ബഫർ സോണ്: ആശങ്ക വേണ്ട, തെറ്റായ പ്രചരണങ്ങളില് വീഴരുതെന്ന് സിപിഎം
തിരുവനന്തപുരം: ബഫർ സോണ് വിഷയത്തില് ജനങ്ങള് തെറ്റായ പ്രചരണങ്ങളില് വീഴരുതെന്ന് സി പി എം. വന്യജീവി സങ്കേതങ്ങളും, ദേശീയ ഉദ്യാനങ്ങളും ഉള്പ്പെടുന്ന സംരക്ഷണ പ്രദേശങ്ങള്ക്ക് ചുറ്റും ഒരു കിലോമീറ്റര് പരിസ്ഥിതിലോല മേഖലയാക്കണമെന്ന വിധി കേരളത്തില് അപ്രായോഗികമാണെന്ന കാര്യം സംസ്ഥാന സര്ക്കാര് വ്യക്തമാക്കിയിട്ടുള്ളതാണ്ന്നെ് സി പി എം സംസ്ഥാന സെക്രട്ടറിയേറ്റ് പ്രസ്താവനയിലൂടെ അറിയിച്ചു.
ഉപഗ്രഹ സഹായത്തോടെ തയ്യാറാക്കിയത് പ്രാഥമിക റിപ്പോര്ട്ട് മാത്രമാണ്. ഇതിലാവട്ടെ എല്ലാ നിര്മ്മിതികളും ഉള്പ്പെട്ടിട്ടില്ല. വിട്ടുപോയവ ഫീല്ഡ് സര്വ്വെയില് കൂട്ടിച്ചേര്ക്കുമെന്ന കാര്യവും സര്ക്കാര് വ്യക്തമാക്കി കഴിഞ്ഞിട്ടുണ്ട്. ഇത് സംബന്ധിച്ച പരാതി അറിയിക്കാനുള്ള സമയം നീട്ടി നല്കുമെന്നും സംസ്ഥാന സര്ക്കാര് വ്യക്തമാക്കിയിട്ടുണ്ട്. ഇത് സംബന്ധിച്ച ആശങ്കകള് പരിഹരിക്കുമെന്ന് സര്ക്കാര് വ്യക്തമാക്കിയിരിക്കെ സര്ക്കാരിനെതിരായി തെറ്റായ പ്രചാരവേലകളുമായി ഇറങ്ങിയിരിക്കുന്നവരുടെ താല്പര്യങ്ങള് തിരിച്ചറിയണം. തെറ്റായ പ്രചരണങ്ങളില് ജനങ്ങള് കുടങ്ങിപ്പോകരുത് .
കേരളത്തിന്റെ പരിസ്ഥിതിയും, ജനങ്ങളുടെ ആവാസവ്യവസ്ഥയും സംരക്ഷിക്കുന്നതിനുള്ള നടപടികളാണ് ഉണ്ടാകേണ്ടത്. ജനങ്ങളുടെ ആവാസവ്യവസ്ഥ സംരക്ഷിക്കുക എന്നത് പ്രധാനപ്പെട്ട ഉത്തരവാദിത്വമാണ്. അതുകൊണ്ട് തന്നെ ഇതുമായി ബന്ധപ്പെട്ട് ഏതൊരു ആശങ്കയും ഉണ്ടാകേണ്ടതില്ല. ജനങ്ങളുടെ ജീവിതം സംരക്ഷിക്കുമെന്ന് ഉറപ്പുവരുത്തിക്കൊണ്ട് ബഫര്സോണ് രൂപപ്പെടുത്തുന്ന നടപടിയാണ് ഉണ്ടാകേണ്ടതെന്ന് സി പി എം സംസ്ഥാന സംസ്ഥാന സെക്രട്ടറിയേറ്റ് പ്രസ്താവനയിലൂടെ അറിയിച്ചു.
അതേസമയം, ബഫര് സോണുമായി ബന്ധപ്പെട്ട ജനവാസ കേന്ദ്രങ്ങളിലുള്ളവര്ക്ക് പീഡയനുഭവിക്കാതെ സൈ്വരജീവിതം തുടരാന് കഴിയണമെന്ന നിലപാടാണ് സംസ്ഥാന സര്ക്കാറിനുള്ളതെന്ന് മുഖ്യമന്ത്രി പിണറായി വിജയന് പറഞ്ഞു. എന്നാല് ബഫര് സോണിന്റെ പേരില് വിവേചനമുണ്ടാക്കാനാണ് ചിലര് ശ്രമിക്കുന്നതെന്നും അദ്ദേഹം വ്യക്തമാക്കി.
സംസ്ഥാന യുവജന ക്ഷേമ ബോര്ഡ് തദ്ദേശ സ്വയംഭരണ സ്ഥാപനങ്ങളുടെ സഹകരണത്തോടെ ഡിസംബര് 18 മുതല് 21 വരെ നടത്തുന്ന സംസ്ഥാന കേരളോത്സവത്തിന്റെ കലാമത്സരങ്ങള് കണ്ണൂര് പൊലീസ് മൈതാനിയില് ഉദ്ഘാടനം ചെയ്യുകയായിരുന്നു മുഖ്യമന്ത്രി.
