മലയിന്കീഴില് വൃദ്ധയേയും ഭർത്താവിനേയും പൂട്ടിയിട്ട് രണ്ടര പവൻ കവർന്നു: പിന്നില് ബൈക്ക് യാത്രികന്!
മലയിൻകീഴ്: ബൈക്കിലെത്തിയ യുവാവ് വഴിചോദിക്കാനെന്ന വ്യാജേന വീട്ടിൽ കയറി വൃദ്ധയുടെ രണ്ടര പവന്റെ മാല പൊട്ടിച്ചു. തുടർന്ന് വൃദ്ധയേയും മുറിയിലുണ്ടായിരുന്ന ഭർത്താവിനെയും പൂട്ടിയിട്ടാണ് ഇയാൾ രക്ഷപ്പെട്ടത്. ഇന്നലെ വൈകിട്ട് അഞ്ചരയോടെ മാറനല്ലൂർ പോങ്ങുംമൂട് ജംഗ് ഷന് സമീപം മാധവ വിലാസം വീട്ടിൽ ഗംഗാധരിപ്പിള്ളയുടെ (78) മാലയാണ് കവർന്നത്.
ഭർത്താവ് മാധവൻപിള്ള മുറ്റത്ത് നിൽക്കുമ്പോള് അപരിചിതനായ യുവാവ് വിൻസന്റിനെ അറിയാമോ എന്ന് ചോദിച്ചാണെത്തിയത്. അറിയില്ലെന്ന് പറഞ്ഞ് മാധവൻപിള്ള മുറിയിലേക്ക് പോയപ്പോൾ യുവാവ് വീട്ടിൽ കയറി അടുക്കളയിലായിരുന്ന ഗംഗാധരപ്പിള്ളയുടെ മാലപൊട്ടിച്ചു. തുടർന്ന് പോകുന്നതിനിടെ പുറത്ത് നിന്ന് വാതിൽ അടച്ച് കുറ്റിയിട്ടു.
മാധവൻനായരുടെ മുറിയുടെ വാതിലും അടച്ച ശേഷമാണ് മോഷ്ടാവ് പുറത്തിറങ്ങി ബൈക്കിൽ രക്ഷപ്പെട്ടത്. നിലവിളികേട്ട് ഓടിയെത്തിയ ബന്ധുക്കൾ വാതിൽ തുറന്ന് അന്വേഷിച്ചപ്പോഴാണ് സംഭവം അറിയുന്നത്. മാറനല്ലൂർ എസ് ഐ ഷിബുവിന്റെ നേതൃത്വത്തിൽ അന്വേഷണം ആരംഭിച്ചു. സിസിടിവി കാമറ പരിശോധനയിൽ പ്രതിയെക്കുറിച്ച് വിവരം ലഭിച്ചതായി സൂചനയുണ്ട്.