സരിത പറഞ്ഞില്ലെങ്കില് ആ പേരുകള് ബിജു പറയും
കൊച്ചി: സോളാര് തട്ടിപ്പുകേസുമായി ബന്ധപ്പെട്ട രാഷ്ട്രീയക്കാരുടെ പേരുകള് താന് പുറത്തുവിടുമെന്ന് കേസിലെ ഒന്നാം പ്രതി ബിജു രാധാകൃഷ്ണന്. രണ്ട് ദിവസത്തിനകം അഭിഭാഷകന് മുഖേന രാഷ്ട്രീയ നേതാക്കളുടെ പേര് വിവരങ്ങള് പരസ്യപ്പെടുത്തും എന്നാണ് ബിജു പറയുന്നത്. സോളാര് കേസുമായി പല രാഷ്ട്രീയക്കാര്ക്കും ബന്ധമുണ്ട് എന്ന് സരിത എസ് നായരും പറഞ്ഞിരുന്നു.
ജൂഡിഷ്യല് കമ്മീഷന് മുമ്പാകെ മുഴുവന് പേരുകളും വെളിപ്പെടുത്തിക്കഴിഞ്ഞു. തെളിവുകള് സഹിതം കേസില് ഉള്പ്പെട്ട എല്ലാവരെയും അകത്താക്കും. കമ്മീഷന്റെ നിര്ദേശമുള്ളതിനാലാണ് ഇപ്പോള് പേരുകള് പുറത്തുവിടാത്തത്. പറയാനുളളതെല്ലാം കമ്മീഷനോട് പറഞ്ഞിട്ടുണ്ടെന്നും ബിജു രാധാകൃഷ്ണന് പറഞ്ഞു.
എന്നാല് പേരുവിവരങ്ങള് സസ്പെന്സില് വെച്ച് ഘട്ടം ഘട്ടമായി കാര്യങ്ങള് പറയുക എന്നതാണ് സരിത നായരുടെ ശൈലി. പല പ്രമുഖരും സോളാര് കേസില് ഉള്പ്പെട്ടിട്ടുണ്ട് എന്ന് പറഞ്ഞ പുറത്തുവിട്ട ഒരു പേര് കണ്ണൂര് എം എല് എ എ പി അബ്ദുള്ളക്കുട്ടിയുടേതാണ്. ടീം സോളാറിന്റെ കാര്യം പറഞ്ഞ് ഹോട്ടലില് വിളിച്ചുവരുത്തി പീഡിപ്പിക്കാന് ശ്രമിച്ചു എന്നാണ് ആ പരാതി.
തന്റെ രണ്ടാമത്തെ കുഞ്ഞിന്റെ അച്ഛന് കേരളത്തിലെ ഒരു യുവ രാഷ്ട്രീയ നേതാവാണ് എന്ന് പറഞ്ഞ സരിത ആരാണ് ആ നേതാവ് എന്ന് ഇനിയും വെളിപ്പെടുത്തിയിട്ടില്ല. അബ്ദുള്ളക്കുട്ടിക്കെതിരായ കേസിന്റെ കാര്യത്തിലും പരമാവധി മാധ്യമ ശ്രദ്ധ നേടിയെടുക്കാനായിരുന്നു സരിതയുടെ ശ്രമം. കേസില് മൊഴി കൊടുക്കാതെ കോടതിയെയും സരിത വട്ടം ചുറ്റിച്ചു. കോടതിയോട് പറയാത്ത കാര്യങ്ങള് പലതും സരിത മാധ്യമങ്ങളോട് തുറന്ന് പറയുന്നത്.