രാജന്‍ വധക്കേസില്‍ ഞെട്ടിപ്പിക്കുന്ന വെളിപ്പെടുത്തലുമായി മുന്‍ പോലീസ് ഡ്രൈവര്‍

തിരുവനന്തപുരം: അടിയന്തരാവസ്ഥക്കാലത്ത് കാണാതായ എന്‍ജിനീയറിങ് വിദ്യാര്‍ത്ഥി രാജനെ കൊത്തി നുറുക്കി പന്നിക്കിട്ടുകൊടുത്തെന്ന് വെളിപ്പെടുത്തല്‍ . പോലീസിലെ മുന്‍ കരാര്‍ ഡ്രൈവറാണ് ഇക്കാര്യം പുറത്ത് വിട്ടിരിക്കുന്നത്. മനസ്സാക്ഷിക്കുത്ത് കാരണമാണ് ഇപ്പോള്‍ ഇക്കാര്യം പുറത്ത് പറയുന്നതെന്ന് അദ്ദേഹം പറയുന്നു.

രാജന്‍ കക്കയത്തെ പോലീസ് ക്യാമ്പില്‍ വച്ച് കൊല്ലപ്പെട്ടു എന്നാണ് പോലീസ് റിപ്പോര്‍ട്ട്. പിതാവ് ഈച്ചര വാര്യരുടെ വര്‍ഷങ്ങള്‍ നീണ്ട നിയമ പോരാട്ടത്തിനൊടുവിലാണ് രാജന്‍ കൊല്ലപ്പെട്ടു എന്ന കാര്യം തന്നെ വെളിപ്പെട്ടത്.

കൂത്താട്ടുകുളത്തെ ബേക്കണ്‍ ഫാക്ടറിയില്‍ വച്ചാണ് രാജന്‍ കൊല്ലപ്പെട്ടതാണെന്നാണ് ഇപ്പോഴത്തെ വെളിപ്പെടുത്തല്‍. ഇപ്പോഴത്തെ മീറ്റ് പ്രൊഡക്ട് ഓഫ് ഇന്ത്യയാണ് പഴയ ബേക്കണ്‍ ഫാക്ടറി. കൈരളി പീപ്പിള്‍ ചാനലാണ് വെളിപ്പെടുത്തല്‍ പുറത്ത് വിട്ടിരിക്കുന്നത്.

രാജനെ ഫാക്ടറിയിലെ ഐസ് ചേംബറില്‍ തള്ളി എന്നാണ് മുന്‍ കരാര്‍ ഡ്രൈവര്‍ വെളിപ്പെടുത്തിയിരിക്കുന്നത്. അതിന് ശേഷം മൃതദേഹം കൊത്തി നുറുക്കി പന്നിക്ക് ഇട്ടുകൊടുത്തിരിക്കാം എന്നും മുന്‍ ഡ്രൈവര്‍ പറയുന്നു. സ്ഥാപനത്തിലെ ഉദ്യോഗസ്ഥര്‍ ഇക്കാര്യം ആദ്യം എതിര്‍ത്തു എന്ന് പറയുന്നു. എന്നാല്‍ മന്ത്രിയുടെ ഉത്തരവുണ്ടെന്ന് പറഞ്ഞാണ് പോലീസ് രാജനെ കൂത്താട്ടുകുളത്ത് വച്ച് ഇല്ലായ്മ ചെയ്തതെന്നും വെളിപ്പെടുത്തലില്‍ പറയുന്നു.

എന്നാല്‍ ഏത് മന്ത്രിയുടെ നിര്‍ദ്ദേശ പ്രകാരമാണ് സംഭവം നടന്നതെന്ന് വെളിപ്പെടുത്തല്‍ നടത്തിയ വ്യക്തി പറഞ്ഞിട്ടില്ല. മൃതദേഹം ഒരു തരത്തിലും കണ്ടെത്തരുതെന്നും തെളിവുകളൊന്നും അവശേഷിക്കരുതെന്നും ഉള്ള ലക്ഷ്യത്തോടെയായിരിക്കാം ഇത്തരത്തില്‍ ചെയ്തതെന്നും മുന്‍ ഡ്രൈവര്‍ പറയുന്നു.

രാജന്‍ വധക്കേസില്‍ അന്നത്തെ ക്രൈം ബ്രാഞ്ച് മേധാവിയായിരുന്ന ജയറാം പടിക്കലിനെ കോടതി കുറ്റക്കാരനെന്ന് കണ്ടെത്തി ശിക്ഷ വിധിച്ചിരുന്നു. എന്നാല്‍ അപ്പീലില്‍ ശിക്ഷ റദ്ദാക്കപ്പെട്ടു. പക്ഷേ രാജന്റെ ശരീരാവശിഷ്ടം എവിടെ നിന്നും കണ്ടെത്താനായിരുന്നില്ല. 1976 മാര്‍ച്ച് ഒന്നിനാണ് കോഴിക്കോട് റീജിയണല്‍ എന്‍ജിനീയറിംഗ് കോളേജ് വിദ്യാര്‍ത്ഥിയായ രാജനെ നക്‌സല്‍ ബന്ധം ആരോപിച്ച് പോലീസ് അറസ്റ്റ് ചെയ്യുന്നത്. അതിന് ശേഷം രാജന്‍ പുറം ലോകം കണ്ടിട്ടില്ല.

English summary

Breaking revelation in Rajan Murder Case