വിഷു ആഘോഷിക്കാൻ പണം കിട്ടാതെ വരുമോ? ബാങ്കുകൾ 2 ദിവസം അവധി..വിശദമായി അറിയാം

ഏപ്രിൽ 14-ന് ഡോ ബിആർ അംബേദ്കർ ജയന്തി പ്രമാണിച്ച് രാജ്യത്തെ മിക്ക നഗരങ്ങളിലും ബാങ്കുകൾക്ക് അവധിയായിരിക്കും. റിസർവ് ബാങ്കിന്റെ നെഗോഷ്യബിൾ ഇൻസ്ട്രുമെന്റ്സ് ആക്റ്റ് കലണ്ടർ പ്രകാരം ഈ ദിവസം പൊതു അവധിയായി പ്രഖ്യാപിച്ചിട്ടുണ്ടെങ്കിലും തിരഞ്ഞെടുക്കപ്പെട്ട ചിലയിടങ്ങളിൽ ബാങ്കിംഗ് പ്രവർത്തനങ്ങൾ സാധാരണപോലെ തുടരും.

അംബേദ്കറുടെ ജന്മവാർഷികമാണ് അംബേദ്കർ ജയന്തിയായി ആഘോഷിക്കുന്നത്. ഈ ദിവസം തന്നെയാണ് മഹാ വിഷുബ സംക്രാന്തി, ബിജു, ബുയിസു ഉത്സവം, തമിഴ് പുതുവർഷം, ബോഹാഗ് ബിഹു, ചൈരോബ, ബൈശാഖി തുടങ്ങിയ പ്രാദേശിക ഉത്സവങ്ങളും ആഘോഷിക്കപ്പെടുന്നത്. ഈ പൊതു അവധിയോട് അനുബന്ധിച്ച് വിവിധ സംസ്ഥാനങ്ങളിലെ സർക്കാർ ഓഫീസുകൾ, പൊതുമേഖലാ സ്ഥാപനങ്ങൾ, കോടതികൾ, സർക്കാർ സ്കൂളുകൾ, കോളേജുകൾ എന്നിവയെല്ലാം അടഞ്ഞുകിടക്കും. നാഷണൽ സ്റ്റോക്ക് എക്സ്ചേഞ്ച് (എൻഎസ്ഇ), ബോംബെ സ്റ്റോക്ക് എക്സ്ചേഞ്ച് (ബിഎസ്ഇ) എന്നിവയുൾപ്പെടെയുള്ള പ്രധാന ഓഹരി വിപണികളിലും അന്നേദിവസം വ്യാപാരം ഉണ്ടാകില്ല.

അഗർത്തല, അഹമ്മദാബാദ്, ബേലാപ്പൂർ, ബെംഗളൂരു, ഭുവനേശ്വർ, ചണ്ഡീഗഡ്, ചെന്നൈ, ഡെറാഡൂൺ, ഗാങ്‌ടോക്ക്, ഗുവാഹത്തി, ഹൈദരാബാദ്, ഇംഫാൽ, ജയ്പൂർ, ജമ്മു, കാൺപൂർ, കൊച്ചി, കൊൽക്കത്ത, ലഖ്‌നോ, മുംബൈ, നാഗ്പൂർ, പനാജി, പട്ന, റാഞ്ചി, ശ്രീനഗർ, തിരുവനന്തപുരം, വിജയവാഡ തുടങ്ങിയ നഗരങ്ങളിലെ എല്ലാ ബാങ്ക് ശാഖകൾക്കും അവധിയായിരിക്കും.

അതേസമയം, റിസർവ് ബാങ്കിന്റെ അവധി കലണ്ടർ അനുസരിച്ച്, ഐസ്വാൾ, ഭോപ്പാൽ, ഇറ്റാനഗർ, കോഹിമ, ന്യൂഡൽഹി, റായ്പൂർ, ഷില്ലോങ്, ഷിംല എന്നിവിടങ്ങളിലെ ബാങ്ക് ശാഖകൾക്ക് അവധിയുണ്ടായിരിക്കില്ല. ഈ നഗരങ്ങളിൽ ബാങ്കിംഗ് ഇടപാടുകൾ പതിവുപോലെ നടക്കും.

മിക്കയിടങ്ങളിലും ബാങ്ക് ശാഖകൾ അടഞ്ഞുകിടക്കുമെങ്കിലും, ഡിജിറ്റൽ ബാങ്കിംഗ് സേവനങ്ങൾ തടസ്സമില്ലാതെ ലഭ്യമാകും. ഉപഭോക്താക്കൾക്ക് ഇന്റർനെറ്റ് ബാങ്കിംഗ്, മൊബൈൽ ബാങ്കിംഗ്, എസ്എംഎസ് ബാങ്കിംഗ്, വാട്ട്‌സ്ആപ്പ് ബാങ്കിംഗ് പ്ലാറ്റ്‌ഫോമുകൾ വഴി ഇടപാടുകൾ നടത്താം. എടിഎം സേവനങ്ങൾ, പണം പിൻവലിക്കൽ, യുപിഐ പേയ്‌മെന്റുകൾ, ഓൺലൈൻ ഫണ്ട് കൈമാറ്റങ്ങൾ എന്നിവയും ഈ ദിവസവും ലഭ്യമായിരിക്കും.

കേരളത്തിൽ രണ്ട് ദിവസം അവധി

ഏപ്രിൽ 15 ന് വിഷു ആയതിനാൽ അടുത്ത രണ്ട് ദിവസം കേരളത്തിൽ ബാങ്കുകൾ അവധിയായിരിക്കും. പക്ഷെ ഡിജിറ്റൽ ബാങ്കിംഗ് പ്രവർത്തനങ്ങൾ സാധാരണ രീതിയിൽ നടക്കും.