മന്ത്രിയാകാനില്ല; പിസി ജോര്ജിന് ജോസ് കെ മാണിയുടെ മറുപടി
കൊച്ചി: ധനമന്ത്രി കെ എം മാണി രാജിവെക്കില്ലെന്നും അതുകൊണ്ടുതന്നെ രാജിക്കാര്യം ചര്ച്ച ചെയ്യേണ്ടതില്ലെന്നും മാണിയുടെ മകനും എംപിയുമായ ജോസ് കെ മാണി. ജോസ് കെ മാണിയെ മന്ത്രിയാകാന് അനുവദിക്കില്ലെന്ന പിസി ജോര്ജിന്റെ പ്രസ്താവനയ്ക്ക് മറുപടിപറയുകയായിരുന്നു അദ്ദേഹം.
താന് എംപി ആയി തുടരും. മന്ത്രിയാകന് ഉദ്ദേശമില്ല. കെ എം മാണി രാജിവെക്കാത്തതുകൊണ്ടുതന്നെ അക്കാര്യത്തെക്കുറിച്ച് ചര്ച്ച ചെയ്യുന്നതില് പ്രസക്തിയില്ലെന്നും ജോസ് കെ മാണി പറഞ്ഞു. മാണിക്ക് കോഴ നല്കിയെന്ന ബിജു രമേശിന്റെ ആരോപണവും അദ്ദേഹം നിഷേധിച്ചു. മാണിക്കെതിരായ ആരോപണങ്ങള് വിശ്വസനീയമല്ലെന്നും ജോസ് കെ മാണി വ്യക്തമാക്കി.
കെ എം മാണി രാജിവെക്കണമെന്ന് പിസി ജോര്ജ് ശനിയാഴ്ച പരോക്ഷമായി ആവശ്യപ്പെട്ടിരുന്നു. സ്വന്തം പാര്ട്ടിക്കാരനായതുകൊണ്ടാണ് രാജിവെക്കാന് ആവശ്യപ്പെടാത്തതെന്നും അത് ധാര്മികമല്ലെന്നുമായിരുന്നു ജോര്ജ് വാര്ത്താ ലേഖകരോട് അറിയിച്ചിരുന്നത്. മാണി രാജിവെച്ചാല് സിഎഫ് തോമസ് മന്ത്രിയാകുമെന്നും ജോര്ജ് സൂചിപ്പിച്ചു.
കേരള കോണ്ഗ്രസ് ആരുടെയും കുടുംബ സ്വത്തല്ല. അതുകൊണ്ടുതന്നെ മാണിക്കു പകരം ജോസ് കെ മാണിയെ മന്ത്രിയാക്കാന് അനുവദിക്കില്ല. എംപി ആയ ജോസ് കെ മാണിക്ക് മന്ത്രിയാകാന് കഴിയില്ലെന്നും, മന്ത്രിയാക്കാന് തുനിഞ്ഞാല് താന് എതിര്ക്കുമെന്നും ജോര്ജ് പറഞ്ഞു. ജോസ് കെ മാണിക്ക് സിന്ദാബാദ് വിളിച്ചല്ല താന് പാര്ട്ടിയിലെത്തിയതെന്ന് അദ്ദേഹം നേതൃത്വത്തെ ഓര്മിപ്പിക്കുകയും ചെയ്തു.