നവ മാധ്യമങ്ങള് തന്നെ സെക്സ് സിംബലാക്കിയെന്ന് ബിജിമോള്
തിരുവനന്തപുരം: കെ എം മാണി നിയമസഭയില് ബജറ്റ് അവതരിപ്പിക്കുന്നതിനെതിരെ നടന്ന പ്രതിഷേധത്തിനിടെ ഉണ്ടായ സംഭവങ്ങള് പുതിയ രീതിയില് ചില കോണ്ഗ്രസ് നേതാക്കള് അവതരിപ്പിച്ചതോടെ നവ മാധ്യമങ്ങള് തന്നെ സെക്സ് സിംബലായി ചിത്രീകരിക്കുകയാണെന്ന് സി.പി.ഐ നേതാവ് ഇ.എസ്.ബിജിമോള് എം.എല്.എ.
പുരുഷന് മാത്രമെ ഐഡന്റിറ്റി പാടുള്ളൂ എന്നും സ്ത്രീക്ക് പാടില്ല എന്ന് പറയുന്നതിനോട് യോജിക്കാനാവില്ല. നിയമസഭയ്ക്ക് അകത്തും പുറത്തും ഇപ്പോള് അധിക്ഷേപിക്കപ്പെടുകയാണെന്നും ബിജി മോള് പറഞ്ഞു. നേരത്തെ പ്രതിഷേധത്തിനിടെ തന്നെ വട്ടംപിടിച്ച ഷിബു ബേബിജോണിനെതിരെ ബിജിമോള് കാര്യമായ പ്രതികരണം നടത്തിയിരുന്നില്ല.
എന്നാല്, കഴിഞ്ഞദിവസം കോഴിക്കോട് ഡിസിസി പ്രസിഡന്റ് കെസി അബു ഷിബുവിനെയും ബിജിമോളെയും ചേര്ത്ത് അശ്ലീല പരാമര്ശം നടത്തിയതോടെ പോലീസില് പരാതി നല്കാന് ബിജിമോള് തീരുമാനിക്കുകയായിരുന്നു. കെ സി അബുവിന്റെ പ്രസ്താവനയോടെ ഷിബു ബേബിജോണ് തന്നെ സ്പര്ശിച്ചത് മോശം ചിന്തയോടെയാണെന്നാണ് ബിജിമോളുടെ പുതിയ ആക്ഷേപം.
കെ സി അബു, എം എ വാഹിദ്, ഷിബു ബേബിജോണ് എന്നിവരെ പ്രതിസ്ഥാനത്തു നിര്ത്തിയാണ് ബിജിമോള് ഡിജിപിക്ക് പരാതി നല്കിയത്. ഇവര്ക്കെതിരെ കേസെടുക്കാമെന്ന് ഡിജിപിക്ക് നിയമോപദേശം ലഭിച്ചതായാണ് റിപ്പോര്ട്ട്. എംഎല്എമാര്ക്കെതിരെ ലൈംഗിക അതിക്രമത്തിന് കേസെടുക്കുകയാണെങ്കില് അഴിമതി വിഷയത്തില് പ്രതിസന്ധി നേരിടുന്ന യുഡിഎഫ് സര്ക്കാരിനെ അത് കൂടുതല് പ്രതിരോധത്തിലാക്കുമെന്നുറപ്പാണ്.