ഇന്ത്യൻ സൈന്യത്തിന്റെ പേരിലും ബിജെപി തട്ടിപ്പ്!പണം നഷ്ടമായത് കോഴിക്കോട്ടെ പാവം ബിജെപി പ്രവർത്തകന്

കോഴിക്കോട് പാതിരപറ്റ സ്വദേശിയും ബിജെപി പ്രവർത്തകനുമായ അശ്വന്തിനാണ് പണം നഷ്ടപ്പെട്ടത്.

By ഡെന്നീസ്

Published: Monday, July 24, 2017, 13:31 [IST]

കോഴിക്കോട്: മെഡിക്കൽ കോഴ വിവാദത്തിൽ ആടിയുലയുന്ന ബിജെപി സംസ്ഥാന നേതൃത്വത്തിനെ വെട്ടിലാക്കി കൂടുതൽ ആരോപണങ്ങൾ പുറത്തുവരുന്നു. സൈന്യത്തിൽ ജോലി വാഗ്ദാനം ചെയ്ത് കോഴിക്കോട്ടെ ബിജെപി നേതാവ് പണം തട്ടിയെന്നാണ് പുതിയ പരാതി.

കോഴിക്കോട് പാതിരപറ്റ സ്വദേശിയും ബിജെപി പ്രവർത്തകനുമായ അശ്വന്തിനാണ് പണം നഷ്ടപ്പെട്ടത്. ബിജെപി മേഖലാ സെക്രട്ടറിയായ എംപി രാജനാണ് സൈന്യത്തിൽ ജോലി വാഗ്ദാനം ചെയ്ത് അശ്വന്തിൽ നിന്നും 1,40,000 രൂപ തട്ടിയെടുത്തത്. എന്നാൽ കുറേക്കാലം കാത്തിരുന്നിട്ടും ജോലിയുമായി ബന്ധപ്പെട്ട വിവരങ്ങളൊന്നും ലഭിച്ചില്ല.

തുടർന്ന് അശ്വന്തും കുടുംബവും ബിജെപി നേതൃത്വത്തിന് പരാതി നൽകിയിരുന്നു. ബിജെപി നേതൃത്വത്തിൽ നിന്ന് യാതൊരു മറുപടിയും ലഭിക്കാത്തതിനെ തുടർന്നാണ് അശ്വന്ത് പരാതിയുമായി പോലീസിനെ സമീപിച്ചത്. പരാതിയിൽ കേസെടുത്ത കുറ്റ്യാടി പോലീസ് അശ്വന്തിന്റെയും കുടുംബത്തിന്റെയും മൊഴി രേഖപ്പെടുത്തിയിട്ടുണ്ട്.

അധികാരത്തിൽ വന്നതോടെ...

നരേന്ദ്രമോദിയുടെ നേതൃത്വത്തിൽ ബിജെപി കേന്ദ്രത്തിൽ അധികാരത്തിൽ വന്നതിന് പിന്നാലെയാണ് ബിജെപി മേഖലാ സെക്രട്ടറി പാർട്ടി പ്രവർത്തകനായ യുവാവിനെ കബളിപ്പിച്ച് പണം തട്ടിയത്.

സൈന്യത്തിൽ ജോലി...

സൈന്യത്തിൽ ജോലി കിട്ടാൻ ഒത്താശ ചെയ്യാമെന്ന് വാഗ്ദാനം നൽകിയാണ് ബിജെപി മേഖലാ സെക്രട്ടറി എംപി രാജൻ ബിജെപി പ്രവർത്തകനായ അശ്വന്തിൽ നിന്നും പണം വാങ്ങിയത്.

1,40,000 രൂപ...

ആകെ 1,40,000 രൂപയാണ് അശ്വന്തിന്റെ കുടുംബം എംപി രാജന് നൽകിയത്. രണ്ട് ഘട്ടമായാണ് പണം നൽകിയതെന്ന് അശ്വന്ത് പോലീസിനോട് പറഞ്ഞിട്ടുണ്ട്.

ജോലി ലഭിച്ചില്ല...

എന്നാൽ ഏറെക്കാലം കഴിഞ്ഞിട്ടും ജോലി ലഭിക്കാതായതോടെയാണ് അശ്വന്ത് സംഭവത്തെക്കുറിച്ച് മറ്റു ബിജെപി നേതാക്കളോട് പറയുന്നത്.

നഷ്ടപരിഹാരം...

സൈന്യത്തിൽ ജോലി വാഗ്ദാനം ചെയ്ത് പണം തട്ടിയ സംഭവത്തിൽ മറ്റു ബിജെപി നേതാക്കളും ഇടപെട്ടു. ഒടുവിൽ രണ്ട് ലക്ഷം രൂപ അശ്വന്തിന് നഷ്ടപരിഹാരമായി നൽകാമെന്ന് വാഗ്ദാനം ചെയ്താണ് അന്ന് മറ്റു ബിജെപി നേതാക്കൾ പ്രശ്നം ഒതുക്കിയത്.