'ഏത് വലിയ നേതാവും പാര്ട്ടി നിര്ദേശം അംഗീകരിക്കണം';' ഇല്ലെങ്കിൽ സ്കോപ്പില്ല'; - കെ സുരേന്ദ്രന്
തിരുവനന്തപുരം: പാര്ട്ടി നേതാക്കള്ക്ക് മുന്നറിയിപ്പുമായി ബി ജെ പി സംസ്ഥാന അധ്യക്ഷന് കെ സുരേന്ദ്രന് രംഗത്ത്. ഉത്തരവാദിത്തം ആലങ്കാരിക പദവിയെന്ന് വിചാരിച്ച് നടക്കുന്നവര്ക്ക് ഇനി സ്കോപ്പില്ല.
ഏത് വലിയ നേതാവും പാര്ട്ടി നിര്ദേശം അംഗീകരിക്കണമെന്ന് കെ സുരേന്ദ്രന് വ്യക്തമാക്കി. തിരുവനന്തപുരം ജില്ലാ കമ്മറ്റി യോഗം ഉദ്ഘാടനം ചെയ്ത് സംസാരിക്കുകയായിരുന്നു കെ.സുരേന്ദ്രന്.
കഴിഞ്ഞ നിയമസഭാ തെരഞ്ഞെടുപ്പിലെ ദയനീയ തോല്വിയില് നിന്ന് പാഠം ഉള്ക്കൊണ്ട് മുന്നോട്ട് പോകാനാണ് ബി ജെ പി സംസ്ഥാന നേതൃത്വത്തിന്റെ ലക്ഷ്യം.
തോല്വിക്ക് പിന്നാലെ മണ്ഡലങ്ങളില് നിന്ന് ശേഖരിച്ച റിപ്പോര്ട്ടുകള് വിലയിരുത്തി പാര്ട്ടി തെറ്റ് തിരുത്തലുകളിലേക്ക് കടക്കുകയാണ്. അച്ചടക്കം ഉറപ്പാക്കി ശക്തമായ പ്രവര്ത്തനങ്ങളുമായി മുന്നോട്ട് പോകാനാണ് പാർട്ടിയുടെ തീരുമാനം. മറ്റ് സംസ്ഥാനങ്ങളില് പാര്ട്ടി മുന്നേറുമ്പോള് കേരളത്തില് മാത്രം രക്ഷയില്ല. കഴിഞ്ഞ ഒരു വര്ഷമായി തെറ്റുകള് മനസിലാക്കി പരിഹാരം കണ്ടെത്താനുള്ള ശ്രമങ്ങള് ആയിരുന്നെന്ന് സുരേന്ദ്രന് യോഗത്തില് വ്യക്തമാക്കി.
മുതിര്ന്ന നേതാക്കള് ഉള്പ്പെടെ പാര്ട്ടി നിര്ദേശം അനുസരിച്ച് പ്രവര്ത്തിക്കണമെന്ന മുന്നറിയിപ്പാണ് സുരേന്ദ്രന് മുന്നോട്ട് വെയ്ക്കുന്നത്. ബൂത്ത് തലം മുതല് ഇനി പ്രവര്ത്തനങ്ങള് വിലയിരുത്താനാണ് പാർട്ടിയുടെ തീരുമാനം എന്നും സുരേന്ദ്രന് പറഞ്ഞു. ഇതിനായി പാർട്ടി പ്രത്യേക സംവിധാനത്തിന് രൂപം നല്കിയിട്ടുണ്ട്. ബൂത്തുകളുടെ പ്രവര്ത്തനം, ഹാജര് എന്നിവ രേഖപ്പെടുത്തും. വീഴ്ച കണ്ടെത്തിയാല് നടപടി സ്വീകരിക്കുമെന്നും സുരേന്ദ്രന് വ്യക്തമാക്കി.
കേരളത്തില് പാര്ട്ടി ജനപിന്തുണ ഇനിയും ആര്ജിക്കേണ്ടതുണ്ടെന്ന യാഥാര്ത്ഥ്യം മനസിലാക്കി ഇതിനായി പദ്ധതികള് തയ്യാറാക്കാനാണ് തീരുമാനം. കെ റെയില് പോലുള്ള ജനകീയ വിഷയങ്ങള് ഉയര്ത്തി ജനപിന്തുണ നേടാമെന്ന് പാര്ട്ടി കണക്ക് കൂട്ടുന്നു. ഒപ്പം കേന്ദ്ര സര്ക്കാരിന്റെ ജനക്ഷേമ പദ്ധതികള് സംബന്ധിച്ച് ജനങ്ങളെ ബോധവത്കരിക്കാനുള്ള പ്രവര്ത്തനങ്ങളും നടത്തുമെന്നും കെ.സുരേന്ദ്രൻ വ്യക്തമാക്കി.
