മൂന്നു രാജ്യങ്ങളുടെ വിസ... തൃശൂര് കൊലക്കേസിലെ പ്രതി രാജ്യവിട്ടു? ലുക്കൗട്ട് നോട്ടീസ് ഉടന്
നാലംഗ ക്വട്ടേഷന് സംഘത്തെ നേരത്തേ അറസ്റ്റ് ചെയ്തിരുന്നു
ചാലക്കുടി: തൃശൂരില് ഭൂമിടിയപാടുകാരനായ രാജീവ് കൊല ചെയ്യപ്പെട്ട സംഭവത്തില് മുഖ്യപ്രതി രാജ്യം വിട്ടെന്നു സംശയം. അങ്കമാലി സ്വദേശിയായ ചക്കര ജോണിയെയാണ് കാണാതായത്. സംഭവത്തിലെ മുഖ്യ സൂത്രധാരനും ജോണിയാണെന്നാണ് പോലീസിനു ലഭിച്ച വിവരം. കൊലപാതകം നടത്തിയ ക്വട്ടേഷന് സംഘത്തിലെ നാലു പേരെ പോലീസ് ഇതിനകം അറസ്റ്റ് ചെയ്തിട്ടുണ്ട്. എന്നാല് സംഭവത്തിനു ശേഷം ഒളിവില്പ്പോയ ജോണിയെ പിടികൂടാന് സാധിച്ചിട്ടില്ല.
ജോണിക്കു മൂന്നു രാജ്യങ്ങളുടെ വിസയുണ്ടായിരുന്നതായും പോലീസ് കണ്ടെത്തിയിട്ടുണ്ട്. ഓസ്ട്രേലിയ, യുഇഎ, തായ്ലന്ഡ് രാജ്യങ്ങളുടെ വിസയാണ് ജോണിയുടെ പക്കലുള്ളത്. ജോണിക്കായി വിമാനത്താവളത്തില് പോലീസ് ഉടന് ലുക്കൗട്ട് നോട്ടീസ് പുറപ്പെടുവിക്കും. ഇയാള്ക്ക് ഉന്നത രാഷ്ട്രീയ ബന്ധമുണ്ടെന്നു പോലീസിനു സൂചന ലഭിക്കുന്നുണ്ട്.
പ്രമുഖ അഭിഭാഷകനായ സിപി ഉദയഭാനുവില് നിന്നും തനിക്കു ഭീഷണിയുണ്ടെന്നു രാജീവ് മൂന്നു മാസങ്ങള്ക്കു മുമ്പ് ഡിജിപിക്ക് പരാതി നല്കിയിരുന്നു. ഇതിനെ കുറിച്ച് അന്വേഷിക്കുമെന്ന് റൂറല് പോലീസ് മേധാവി യതീഷ് ചന്ദ്ര വ്യക്തമാക്കി.