അനാഥാലയത്തില് ഭീകരവാദവും നീലച്ചിത്രവും:മുരളീധരന്
തിരുവനന്തപുരം:സംസ്ഥാനത്തെ അനാഥാലയങ്ങള്ക്കെതിരെ ബിജെപി നേതൃത്വം. പല അനാഥാലയങ്ങളും കുട്ടികളെ ഭീകരവാദത്തിനും നീലച്ചിത്ര നിര്മ്മാണത്തിനും ഉപയോഗിക്കുന്നു എന്നാണ് ആരോപണം. ബിജെപി സംസ്ഥാന പ്രസിഡന്റ് വി മുരളീധരനാണ് ഇത്തരം ഒരു ആരോപണം ഉന്നയിച്ചിരിക്കുന്നത്.
മുക്കത്തെ അനാഥാലയത്തിലേക്ക് ഝാര്ഖണ്ഡില് നിന്ന് കുട്ടികളെ കൊണ്ടുവന്നത് മനുഷ്യക്കടത്താണെന്ന് തെളിഞ്ഞുകഴിഞ്ഞു. ഇപ്പോള് ആ കേസ് അട്ടിമറിക്കാനുള്ള ശ്രമമാണ് മുസ്ലീം ലീഗ് നടത്തുന്നതെന്ന് വി മുരളീധരന് ആരോപിക്കുന്നു. ലീഗിന്റെ ആവശ്യപ്രകാരം അന്വേഷണം മുടങ്ങിയാല് കേന്ദ്ര അന്വേഷണത്തിനായി ആവശ്യപ്പെടുമെന്നും അദ്ദേഹം പറഞ്ഞു.
മുസ്ലീം ലീഗിനെതിരേയും വി മുരളീധരന് ആരോപണം ഉന്നയിച്ചു. മതത്തിന്റെ മറവില് മുസ്ലീം ലീഗ് നിയമവിരുദ്ധ പ്രവര്ത്തനങ്ങള് നടത്തുകയാണ്. ഈ നിലപാട് ലീഗ് തിരുത്തണമെന്ന് അദ്ദേഹം ആവശ്യപ്പെട്ടു.
മുക്കത്തെ അനാഥാലയത്തിലേക്ക് കുട്ടികളെ കൊണ്ടുവന്നത് ലൈംഗിക ചൂഷണത്തിനും അവയവ വില്പനക്കും ആണെന്ന് ആരോപണം ഉയര്ന്നിരുന്നു. ഝാര്ഖണ്ഡ് സര്ക്കാരായിരുന്നു തുടക്കത്തില് ഇത്തരം ഒരു ആരോപണം ഉന്നയിച്ചത്. എന്നാല് പിന്നീട് ഇത്തരം ആരോപണങ്ങളില് നിന്ന് അവര് പിറകോട്ട് പോയിരുന്നു.
കേന്ദ്ര ശിശുക്ഷേമ മന്ത്രി മനേക ഗാന്ധി സംഭവത്തെ മനുഷ്യക്കടത്തെന്നാണ് വിശേഷിപ്പിച്ചത്. എന്നാല് ഏതെങ്കിലും തരത്തിലുള്ള ലൈംഗിക ചൂഷണത്തിനുള്ള സാധ്യതകള് അവര് തള്ളിക്കളഞ്ഞിരുന്നു.