എൽജെഡിയുമായി ലയനത്തിന് തയ്യാറെടുത്ത് ജെഡിഎസ്; ലയനം തദ്ദേശ സ്വയംഭരണ തിരഞ്ഞെടുപ്പിന് മുമ്പ്!
തിരുവനന്തപുരം: എൽജെഡിയുമായി ലയനത്തിന് തയ്യാറെടുത്ത് ജെഡിഎസ്. ഇക്കാര്യത്തില് എല്ജെഡി നേതാവ് എംപി. വീരേന്ദ്രകുമാര് എംപിയുമായി പ്രാഥമിക ചര്ച്ച നടത്തിയെന്ന് ജെഡിഎസ് സംസ്ഥാന അധ്യക്ഷന് സി.കെ.നാണു വാർത്ത സമ്മേളനത്തിൽ വ്യക്തമാക്കി. അടുത്തവര്ഷം നടക്കാനിരിക്കുന്ന തദ്ദേശ സ്വയംഭരണ തിരഞ്ഞെടുപ്പിന് മുമ്പ് ലയനം വേണമെന്നാണ് ജെഡിഎസിന്റെ അഭിപ്രായം.
ലയനവുമായി ബന്ധപ്പെട്ട കാര്യങ്ങള് ചര്ച്ച ചെയ്യാന് എല്ജെഡിയിലും ഉപസമിതി രൂപവത്കരിച്ചിട്ടുണ്ട്. സംസ്ഥാന ജനറല് സെക്രട്ടറി ഷെയ്ഖ് പി ഹാരിസിന്റെ നേതൃത്വത്തിലാണ് ഈ സമിതി. സോഷ്യലിസ്റ്റ് കക്ഷികള് ഒരുമിക്കേണ്ട സമയമാണിത്, ജനതാദള് എന്ന പ്രസ്ഥാനം ഭിന്നിച്ചു പോകാതെ ഒരുമിക്കണമെന്ന് സികെ നാണു പറഞ്ഞു.
ഇരുപാര്ട്ടികള്ക്കും ലയനത്തില് താത്പര്യമുണ്ട്. എല്ലാവരും സന്നദ്ധരായാല് കാര്യങ്ങള് അനുകൂലമാകുമെന്നും സികെ നാണു കൂട്ടിച്ചേർത്തു. ജെഡിഎസ് സംസ്ഥാന സമിതിയിലും ലയനം വേണമെന്ന അഭിപ്രായമുയര്ന്നിരുന്നു. ലയനത്തിന് തടസമില്ലെന്ന് മന്ത്രി കെ.കൃഷ്ണന്കുട്ടിയും പ്രതികരിച്ചു.