അത്ലറ്റിക് ഫെഡറേഷന്റെ ആവശ്യം തള്ളി; ചിത്രയുടെ കോടതിയലക്ഷ്യ ഹര്ജി ഡിവിഷന് ബെഞ്ചിന് വിട്ടു!
കൊച്ചി: പിയു ചിത്രയുടെ അത്ലറ്റിക് ഫെഡറേഷനെതിരായ കോടതിയലക്ഷ്യ ഹര്ജി ഹൈക്കോടതി ഡിവിഷന് ബെഞ്ചിന് വിട്ടു. പിയു ചിത്രയുടെ കോടതിയലക്ഷ്യഹര്ജിയിൽ മറുപടി നല്കാന് അത്ലറ്റിക് ഫെഡറേഷ ന് കൂടുതല് സമയം തേടിയിരുന്നു. എന്നാൽ പ്രഥമദൃഷ്ട്യാ കോടതിയലക്ഷ്യം തെളിഞ്ഞതോടെ ഡിവിഷന് ബെഞ്ചിന് മുമ്പാകെ കേസ് വിടുകയായിരുന്നു. കോടതിയലക്ഷ്യ നടപടികള് ആരംഭിക്കുന്നുവെന്നതിന്റെ സൂചനയാണിത്.
അത്ലറ്റിക് ലോക ചാംമ്പ്യന്ഷിപ്പില് പങ്കെടുപ്പിക്കണമെന്ന ഹൈക്കോടതി ഉത്തരവ് നടപ്പാക്കാത്തതിനെ തുടര്ന്നാണ് ചിത്ര കോടതിയലക്ഷ്യ ഹര്ജി ഫയല് ചെയ്തത്. അത്ലറ്റിക് ഫെഡറേഷനോട് ചിത്രയുടെ പങ്കാളിത്തം ഉറപ്പുവരുത്തണമെന്ന് ഹൈക്കോടതി ഉത്തരവിട്ടിരുന്നു. ഇത് ലംഘിച്ചെന്ന് കാണിച്ചാണ് ചിത്ര കോടതിയലക്ഷ്യം ഫയല് ചെയ്തത്.
സിംഗിള് ബെഞ്ചിന് കോടതിയലക്ഷ്യ കേസുകളില് നടപടിക്ക് സാധിക്കില്ലാത്തതിനാലാണ് ഹൈക്കോടതി ഡിവിഷന് ബെഞ്ചിന് കേസ് വിട്ടത്. കേസില് നടപടികള് വിശദീകരിക്കാന് അത്ലറ്റിക് ഫെഡറേഷനോട് ഹൈക്കോടതി തിങ്കളാഴ്ച ആവശ്യപ്പെട്ടിരുന്നു. സത്യവാങ്മൂലം സമര്പ്പിക്കാന് കൂടുതല് സമയം വേണമെന്ന അത്ലറ്റിക് ഫെഡറേഷന്റെ ആവശ്യം ഹൈക്കോടതി തള്ളുകയായിരുന്നു.