സര്ക്കാരിന്റെ ഈ നയം അറിയാത്ത ആളല്ല ഗവര്ണര്; ആരിഫ് മുഹമ്മദ് ഖാന് മറുപടിയുമായി മുഖ്യമന്ത്രി
കണ്ണൂര്: സംസ്ഥാനത്തെ സര്വ്വകലാശാലകളില് വൈസ് ചാന്സലര് നിയമനുമായി ബന്ധപ്പെട്ട് ഗവര്ണര് ആരിഫ് മുഹമ്മദ് ഖാന് മുന്നോട്ടുവച്ച ആരോപണങ്ങള്ക്ക് മറുപടിയുമായി മുഖ്യമന്ത്രി പിണറായി വിജയന് രംഗത്ത്. ഉന്നത വിദ്യാഭ്യാസ മേഖലയുടെ ശാക്തീകരണമാണ് എല്ഡിഎഫിന്റെ നയമെന്ന് പിണറായി കണ്ണൂരില് നടത്തിയ വാര്ത്താസമ്മേളനത്തില് വ്യക്തമാക്കി. ഉന്നത വിദ്യാഭ്യാസ മേഖലയിലെ കുറവ് തുറന്നുപറഞ്ഞാണ് എല്ഡിഎഫ് തിരഞ്ഞെടുപ്പിനെ നേരിട്ടതെന്നും മുഖ്യമന്ത്രി വ്യക്തമാക്കി.
ഉന്നത വിദ്യാഭ്യാസ മേഖലയെ കാലികമായി പരിഷ്കരിക്കാനുള്ള ആസൂത്രിത ഇടപെടല് സര്ക്കാര് നടത്തുന്നുണ്ട്. എല്ലാം തികഞ്ഞു എന്ന അഭിപ്രായം സര്ക്കാരിനില്ല. സര്ക്കാരിന്റെ ഈ നയം അറിയാത്ത ആളല്ല ഗവര്ണര്. സ്കൂള് വിദ്യാഭ്യാസത്തിലെ മികവ് സര്വ്വകലാശാലകളിലും കൊണ്ടു വരേണ്ടതുണ്ട്. ഇക്കാര്യം ഗവര്ണറുടെ നയപ്രഖ്യാപനം പ്രസംഗത്തിലടക്കം പരാമര്ശിച്ചതാണ്. ലക്ഷ്യം കൈവരിക്കാന് ഒട്ടേറെ മുന്നോട്ടു പോകേണ്ടതുണ്ടെന്നും മുഖ്യമന്ത്രി വ്യക്തമാക്കി.
സ്കൂള് വിദ്യാഭ്യാസത്തില് കഴിഞ്ഞ അഞ്ചുവര്ഷം കൊണ്ട് നേടിയ മികവിന്റെ റെക്കോഡ് ഉന്നത വിദ്യാഭ്യാസത്തിലും കൈവരിക്കും. ഇതിനായി 30 സ്വതന്ത്ര മികവിന്റെ കേന്ദ്രങ്ങള് സര്വ്വകലാശാലകള്ക്കുള്ളില് സ്ഥാപിക്കും. 500 പോസ്റ്റ് ഡോക്ടറല് ഫെലോഷിപ്പുകള് അനുവദിക്കും. ഡോക്ടറല് പഠന സൗകര്യങ്ങള് മെച്ചപ്പെടുത്തും. അഫിലിയേറ്റഡ് കോളേജുകളിലെ സൗകര്യങ്ങള് വിപുലപ്പെടുത്തും. കൂടുതല് കോഴ്സുകള് അനുവദിക്കും. കൂടുതല് പഠനസൗകര്യങ്ങള് സൃഷ്ടിക്കുന്നതിന് അവശ്യമായ ഇടങ്ങളില് ഷിഫ്റ്റ് സമ്പ്രദായവും ആവശ്യമുളള ഇടങ്ങളില് പുതിയ സ്ഥാപനങ്ങളും അനുവദിക്കും. കേരളത്തെ ഗുണമേയുള്ള ഉന്നതവിദ്യാഭ്യാസ ഹബ്ബാക്കുമെന്നും മുഖ്യമന്ത്രി പറഞ്ഞു.