ബഫര് സോണ് സംബന്ധിച്ച് സുപ്രീം കോടതിയുടെ ഉത്തരവ് എങ്ങിനെ ബാധിക്കുമെന്നത് ജനതാല്പര്യം മുന്നിര്ത്തി കോടതിയില് പറയാനും കേന്ദ്ര സര്ക്കാറിന്റെ ശ്രദ്ധയില്പെടുത്താനും സര്ക്കാര് തയ്യാറായി. നേരത്തെ കോടതി ഉത്തരവിന്റെ ഭാഗമായി ഒരു റിപ്പോര്ട്ട് നല്കേണ്ടതുണ്ടായിരുന്നു. അത് വേഗത്തിലാക്കാനാണ് ഉപഗ്രഹ സര്വെ നടത്തിയത്. സദുദ്ദേശം മാത്രമാണതിന് പിന്നില്
ഉപഗ്രഹ സര്വെയില് എല്ലാ കാര്യങ്ങളും ഉള്പ്പെട്ടിട്ടില്ല എന്ന ബോധ്യത്തെത്തുടര്ന്ന് സര്വെ ഫലം അന്തിമ രേഖയില്ലെന്ന നിലപാടെടുത്തു.
പ്രാദേശിക പ്രത്യേകതകള് പഠിക്കാന് ജസ്റ്റിസ് തോട്ടത്തില് അധിപനായി വിദഗ്ധ സമിതിയെ നിയോഗിച്ചു.തദ്ദേശ സ്വയംഭരണ സ്ഥാപനങ്ങള്ക്ക് വിവരങ്ങള് വാര്ഡടിസ്ഥാനത്തില് രേഖപ്പെടുത്താന് അവസരം നല്കി. ഇങ്ങനെ റിപ്പോര്ട്ട് കുറ്റമറ്റതാക്കാനുള്ള ശ്രമത്തിലാണ് സര്ക്കാര്. എന്നാല് ഇതൊന്നുമല്ല നടക്കുന്നതെന്ന് വരുത്തി തീര്ക്കാന് ചിലര് ശ്രമിക്കുന്നു. വ്യക്തമായ ഉദ്ദേശങ്ങളാണതിന് പിന്നില്. ഇത് തിരിച്ചറിയാന് കഴിയണം. നാടിന്റേയും ജനങ്ങളുടെയു താല്പര്യം സംരക്ഷിക്കാന് എല്ലാവരുടേയും പിന്തുണ വേണം മുഖ്യമന്ത്രി പറഞ്ഞു.
അതേസമയം, ബഫര് സോണ് വിഷയത്തില് സര്ക്കാരിന്റെ അലംഭാവവും കെടുകാര്യസ്ഥതയും മാപ്പര്ഹിക്കാത്ത കുറ്റമാണെന്ന് വിഡി സതീശന് അറിയിച്ചിരുന്നു. ജനവാസമേഖലകളെ പൂര്ണമായും ഒഴിവാക്കണമെന്ന് 2013-ല് ഉമ്മന് ചാണ്ടി സര്ക്കാരിന്റെ കാലത്ത് മന്ത്രിസഭാ യോഗം തീരുമാനമെടുത്ത് കേന്ദ്ര സര്ക്കാരിനെ അറിയിച്ചു. എന്നാല് ഇക്കാര്യത്തില് കേന്ദ്ര പരിസ്ഥിതി മന്ത്രാലയം ചോദിച്ച സംശയങ്ങള്ക്ക് മറുപടി നല്കാന് 2016-ല് അധികാരത്തിലെത്തിയ പിണറായി സര്ക്കാര് തയാറായില്ല.
ഇതോടെ 2018-ല് ഈ തീരുമാനം റദ്ദായി. ഇതിന് പിന്നാലെ ജനവാസ കേന്ദ്രങ്ങളെ ഉള്പ്പെടുത്തി ഒരു കിലോമീറ്റര് ബഫര് സോണ് പ്രഖ്യാപിക്കണമെന്ന് 2019 ല് പിണറായി സര്ക്കാര് തീരുമാനിച്ച് കേന്ദ്രത്തെ അറിയിച്ചു. ജനവാസ മേഖലകളില് ബഫര് സോണ് ആകാമെന്ന തീരുമാനമെടുത്ത മന്ത്രിസഭാ യോഗത്തിലെ അംഗമായിരുന്ന എം.എം മണിയാണ് ഇടുക്കിയില് ഹര്ത്താലിന് ആഹ്വാനം നല്കിയത്. 2.5 ലക്ഷം ഹെക്ടര് സ്ഥലം ഉള്പ്പെടുമെന്നും അദ്ദേഹം വ്യക്തമാക്കി.
Click it and Unblock the Notifications
Sign in with Google