കോഴിക്കോട് മാത്രമല്ല; നെടുമ്പാശ്ശേരിയില്‍ സിനിമാ നടന്റെ ബാഗേജ് കുത്തിത്തുറന്ന് മോഷണം

കൊച്ചി: കോഴിക്കോട് വിമാനത്താവളത്തിനു പിന്നാലെ നെടുമ്പാശ്ശേരി അന്താരാഷ്ട്ര വിമാനത്താവളത്തിലും ബാഗേജ് മോഷണം. തന്റെ ബാഗില്‍ നിന്നും വിലപിടിപ്പുള്ള വാച്ചുകള്‍ ഉള്‍പ്പെടെ നഷ്ടപ്പെട്ടെന്ന പരാതിയുമായി ഷാര്‍ജയില്‍ നിന്നെത്തിയ നൗഷാദ് പരാതി നല്‍കി. ബാഗ് കുത്തിത്തുറന്ന ദൃശ്യങ്ങള്‍ നൗഷാദ് സോഷ്യല്‍ മീഡിയയില്‍ പോസ്റ്റ് ചെയ്യുകയും ചെയ്തു.

ചൊവ്വാഴ്ച പുലര്‍ച്ചെ എയര്‍ അറേബ്യ വിമാനത്തിലാണ് നൗഷാദ് നെടുമ്പാശ്ശേരിയില്‍ ഇറങ്ങിയത്. രണ്ട് ലഗേജുകളാണ് ഉണ്ടായിരുന്നത്. ഒന്ന് ആദ്യം വന്നെങ്കിലും രണ്ടാമത്തെ ബാഗ് വരാന്‍ 20 മിനിറ്റോളം താമസിച്ചു. പിന്നീട് എയര്‍ അറേബ്യ സ്റ്റാഫാണ് പൊട്ടിച്ച നിലയില്‍ ബാഗ് ഒരു ട്രോളിയില്‍ കൊണ്ടുവന്നതെന്ന് നൗഷാദ് പറയുന്നു.

പരിശോധിച്ചപ്പോള്‍ 3500 ദിര്‍ഹം വിലയുള്ളത് ഉള്‍പ്പെടെ മൂന്ന് വാച്ചുകളും ക്രീമുകളും ഷാമ്പൂവും ചോക്ലേറ്റുമെല്ലാം പോയിട്ടുണ്ടെന്ന് മനസിലായി. അതേസമയം, സാധനങ്ങള്‍ നഷ്ടമായത് നെടുമ്പാശ്ശേരിയില്‍ വെച്ചാണോ അതോ ഷാര്‍ജ വിമാനത്താവളത്തില്‍ വച്ചാണോ എന്ന് തനിയ്ക്കറിയില്ലെന്നും നൗഷാദ് പറഞ്ഞു.

ബാഗില്‍ നിന്ന് സാധനങ്ങള്‍ നഷ്ടപ്പെട്ട കാര്യ എയര്‍ അറേബ്യ സ്റ്റാഫും സ്ഥിരീകരിച്ചു. സാധനങ്ങള്‍ നഷ്ടമായെന്ന് ബോധ്യപ്പെട്ടാല്‍ നഷ്ടപരിഹാരം നല്‍കാന്‍ തയാറാണെന്ന് എയര്‍ അറേബ്യ അറിയിച്ചതായി സിയാല്‍ പിആര്‍ഒ വ്യക്തമാക്കി. ഒട്ടേറെ സീരിയലുകളിലും സിനിമകളിലും വേഷമിട്ടിട്ടുണ്ട് ചാവക്കാട് സ്വദേശിയായ നൗഷാദ്. എയര്‍പോര്‍ട്ടില്‍ എത്തിയ സുഹൃത്തും ചലച്ചിത്ര സംവിധായകനുമായ പ്രശാന്ത് മാമ്പുള്ളിയാണ് വീഡിയോ എടുത്ത് പുറത്തുവിട്ടത്.

English summary

കോഴിക്കോട് മാത്രമല്ല; നെടുമ്പാശ്ശേരിയിലും ബാഗേജ് മോഷണം