ബൈക്കിലെത്തി മാല മോഷ്ടിക്കുന്ന സംഘം കോഴിക്കോട് പിടിയില്
കോഴിക്കോട്: ബൈക്കിലെത്തി മാല മോഷ്ടിക്കുന്ന സംഘത്തെ പോലീസ് പിടികൂടി. കോഴിക്കോട് നിന്നാണ് ഒരു സംഘത്തെ പിടികൂടിയത്. മാറാട് സ്വദേശികളായ ഫൈജാസ്, ഷെഫീഖ്, കൊളത്തറ സ്വദേശി ആഷിഖ് എന്നിവരാണ് പോലീസിന്റെ പിടിയിലായത്. ഒട്ടേറെ മോഷണ കേസുകള് ഇവരുടെ പേരില് രജിസ്റ്റര് ചെയ്തിട്ടുണ്ടെന്നാണ് പോലീസ് പറയുന്നത്.
ബൈക്കിലെത്തി മാല പിടിച്ചു പറിച്ചു കൊണ്ടുപോകുകയാണ് ഇവരുടെ സ്ഥിരം ജോലി. ഇരുപതോളം കേസുകളില് പ്രതികളാണിവര് എന്നും പോലീസ് വ്യക്തമാക്കുന്നു. തിരക്കില്ലാത്ത വഴികളാണ് ഇവര് മോഷണം നടത്താന് ഉപയോഗിക്കാറുള്ളത്.
ആളുകള് അധികം പോകാത്ത വഴികളില് ഒളിഞ്ഞിരിക്കുന്ന ഇവര് സ്ത്രീകള് നടന്നു പോകുമ്പോള് ഇവരെ ബൈക്കില് പിന്തുടരുകയും ചെയ്യുന്നു. സ്ത്രീകളുടെ അടുത്തു എത്തുന്ന ഇവര് സംശയം തോന്നാതിരിക്കാന് വഴി ചോദിക്കുകയും പിന്നീട് പിന്നിലിരിക്കുന്നയാള് മാലപോട്ടിക്കുകയും ചെയ്യുകയാണ് പതിവ്.
ആളുകള് അധികം ഇല്ലാത്ത വഴി ആയതിനാല് സ്പീഡില് ബൈക്ക് ഓടിച്ച് ഇവര് രക്ഷപ്പെടുന്നു. മോഷ്ടിക്കുന്ന സ്വര്ണ്ണം ഇവര് മറ്റു ജില്ലകളില് എത്തിച്ച് വില്പന നടത്തുകയും ചെയ്യുന്നു. പിടികൂടിയ പ്രതികളെ പോലീസ് ചോദ്യം ചെയ്തു വരികയാണ്.