ഉന്നതവിദ്യാഭ്യാസ രംഗത്തെ പ്രശ്നങ്ങളെയും മേഖല മെച്ചപ്പെടുത്തേണ്ടതും സംബന്ധിച്ച് ഗവര്ണ്ണറും സര്ക്കാരും പൊതുവില് ഒരേ സമീപനമാണ് സ്വീകരിച്ചിട്ടുള്ളത് എന്ന് കാണാം. ഈ പൊതു സമീപനത്തിന്റെ അടിസ്ഥാനത്തില് ഇക്കാര്യങ്ങള് പ്രയോഗത്തില് കൊണ്ടുവരുമ്പോള് ചില വ്യത്യസ്ത അഭിപ്രായങ്ങള് ഉണ്ടാവാം. വ്യത്യസ്ത അഭിപ്രായങ്ങള് ഉയര്ന്നുവരുമ്പോള് ചര്ച്ച ചെയ്ത് പൊതുവായ യോജിപ്പില് എത്തുകയാണ് ചെയ്യുക. ബഹു. ഗവര്ണ്ണര് പല കാര്യങ്ങളിലും കത്തുകളിലൂടെയും നേരിട്ടും പലപ്പോഴും ആശയവിനിമയം നടത്താറുണ്ട്. അത് ഭരണതലത്തില് സ്വാഭാവികമായും ഉണ്ടാകുന്ന കാര്യങ്ങളാണെന്ന് മുഖ്യമന്ത്രി വ്യക്തമാക്കി.
ഇപ്പോള് പൊതുമണ്ഡലത്തിലും പത്രമാധ്യമങ്ങളിലും തുടര്ച്ചയായി വാര്ത്തകള് വരുകയും ചാന്സലര് കൂടിയായ ഗവര്ണ്ണറുടെ ചില പ്രതികരണങ്ങള് തെറ്റിദ്ധാരണ പരത്തുന്ന വിധം മാധ്യമങ്ങള് അവതരിപ്പിക്കുകയും ചെയ്തിട്ടുണ്ട്. ഈ സാഹചര്യത്തില് പൊതുജന സമക്ഷത്തില് വന്ന ചില പ്രശ്നങ്ങളില് വ്യക്തത വരുത്തുക എന്നത് ജനാധിപത്യ സംവിധാനത്തില് ജനങ്ങളോട് ഉത്തരവാദിത്തമുള്ള സര്ക്കാരിന്റെ കടമയാണ്. ആ നിലയിലാണ് ഈ കാര്യങ്ങള് ഇവിടെ പറയാന് ആലോചിച്ചതെന്ന് മുഖ്യമന്ത്രി വ്യക്തമാക്കി.
എല് ഡി എഫിന്റെ ഇപ്പോഴത്തെ സര്ക്കാരോ നേരത്തെ ഇടതുപക്ഷം നയിച്ച സര്ക്കാരുകളോ അനധികൃതമായി സര്വകലാശാലകളുടെ പ്രവര്ത്തനത്തില് ഇടപെടാനോ ശ്രമിച്ചിട്ടില്ല എന്ന് ആവര്ത്തിച്ചു വ്യക്തമാക്കുകയാണ്. സര്വകലാശാലകളെ അക്കാദമിക് രംഗത്ത് മികവുറ്റ രീതിയില് നയിക്കാന് നിയുക്തരാകുന്നവരാണ് വൈസ് ചാന്സിലര്മാര്. അവരെ സ്വതന്ത്രവും നീതിപൂര്വ്വകവുമായി ആ ഉത്തരവാദിത്തം നിര്വഹിക്കാന് അനുവദിക്കുക എന്നതാണ് സര്ക്കാരിന്റെ നിലപാട്.
അതില് വെള്ളം ചേര്ക്കാന് കഴിയില്ല. യൂണിവേഴ്സിറ്റിയിലൂടെ ചാന്സിലര് സ്ഥാനം ഞങ്ങളുടെ മോഹമല്ല. അത്തരത്തില് ഒരു നീക്കവും സര്ക്കാര് നടത്തിയിട്ടുമില്ല. ബഹുമാനപ്പെട്ട ഗവര്ണര് തന്നെ ആസ്ഥാനത്ത് തുടരണം എന്നതാണ് സര്ക്കാര് ആഗ്രഹിക്കുന്നത്. മറിച്ചുള്ള നിലപാട് അദ്ദേഹം പിന്വലിക്കും എന്നതാണ് പ്രതീക്ഷിക്കുന്നത്. ചാന്സിലറുടെ അധികാരം നിയമ പ്രകാരമുള്ളതാണ്. അവ കവര്ന്നെടുക്കാന് ശ്രമിച്ചിട്ടില്ല. ശ്രമിക്കുകയുമില്ല എന്ന് ഉറപ്പ് നല്കുകയാണ്. ജനാധിപത്യ സംവിധാനത്തില് ജനങ്ങള്ക്കാണ് പരമാധികാരം. ജനഹിതത്തിനനുസരിച്ചാണ് സര്ക്കാര് പ്രവര്ത്തിക്കുന്നതെന്നും മുഖ്യമന്ത്രി പറഞ്ഞു.
Click it and Unblock the Notifications
Sign in with Google