അതേസമയം, കോൺഗ്രസ്സ് പ്രവർത്തകർക്ക് മുന്നറയിപ്പുമായി കെപിസിസി പ്രസിഡന്റ് കെ.സുധാകരന് രംഗത്ത് എത്തിയിരുന്നു. സമൂഹ മാധ്യമങ്ങളില് നേതാക്കള്ക്കെതിരായ അധിക്ഷേപം അംഗീകരിക്കാനാവില്ലെന്ന് കാണിച്ചാണ് കോൺഗ്രസ്സ് പ്രവർത്തകർക്് മുന്നറിയിപ്പ് നൽകിയത്. നേതാക്കളെ പരസ്യമായി സമൂഹ മാധ്യമങ്ങളില് അധിക്ഷേപിക്കുന്നു. വ്യക്തിഹത്യ നടത്തുന്നു. ഇത് അംഗീകരിക്കാനാവില്ല. അത്തരക്കാര്ക്കെതിരെ കര്ശന നടപടി സ്വീകരിക്കുമെന്നും കെ.സുധാകരന് വ്യക്തമാക്കി.
അഞ്ച് സംസ്ഥാനങ്ങളിലെ തെരഞ്ഞെടുപ്പിന് ശേഷം കേരളത്തില് സമൂഹ മാധ്യമങ്ങളില് സോണിയാ ഗാന്ധി, രാഹുല് ഗാന്ധി, പ്രിയങ്കാ ഗാന്ധി, കെ.സി.വേണുഗോപാല് എന്നിവരെ ഒറ്റ തിരിഞ്ഞ് ആക്രമിക്കുന്നത് ശ്രദ്ധയില്പ്പെട്ടിട്ടുണ്ട്. ഇത് കെ പി സി സി നിരീക്ഷിച്ച് വരികയാണ്. തെരഞ്ഞെടുപ്പ് പരാജയത്തിന്റെ കാരണങ്ങള് പരിശോധിച്ച് ആവശ്യമായ മാറ്റങ്ങള് വരുത്തി കോണ്ഗ്രസ് നേതൃത്വം മുന്നോട്ട് പോകും. സമൂഹ മാധ്യമങ്ങളിലൂടെ പരസ്യ വിചാരണ നടത്തുന്നത് പാര്ട്ടിക്ക് കൂടുതല് ക്ഷീണമുണ്ടാക്കും. അത് തിരിച്ചറിഞ്ഞ് അത്തരം പ്രവര്ത്തികളില് നിന്നും പ്രവര്ത്തകര് പിന്തിരിയണമെന്ന് കെ.സുധാകരൻ ആവിശ്യപ്പെട്ടു.
സോണിയാ ഗാന്ധിയും രാഹുല്ഗാന്ധിയും പ്രിയങ്കാഗാന്ധിയും കെ.സി.വേണുഗോപാലും ഉള്പ്പെടെയുള്ള നേതാക്കളും പ്രവര്ത്തകരും അഞ്ച് സംസ്ഥാനങ്ങളില് നടന്ന തെരഞ്ഞെടുപ്പില് കോണ്ഗ്രസിന്റെ വിജയത്തിനായി അഹോരാത്രം പണി എടുത്തവരാണ്. പരാജയ കാരണം ചിലരുടെ ചുമലില് മാത്രം കെട്ടിവെയ്ക്കുന്ന പ്രവണത അംഗീകരിക്കാനാവില്ല. ജയ - പരാജയങ്ങളില് എല്ലാവര്ക്കും കൂട്ടുത്തരവാദിത്തമുണ്ട്.
നേതാക്കളെ അപകീര്ത്തിപ്പെടുത്തും വിധം സമൂഹ മാധ്യമങ്ങളിലും മറ്റും പരസ്യമായി പ്രതികരിക്കുന്നത് അച്ചടക്കലംഘനമായി കാണേണ്ടി വരും. ഉള്പ്പാര്ട്ടി ജനാധിപത്യം പൂര്ണ്ണമായും ഉറപ്പാക്കുന്ന പ്രസ്ഥാനമാണ് കോണ്ഗ്രസ്. വിമര്ശനങ്ങളും അഭിപ്രായങ്ങളും പാര്ട്ടി വേദികളിലാണ് രേഖപ്പെടുത്തേണ്ടത്. അല്ലാതെ പരസ്യമായി മാധ്യമങ്ങളിലൂടെ പ്രതികരിക്കുന്നവര്ക്കെതിരെ സംഘടനാപരമായ നടപടി സ്വീകരിക്കുമെന്നും സുധാകരന് പറഞ്ഞു.
Click it and Unblock the Notifications
Sign in with Google