കണ്ടെയ്ന്മെന്റ് സോണില് കോവിഡ് ഇല്ലാത്ത മുഴുവന് പേര്ക്കും വാക്സിൻ നൽകുമെന്ന് മുഖ്യമന്ത്രി
തിരുവനന്തപുരം: സംസ്ഥാനത്ത് കൊവിഡ് വാക്സിനേഷൻ ഊർജ്ജിതമാക്കുന്നതിന് മുന്നോടിയായി പുതിയ പ്രഖ്യാപനം നടത്തി മുഖ്യമന്ത്രി. കണ്ടെയ്ന്മെന്റ് സോണില് കോവിഡ് ഇല്ലാത്ത മുഴുവന് പേര്ക്കും വാക്സിനേഷന് നല്കുമെന്ന് മുഖ്യമന്ത്രി അറിയിച്ചത്. കൊവിഡ് അവലോകന യോഗത്തിലാണ് ഇക്കാര്യം വ്യക്തമാക്കിയത്. അതേ സമയം തന്നെ കണ്ടെയ്ന്മെന്റ് സോണുകളില് എല്ലാവര്ക്കും പരിശോധന നടത്തുകയും കൊവിഡ് നെഗറ്റീവ് ആയിട്ടുള്ള മുഴുവന് പേരേയും മുന്ഗണന നല്കി വാക്സിനേഷന് പരിഗണിക്കുമെന്നും അദ്ദേഹം വ്യക്തമാക്കി.
വാക്സിനേഷന് യജ്ഞം ദ്രുതഗതിയില് നടപ്പാക്കാന് എല്ലാ ജില്ലകളിലും ഊര്ജ്ജിതമായ പ്രവര്ത്തനം നടത്തണമെന്ന് മുഖ്യമന്ത്രി നിര്ദ്ദേശിച്ചു. അതാത് ജില്ലകള്ക്ക് അനുവദിച്ചിരിക്കുന്ന വാക്സിന് ഡോസുകള് സമയബന്ധിതമായി പൂര്ത്തിയാക്കണമെന്നും വലിപ്പത്തിനനുസരിച്ച് 10 ജില്ലകള് ഒരു ദിവസം 40,000 വാക്സിനേഷനും മറ്റു നാലു ജില്ലകള് 25,000 വാക്സിനേഷനും നല്കണമെന്ന് മുഖ്യമന്ത്രി നിര്ദ്ദേശം നൽകിയിട്ടുണ്ട്.
സംസ്ഥാനത്ത് ആഗസ്റ്റ് 14, 15, 16 തീയതികളില് വാക്സിനേഷന് നടത്തും. അതേ സംസ്ഥാനത്ത് നടത്തുന്ന എല്ലാ പൊതുപരിപാടികള്ക്കും മുന്കൂര് അനുമതി വാങ്ങേണ്ടതാണ്. ഓണ്ലൈന് ക്ലാസ്സുകള്, പരീക്ഷകള്, പ്ലസ് വണ് പ്രവേശനം എന്നിവ ആരംഭിക്കേണ്ടതിനാല് അദ്ധ്യാപകരെ കൊവിഡ് ഡ്യൂട്ടിയില് നിന്നും ഒഴിവാക്കുമെന്നും മുഖ്യമന്ത്രി അറിയിച്ചിട്ടുണ്ട്. സര്ക്കാര് ഓഫീസുകളില് ഓണത്തോടനുബന്ധിച്ച് പൂക്കളമിടുന്നതൊഴികെയുള്ള ആഘോഷപരിപാടികള് ഒഴിവാക്കണമെന്നും നിർദേശം നൽകിയിട്ടുണ്ട്. ഇതിനെല്ലാം പുറമേ വീടുകള്ക്കുള്ളിലെ കൊവിഡ് വ്യാപനം നിയന്ത്രിക്കാനാവശ്യമായ ബോധവല്ക്കരണ പരിപാടികള് ആരോഗ്യ വകുപ്പ് സംഘടിപ്പിക്കണമെന്നും മുഖ്യമന്ത്രി നിർദേശിച്ചു.
സംസ്ഥാനത്ത് ഇന്ന് 20,452 പേര്ക്കാണ് കൊവിഡ് സ്ഥിരീകരിച്ചത്. മലപ്പുറം 3010, കോഴിക്കോട് 2426, എറണാകുളം 2388, തൃശൂര് 2384, പാലക്കാട് 1930, കണ്ണൂര് 1472, കൊല്ലം 1378, തിരുവനന്തപുരം 1070, കോട്ടയം 1032, ആലപ്പുഴ 998, പത്തനംതിട്ട 719, കാസര്ഗോഡ് 600, വയനാട് 547, ഇടുക്കി 498 എന്നിങ്ങനേയാണ് ജില്ലകളില് ഇന്ന് രോഗ ബാധ സ്ഥിരീകരിച്ചത്. കഴിഞ്ഞ 24 മണിക്കൂറിനിടെ 1,42,501 സാമ്പിളുകളാണ് പരിശോധിച്ചത്. കഴിഞ്ഞ ദിവസങ്ങളിലുണ്ടായ 114 മരണങ്ങളാണ് കോവിഡ്-19 മൂലമാണെന്ന് ഇന്ന് സ്ഥിരീകരിച്ചത്. ഇതോടെ ആകെ മരണം 18,394 ആയി.
Click it and Unblock the Notifications
Sign in with Google