തിരുവനന്തപുരത്ത് ബ്ലേഡ് മാഫിയയുടെ ആക്രമണം!! കുട്ടി ഉള്പ്പെടെ മൂന്നു പേര്ക്ക് പരുക്ക്!!
ബ്ലേഡ്കാരനായ പൂവാര് സ്വദേശി ബിമലാണ് കുടുംബത്തെ ആക്രമിച്ചത്. ചൊവ്വാഴ്ച വൈകിട്ടാണ് സംഭവം. മൂന്നു വര്ഷം മുമ്പ് ഒരു ലക്ഷം രൂപ അനില് കുമാര് ബിമലില് നിന്ന് പലിശയ്ക്കെടുത്തിരുന്നു.
നെയ്യാറ്റിന്കര: തിരുവനന്തപുരത്ത് കുടുംബത്തിനു നേരെ ബ്ലേഡ് മാഫിയയുടെ ആക്രമണം. നെയ്യാറ്റിന്കര സ്വദേശി അനില് കുമാറിന്റെ കുടുംബത്തിനു നേരെയാണ് ആക്രമണം ഉണ്ടായത്. അനില് കുമാറിനും ഭാര്യയ്ക്കും പുറമെ ഒമ്പതു വയസുള്ള മകള്ക്കും ആക്രമണത്തില് പരുക്കേറ്റു.
ബ്ലേഡ്കാരനായ പൂവാര് സ്വദേശി ബിമലാണ് കുടുംബത്തെ ആക്രമിച്ചത്. ചൊവ്വാഴ്ച വൈകിട്ടാണ് സംഭവം. മൂന്നു വര്ഷം മുമ്പ് ഒരു ലക്ഷം രൂപ അനില് കുമാര് ബിമലില് നിന്ന് പലിശയ്ക്കെടുത്തിരുന്നു. മാസം 6000 രൂപ പലിയ്ക്കാണ് പണം വാങ്ങിയത്. മാസ പലിശയ്ക്ക് പുറമെ 75,000 രൂപ മൂന്നു ഗഡുക്കളായി നല്കിയിരുന്നു. ടിപ്പര് ലോറി ഡ്രൈവറായ അനില് കുമാര് ബാക്കി തുക തിരികെ നല്കാന് സമയം ആവശ്യപ്പെട്ടിരുന്നു.
എന്നാല് ചൊവ്വാഴ്ച പണം ചോദിച്ചെത്തിയ ബിമല് അനില് കുമാറിന്റെ ഭാര്യയോട് മോശമായി പെരുമാറി. ഇക്കാര്യം അറിഞ്ഞെത്തിയ ബിമലും അനിലും തമ്മില് വാക്കേറ്റമുണ്ടായിരുന്നു. ഇതിനു പിന്നാലെയാണ് അനിലിനും കുടുംബത്തിനും നേരെ ആക്രമണം ഉണ്ടായത്.
പരുക്കേറ്റ അനില്കുമാറും കുടുംബവും നെയ്യാറ്റിന്കര താലൂക്ക് ആശുപത്രിയില് ചികിത്സയിലാണ്. ബിമലിനായി അന്വേഷണം പുരോഗമിക്കുകയാണ്. നെയ്യാറ്റിന്കര, പൂവാര്, നെടുമങ്ങാട്, ആറ്റിങ്ങല് എന്നിവിടങ്ങളില് ബ്ലേഡ് മാഫിയ സജീവമാകുന്നുണ്ടെന്ന് പരാതികള് ഉയര്ന്നിരിക്കുകയാണ്.