കോണ്‍ഗ്രസിന്റെ ചതി വിരേന്ദ്രകുമാര്‍ മനസ്സിലാക്കിയില്ലെന്ന് ബാലകൃഷ്ണപിള്ള

തിരുവനന്തപുരം: തന്റെ ഉപദേശം കേല്‍ക്കാതെ പോയതുകൊണ്ടാണ് എം.പി വിരേന്ദ്രകുമാര്‍ ലോക്‌സഭാ തിരഞ്ഞെടുപ്പില്‍ പാലക്കാട് മത്സരിച്ച് എട്ടു നിലയില്‍ പൊട്ടിയതെന്ന് കേരളാ കോണ്‍ഗ്രസ് ബി ചെയര്‍മാന്‍ ആര്‍.ബാലകൃഷ്ണപ്പിള്ള. പാലക്കാട് മത്സരിക്കരുതെന്ന് താന്‍ വീരേന്ദ്രകുമാറിന് മുന്നറിയിപ്പ് നല്‍കിയിരുന്നു. കോണ്‍ഗ്രസിന്റെ ചതി മനസ്സിലാക്കാന്‍ വീരേന്ദ്രകുമാറിന് കഴിഞ്ഞില്ലെന്നും അദ്ദേഹം പറഞ്ഞു.

വീരേന്ദ്ര കുമാറിന്റെ തോല്‍വിയെ കുറിച്ച് പഠിക്കാന്‍ യുഡിഎഫ് നിയോഗിച്ച ഉപസമിതിയുടെ അദ്ധ്യക്ഷനാണ് ബാലകൃഷ്ണപ്പിള്ള. കോണ്‍ഗ്രസ് വിരേന്ദ്രകുമാറിനെ ചതിക്കുകയായിരുന്നു. ചതിച്ചവരുടെ പൂര്‍ണവിവരങ്ങള്‍ തന്റെ കൈയ്യിലുണ്ടെന്നും ബാലകൃഷ്ണപിള്ള വ്യക്തമാക്കി.

ചതിച്ചവരുടെ വിവരങ്ങളെല്ലാം ഉള്‍പ്പെടുത്തി യുഡിഎഫിന് റിപ്പോര്‍ട്ട് നല്‍കും. കോണ്‍ഗ്രസ് എന്തെല്ലാം വാഗ്ദാനങ്ങള്‍ നല്‍കിയാലും തന്റെ മകനെ ഇനി ഉമ്മന്‍ചാണ്ടി സര്‍ക്കാരിലേക്ക് വിടില്ലെന്നും ബാലകൃഷ്മപിള്ള പറഞ്ഞു. താനും ഗണേഷും ബിജെപിയിലേക്കു പോകും എന്ന വാര്‍ത്ത അടിസ്ഥാനരഹിതമാണ്. അതൊരിക്കലും ഉണ്ടാകില്ല, ബിജെപിയോട് ഒരു വിരോധവും ഉണ്ടായിട്ടല്ല ഇതെന്നും അദ്ദേഹം പറഞ്ഞു.

കോണ്‍ഗ്രസ് അഴിമതിയില്‍ മുങ്ങി കുളിച്ചിരിക്കുകയാണ്. ആരോപണങ്ങള്‍ എഴുതി നല്‍കിയിട്ടൊന്നും ഒരു കാര്യവും ഇല്ല. അഴിമതികള്‍ ഇനിയും കണ്ടാല്‍ ഉറക്കെ വിളിച്ചു പറയുമെന്നും അദ്ദേഹം പറഞ്ഞു. കോണ്‍ഗ്രസ് രക്ഷപ്പെടണമെങ്കില്‍ രാഹുല്‍ ഗാന്ധി പുറത്തുപോകണമെന്നും ബാലകൃഷ്ണപിള്ള വ്യക്തമാക്കി.

English summary

Balakrishna pillai says udf cheated Veerendra kumar, he had advised Veerendra Kumar not to contest the election from Palakkad.