ലോറി ഇടിച്ചു, ബൈക്കിന്റെ പെട്രോള്‍ ടാങ്ക് പൊട്ടിത്തെറിച്ചു... യുവദമ്പതിമാര്‍ കത്തിയമര്‍ന്നു

കോഴിക്കോട്: ലോറി ബൈക്കിലിടിച്ച് ബൈക്ക് യാത്രക്കാരായ ദമ്പതിമാര്‍ വെന്ത് മരിച്ചു. കോഴിക്കോട് ദേശീയപാതാ ബൈപ്പാസില്‍ ആണ് അപകടം നടന്നത്.

പാലാഴി മെട്രോ ആശുപത്രിയുടെ അടുത്ത് ഞായറാഴ്ച അര്‍ദ്ധ രാത്രിയോടെയാണ് സംഭവം. ബൈക്ക് യാത്രക്കാരായ കണ്ണൂര്‍ ചിറ്റാരിപ്പറമ്പ് വട്ടോളി സ്വദേശി മജീഷ്, ഭാര്യ ജിജി എന്നിവരാണ് ദാരുണമായി മരിച്ചത്. മജീഷിന് 29 ഉം ജിജിയ്ക്ക് 24 ഉം ആണ് പ്രായം.

ലോറിയുമായി ഇടിച്ച ബൈക്കിന്റെ പെട്രോള്‍ ടാങ്ക് പൊട്ടിത്തെറിക്കുകയായിരുന്നു. മജീഷിന്റെ കാല്‍ ബൈക്കിന്റെ ക്രാഷ് ഗാര്‍ഡില്‍ കുടുങ്ങിയിരുന്നു. ഇതോടെ മജീഷ് ബൈക്കിന് മുകളില്‍ കുടുങ്ങി കത്തിയമര്‍ന്നു.

ജിജി ബൈക്കില്‍ നിന്ന് തെറിച്ച് വീണിരുന്നു. മൃതദേഹം ഏറെ നേരത്തിന് ശേഷമാണ് കണ്ടെത്തിയത്. ശരീരം മുഴുവന്‍ പൊള്ളലേറ്റ നിലയില്‍ ആയിരുന്ന ജിജിയുടെ മൃതദേഹം. തിരിച്ചറിയാന്‍ ആഭരണങ്ങള്‍ മാത്രമായിരുന്നു ഉണ്ടായിരുന്നത്.

യമഹയുടെ എസ് ഇസെഡ് ബൈക്ക് ആണ് അപകടത്തില്‍ പെട്ടത്. ജിജിയുടെ വീട് മലപ്പുറം രാമപുരത്ത് ആണ്. രാത്രി വടകരയില്‍ നിന്ന് അങ്ങോട്ട് പോകുമ്പോഴാണ് അപകടം സംഭവിച്ചത്. 'നിറപറ'യടെ വിതരണ ലോറിയിലാണ് മജീഷിന്റെ ബൈക്ക് ഇടിച്ചത്.

English summary

Bike Accident; Couples burned to death at Kozhikode.