എന്നെ അറസ്റ്റ് ചെയ്യാൻ ആർക്കും സാധിക്കില്ല; വെല്ലുവിളിയുമായി ബാബാ രാംദേവ്

അധികൃതരെയും ഭരണ സംവിധാനങ്ങളെയും വെല്ലുവിളിക്കുന്ന ഈ പ്രസ്താവനയ്ക്കെതിരെയും പ്രതിഷേധം ശക്തമായിട്ടുണ്ട്

ന്യൂഡൽഹി: അലോപ്പതിക്കെതിരെയും ഡോക്ടർമാർക്കെതിരെയും നടത്തിയ വിവിധ പരാമർശത്തിൽ ബാബാ രാംദേവിനെതിരെ വലിയ പ്രതിഷേധമാണ് സമൂഹിക മാധ്യമങ്ങളിലടക്കം നടക്കുന്നത്. ഇതിനിടയിലാണ് തന്നെ ആർക്കും അറസ്റ്റ് ചെയ്യാൻ കഴിയില്ല എന്ന് ബാബാ രാംദേവ് പറയുന്ന വീഡിയോയും ഇന്നലെ മുതൽ സമൂഹമാധ്യമങ്ങളിൽ പ്രചരിക്കുന്നത്. അധികൃതരെയും ഭരണ സംവിധാനങ്ങളെയും വെല്ലുവിളിക്കുന്ന ഈ പ്രസ്താവനയ്ക്കെതിരെയും പ്രതിഷേധം ശക്തമായിട്ടുണ്ട്.

"ആർക്കും..., ഒരാളുടെയും അച്ഛനുപോലും സ്വാമി ബാബാ രാംദേവിനെ അറസ്റ്റ് ചെയ്യാൻ കഴിയില്ല. പക്ഷെ അവർ ശബ്ദമുണ്ടാക്കുന്നു...രാംദേവിനെ അറസ്റ്റ് ചെയ്യൂ അറസ്റ്റ് ചെയ്യൂ എന്ന് പറഞ്ഞ്. അവർ ട്രെൻഡുകൾ പിന്തുടരുകയാണ്... അവരെ അനുവദിക്കുക," ബാബാ രാംദേവിന്റെതായി സമൂഹ മാധ്യമങ്ങളിൽ പ്രചരിക്കുന്ന ഓഡിയോയിൽ പറയുന്നു.

അതേസമയം ബാബാ രാംദേവിനെതിരെ നടപടി ആവശ്യപ്പെട്ട് ഇന്ത്യൻ മെഡിക്കൽ അസോസിയേഷൻ പ്രധാനമന്ത്രി നരേന്ദ്ര മോദിക്ക് കത്തയച്ചിരുന്നു. കോവിഡ് -19 രോഗത്തിനെതിരായ അലോപ്പതി മരുന്നുകളുടെയും വാക്സിനുകളുടെയും ഫലപ്രാപ്തിയെ ചോദ്യം ചെയ്ത ബാബാ രാംദേവിനെതിരെ രാജ്യദ്രോഹ നിയമപ്രകാരം അറസ്റ്റ് ചെയ്യണമെന്നാണ് ഐഎംഎയുടെ ആവശ്യം. രാംദേവിനെതിരെ മാനനഷ്ട നോട്ടീസും ഐഎംഎ അയച്ച ഉത്തരാഖണ്ഡ് ഘടകം അയച്ചിട്ടുണ്ട്.

ഇന്ത്യൻ മെഡിക്കൽ അസോസിയേഷന്റെ ഉത്തരാഖണ്ഡ് ഘടകം സെക്രട്ടറി അജയ് ഖന്നയ്ക്കുവേണ്ടി അദ്ദേഹത്തിന്റെ വക്കീൽ നീരജ് പാണ്ഡെ അയച്ചിരിക്കുന്ന ആറ് പേജ് നോട്ടീസിൽ രണ്ടായിരത്തോളം വരുന്ന അലോപ്പതി ഡോക്ടർമാരെ അപമാനിച്ചുവെന്നും അലോപ്പതിയെ തെറ്റായി ചിത്രീകരിച്ചുമെന്നുമാണ് ആരോപണം. പ്രസ്താവന പിന്‍വലിക്കുന്നതായി 15 ദിവസത്തിനുള്ളില്‍ വിഡിയോ പോസ്റ്റ് ചെയ്യുകയും രേഖാമൂലം ഖേദപ്രകടനം നടത്തുകയും ചെയ്യണമെന്നും നോട്ടീസിൽ ആവശ്യപ്പെടുന്നു.

English summary

Baba Ramdev dares that no one can arrest him on controversial statement