കേരള പൊലീസ് രാജ്യത്ത് ഒന്നാം സ്ഥാനത്ത്; മൂന്നാം മുറ ഉണ്ടാകരുത്: മുഖ്യമന്ത്രി
തിരുവനന്തപുരം: കേരള പൊലീസ് രാജ്യത്ത് ഒന്നാം സ്ഥാനത്താണെന്ന് മുഖ്യമന്ത്രി പിണറായി വിജയന്. പൊലീസിന്റെ അടിസ്ഥാന സൗകര്യങ്ങള് വലിയ മാറ്റമുണ്ടായിട്ടുണ്ട്. പൊലീസ് സേനയിലെ വിരലില് എണ്ണാവുന്ന ചിലര് നടത്തുന്ന പ്രവര്ത്തികള് സേനക്ക് കളങ്കം വരുത്തുന്നു. ഇവരുടെ പ്രവര്ത്തി മൂലം സേനയ്ക്ക് തലകുനിക്കേണ്ടി വരുന്നെന്നും മുഖ്യമന്ത്രി പറഞ്ഞു. കൊല്ലം റൂറല് എസ് പി ഓഫീസിന്റെ പുതിയ കെട്ടിടം ഉദ്ഘാടനം ചെയ്ത സംസാരിക്കുകയായിരുന്നു അദ്ദേഹം.
തന്നെക്കാള് പ്രാധാന്യത്തോടെ തന്റെ മുന്നിലെത്തുന്ന ആളുകലെ പൊലീസുകാര് കാണുകയും ഇടപെടുകയും വേണമെന്ന് മുഖ്യമന്ത്രി ആവശ്യപ്പെട്ടു. സംസ്ഥാനത്തെ പൊലീസ് സ്റ്റേഷനുകളില് മൂന്നാംമുറ ഉള്പ്പടെയുള്ള പ്രവണതകള് ഉണ്ടാകുന്നില്ല എന്നു ഉറപ്പ് വരുത്തേണ്ടതുണ്ട്. അതിനായി സിസിടിവി ക്യാമറകള് സ്ഥാപിച്ചു വരികയാണെന്നും മുഖ്യമന്ത്രി അറിയിച്ചു.
അതേസമയം, കേരള പൊലീസ് കൈവരിച്ച നേട്ടം എല്ഡിഎഫ് സര്ക്കാരിന്റെ വ്യത്യസ്തവും ജനകീയവുമായ പൊലീസിങ് നയത്തിന്റെ ഭാഗമായാണെന്ന് മുഖ്യമന്ത്രി നേരത്തെ അറിയിച്ചിരുന്നു. കേരള പൊലീസ് നിരന്തരം വിമര്ശനങ്ങള് നേരിടുന്ന സാഹചര്യത്തിലാണ് മുഖ്യമന്ത്രി അന്ന് ഇക്കാര്യം വ്യക്തമാക്കിയത്.
എല്ഡിഎഫ് നയങ്ങളെയും ഖ്യാതിയെയും അട്ടിമറിക്കാന് നടക്കുന്ന ഒറ്റപ്പെട്ട ചില ശ്രമങ്ങളെ അംഗീകരിക്കാനോ സേനയ്ക്കകത്തെ ഒറ്റപ്പെട്ട തെറ്റായ വാസനകളെ അനുവദിച്ചുകൊടുക്കുവാനോ സര്ക്കാര് തയ്യാറല്ല. സംസ്ഥാനത്ത് കഴിഞ്ഞ ആറുവര്ഷക്കാലത്തിനിടയില് ക്രിമിനല് കേസുകളുടെ കാര്യത്തില് വലിയ കുറവാണ് ഉണ്ടായത്. മികച്ച ക്രമസമാധാനം പുലരുന്ന സംസ്ഥാനമായി കേരളം മാറിയത് ഇച്ഛാശക്തിയോടെയുള്ള സര്ക്കാരിന്റെ ഇടപെടല് കൊണ്ടാണ്. കുറ്റാന്വേഷണ മികവില് കേരളാപോലീസ് രാജ്യത്ത് ഒന്നാമതാണ്. കാര്യക്ഷമതയുടെ കാര്യത്തിലും ബഹുദൂരം മുന്നിലാണ്. വര്ഗീയധ്രുവീകരണ ശ്രമങ്ങള് നടന്നപ്പോഴൊക്കെയും മതനിരപേക്ഷതയുയര്ത്തിപ്പിടിച്ചുകൊണ്ട് ഇടപെടാന് പൊലീസിന് കഴിഞ്ഞു. ദുരന്തനിവാരണ-രക്ഷാപ്രവര്ത്തന രംഗത്തും പൊലീസ് ജനങ്ങളോട് കൈകോര്ത്തെന്നും മുഖ്യമന്ത്രി പറഞ്ഞിരുന്നു.
നേട്ടങ്ങളുടെ വലിയ പട്ടികയുള്ളപ്പോഴും പൊലീസിന്റെ യശസ്സിന് ചേരാത്ത ചില സംഭവങ്ങള് ഉണ്ടാകുന്നു എന്നത് ഗൗരവതരമായ വിഷയമാണ്. അത്തരം ഒറ്റപ്പെട്ട കൃത്യങ്ങളിലേര്പ്പെടുന്നവര് കേരള പൊലീസിന് അവമതിപ്പുണ്ടാക്കുകയാണ്. അവരോട് ഒരു ദാക്ഷിണ്യവും കാണിക്കില്ല. കുറ്റമറ്റ അന്വേഷണം ഉറപ്പാക്കും. കുറ്റക്കാരെന്ന് കണ്ടെത്തുന്നവര്ക്ക് സേനയില് സ്ഥാനമുണ്ടാകില്ല. പരമാവധി ശിക്ഷണ നടപടികളുണ്ടാവും. മികച്ച റെക്കോര്ഡുള്ള കേരള പൊലീസിനെ പൊതുജന മധ്യത്തില് തരംതാഴ്ത്തുന്ന ഏത് നീക്കങ്ങളെയും കര്ക്കശമായി നേരിടും. ജനകീയ മുഖവും സ്വഭാവവുമാണ് പൊലീസിന് വേണ്ടത്. അതിനെ അപകീര്ത്തിപ്പെടുത്തുന്ന ശ്രമങ്ങളെ വെച്ചുപൊറുപ്പിക്കില്ല. അതിന് മുതിരുന്നവര്ക്കെതിരെ കര്ശന നടപടി എടുക്കുമെന്നും മുഖ്യമന്ത്രി അന്ന് വ്യക്തമാക്കിയിരുന്നു.
Click it and Unblock the Notifications
Sign in with Google