തച്ചങ്കരിയുടെ സ്ഥാനക്കയറ്റം ചെന്നിത്തല അറിഞ്ഞ് തന്നെ, അപ്പോള്‍ നുണപറഞ്ഞതാര്?

By Soorya Chandran

Published: Thursday, January 1, 2015, 15:16 [IST]

തിരുവനന്തപുരം: ഐജി ടോമിന്‍ തച്ചങ്കരിക്ക് സ്ഥാനക്കയറ്റം നല്‍കിയത് ആഭ്യന്തര മന്ത്രി രമേശ് ചെന്നിത്തലയുടെ അറിവോടെ തന്നെയാണെന്ന് മുഖ്യമന്ത്രി ഉമ്മന്‍ ചാണ്ടി. ഇത് സംബന്ധിച്ച ഫയല്‍ ചെന്നിത്തല കണ്ടിരുന്നുവെന്നും മുഖ്യമന്ത്രി.

ഏഷ്യാനെറ്റ് ന്യൂസിന് അനുവദിച്ച പ്രത്യേക അഭിമുഖത്തിലാണ് ഉമ്മന്‍ ചാണ്ടി ഇക്കാര്യം പറഞ്ഞത്. നടപടിക്രമങ്ങള്‍ പാലിച്ചാണ് സ്ഥാനക്കയറ്റം നല്‍കിയതെന്നും ഉമ്മന്‍ ചാണ്ടി പറഞ്ഞു.

നിരവധി അന്വേഷണങ്ങള്‍ നേരിടുന്ന ഐപിഎസ് ഉദ്യോഗസ്ഥനാണ് ടോംമിന്‍ തച്ചങ്കരി. അനധികൃത സ്വത്ത് സമ്പാദന കേസിലും അനുവാദമില്ലാതെ വിദേശയാത്ര നടത്തിയ സംഭവത്തിലും തച്ചങ്കരിക്കെതിരെ അന്വേഷണം നടക്കുന്നുണ്ട്. ഈ സാഹചര്യത്തില്‍ അദ്ദേഹത്തിന് സ്ഥാനക്കയറ്റം നല്‍കിയതാണ് വിവാദമായത്.

തച്ചങ്കരിക്ക് സ്ഥാനക്കയറ്റം നല്‍കിയത് ചെന്നിത്തലയുടെ എതിര്‍പ്പ് അവഗണിച്ചാണെന്ന് റിപ്പോര്‍ട്ടുകളുണ്ടായിരുന്നു . സ്ഥാനക്കയറ്റം നല്‍കാന്‍ മന്ത്രിസഭ തീരുമാനിച്ച കാര്യം അറിയില്ലെന്നാണ് കഴിഞ്ഞ ദിവസം രമേശ് ചെന്നിത്തല വയനാട്ടില്‍ പറഞ്ഞത് .

മുഖ്യമന്ത്രി പറഞ്ഞതാണോ സത്യം, അതോ ചെന്നിത്തല പറഞ്ഞതാണോ സത്യം എന്നാണ് ഇനി പുറത്ത് വരേണ്ടത് . ടോമിന്‍ തച്ചങ്കരിക്ക് സ്ഥാനക്കയറ്റം നല്‍കുന്നതിനെ ചീഫ് സെക്രട്ടറിയും എതിര്‍ത്തിരുന്നു എന്നാണ് റിപ്പോര്‍ട്ടുകള്‍ .

Published On January 1, 2015