ശബരിമലയില് ഇനി കുപ്പി വെള്ളം കിട്ടില്ല
കൊച്ചി: ശബരിമലയില് ഇനി കുപ്പിവെള്ളം കാണില്ല. കുപ്പിവെള്ളം നിരോധിച്ചുകൊണ്ട് ഹൈക്കോടതി പുറപ്പെടുവിച്ച വിധിയെതുടര്ന്നാണിത്. ജസ്റ്റിസ് തോട്ടത്തില് ബി രാധാകൃഷ്ണന്, ജസ്റ്റിസ് അനു ശിവരാമന് എന്നിവരടങ്ങിയ ബെഞ്ചാണ് നിരോധനം ഏര്പ്പെടുത്തിക്കൊണ്ട് ഉത്തരവിട്ടത്.
നേരത്തെ ശബരിമലയില് പ്ലാസ്റ്റിക് നിരോധനവും നടപ്പിലാക്കിയിരുന്നു. ശബരിമലയിലെ പരിസ്ഥിതിക്ക് പ്ലാസ്റ്റിക് കുപ്പികളില് നിറച്ച വെള്ളം വില്ക്കുന്നത് ദോഷം ചെയ്യുമെന്നും അതിനാല് ശബരിമലയില് നിരോധനം ഏര്പ്പെടുത്തുകയാണെന്നുമായിരുന്നു വിധി.
നിലയ്ക്കല്, ശബരിമല, പമ്പ എന്നിവിടങ്ങളില് കുപ്പിവെള്ളം നിവല്ക്കുന്നത് നിരോധിച്ചിതായും മാസപൂജ, മകരവിളക്ക് തുടങ്ങി ഭക്തര് ഏറ്റവും കൂടുതല് എത്തുന്ന സമയത്തും നിരോധനം ബാധകമാണെന്നും കോടതി ഉത്തരവില് പറയുന്നു.
എന്നാല് ശബരിമലയില് കുടിവെള്ളം ലഭ്യമാക്കാന് ദേവസ്വം ബോര്ഡിന് ഉത്തരവാദിത്വമുണ്ടെന്നും അതിനുള്ള നടപടികള് സ്വീകരിക്കണമെന്നും കോടതി ആവശ്യപ്പെട്ടു.