വര്ഷമായി ഒരു ഹിന്ദു എം എല് എ ഇല്ലെന്നും ഇടത്-വലത് പക്ഷങ്ങള് ഹിന്ദു വിഭാഗങ്ങളില് നിന്നുള്ളവരെ സ്ഥാനാര്ത്ഥിയായി പരിഗണിക്കുന്നില്ല എന്നുമായിരുന്നു ഗോപാലകൃഷ്ണന്റെ പരാമര്ശം.
ഇത് വലിയ വിവാദമായിരുന്നു. ഹൈക്കോടതിയും ഇതിനെതിരെ രൂക്ഷമായ പ്രതികരണമാണ് നടത്തിയത്. വോട്ടര്മാര്ക്കിടയില് വിദ്വേഷം പടര്ത്തുന്ന രീതിയിലുള്ള പ്രസംഗങ്ങള്ക്കെതിരെ കര്ശന നിലപാട് സ്വീകരിക്കണം എന്ന് കോടതിവ പറഞ്ഞു. രാജ്യത്തിനും സമൂഹത്തിനും സംഭവിച്ച ആഘാതം എങ്ങനെ മറികടക്കുമെന്നും അതിന് തിരഞ്ഞെടുപ്പ് കമ്മീഷന് എന്ത് ചെയ്തുവെന്നും ഹൈക്കോടതി ചോദിച്ചു.
സംഭവത്തില് രത്തന് യു ഖേല്ക്കര് ജില്ലാ കളക്ടറോട് റിപ്പോര്ട്ട് തേടിയിരുന്നു. അതിനിടെ ഗുരുവായൂര് മണ്ഡലം ഭരണാധികാരി ഷീബ എസ് നല്കിയ പരാതിയില് ഗോപാലകൃഷ്ണനെതിരെ എഫ്ഐആര് രജിസ്റ്റര് ചെയ്തിട്ടുണ്ട്. കേരള പീപ്പിള്സ് റെപ്രസന്റേഷന് ആക്ട് 125, ബിഎന്എസ് 192 എന്നീ വകുപ്പുകള് പ്രകാരമാണ് കേസ് രജിസ്റ്റര് ചെയ്തിരിക്കുന്നത്. ജനപ്രാതിനിധ്യ നിയമം അനുസരിച്ച് മൂന്ന് വര്ഷം വരെ തടവുശിക്ഷ ലഭിക്കാവുന്ന കുറ്റമാണ് ഇത്.
അന്തര്ദേശീയ തീര്ത്ഥാടന കേന്ദ്രമായ ഗുരുവായൂരില് എന്തുകൊണ്ട് ഹിന്ദു എംഎല്എ ഉണ്ടായില്ല എന്നായിരുന്നു ഗോപാലകൃഷ്ണന് ചോദിച്ചത്. കൊടുങ്ങല്ലൂരമ്മയുടെ നടയില് നിന്ന് ഗുരുവായൂപ്പന്റെ നടയിലേക്കുള്ള തന്റെ വരവ് ഗുരുവായൂരപ്പന് വിളിച്ചിട്ടാണ് എന്നും കഴിഞ്ഞ അരനൂറ്റാണ്ടായി അമ്പലക്കൊള്ളക്കാരുടെ തടവറയിലായ ഗുരുവായൂരിന്റെ മണ്ണിനെ മോചിപ്പിക്കാനാണ് താന് വന്നിരിക്കുന്നത് എന്നുമായിരുന്നു അദ്ദേഹം പറഞ്ഞത്.
Click it and Unblock the Notifications
Sign in with Google