നാദാപുരത്ത് ഒരാള്‍ വെട്ടേറ്റു മരിച്ചു, മൂന്നു പേരുടെ നില ഗുരുതരം

Updated: Friday, January 23, 2015, 5:47 [IST]

കോഴിക്കോട്: നാദാപുരത്തെ തൂണേരിയിലെ വെള്ളൂരില്‍ ഇരുവിഭാഗം ആളുകള്‍ തമ്മിലുണ്ടായ ഏറ്റുമുട്ടലില്‍ ഒരാള്‍ മരിച്ചു. മൂന്നു പേരുടെ നില അതീവ ഗുരുതരമാണ്. വെള്ളൂരിലെ പടയംകണ്ടി ഷിബിന്‍(20) ആണ് മരിച്ചത്.

മരിച്ചയാള്‍ ഡിവൈഎഫ്‌ഐ പ്രവര്‍ത്തകനാണെന്നും ഇതിനു പിന്നില്‍ മുസ്ലീം ലീഗ് ആണെന്നും സിപിഎം ആരോപിച്ചു. കൊലപാതകത്തില്‍ പ്രതിഷേധിച്ച് നാദാപുരത്തും സമീപത്തെ ഏഴു പഞ്ചായത്തുകളിലും ഡിവൈഎഫ്‌ഐ ഹര്‍ത്താലിന് ആഹ്വാനം ചെയ്തിട്ടുണ്ട്. കരിയിലാട്ട് രാഗില്‍(20), ഈശ്വരന്‍വലിയത്ത് ലിനീഷ്(24), പുത്തലത്ത് അഖില്‍(24) എന്നിവരെ ഗുരുതരമായ പരിക്കുകളോടെ കോഴിക്കോട് മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചിട്ടുണ്ട്.

വ്യാഴാഴ്ച രാത്രി പത്തുമണിയോടെയാണ് സംഭവം. കൊടിക്കെട്ടുന്നതുസംബന്ധിച്ച തര്‍ക്കമാണ് ഏറ്റുമുട്ടലിലേക്ക് നയിച്ചതെന്നാണ് പ്രാഥമിക വിവരം. ഈ മേഖലയിലെ സിപിഎം-ലീഗ് സംഘടനങ്ങള്‍ക്ക് വര്‍ഗ്ഗീയനിറമുണ്ടാകുന്നുവെന്നതിനാല്‍ പോലിസ് അതീവ ഗൗരവത്തോടെയാണ് ഈ സംഭവത്തെ കാണുന്നത്. പ്രദേശത്ത് കനത്ത സുരക്ഷ ഏര്‍പ്പെടുത്തിയിട്ടുണ്ട്.