നിസാമിനെ പരിചയപ്പെടുത്തിയത് വിവാദ നിര്മാതാവെന്ന് ബ്ലസ്സി
കൊച്ചി: കൊക്കെയ്ന് കേസില് അറസ്റ്റിലായ സഹസംവിധായിക ബ്ലസ്സിയുടെ നിര്ണായക മൊഴി പുറത്ത്. ശോഭാ സിറ്റിയില് സെക്യൂരിറ്റി ജീവനക്കാരനെ കാറിടിച്ച് കൊല്ലാന് ശ്രമിച്ച നിസാമിനെ വിവാദ സിനിമ നിര്മാതാവാണ് പരിചയപ്പെടുത്തിയതെന്നാണ് മൊഴി.
ഏഷ്യാനെറ്റ് ന്യൂസ് ആണ് വാര്ത്ത പുറത്ത് വിട്ടത്. നിര്മാതാവ് നടത്തിയ പാര്ട്ടിയില് വച്ചാണത്രെ ബ്ലസ്സി നിസാമിനെ പരിചയപ്പെട്ടത്. നിസാമിന്റെ ഫ്ലാറ്റ് വാടകക്കെടുത്തതല്ലെന്നും ബ്ലസ്സി മൊഴി നല്കിയതായാണ് വാര്ത്തകള്.
നിസാമിന്റെ ഫ്ലാറ്റില് വച്ച് സ്മോക് പാര്ട്ടികള് നടത്തിയിരുന്നതായും ബ്ലസ്സി മൊഴിനല്കിയിട്ടുണ്ടെന്നാണ് വിവരം. പലപ്പോഴും വിവാദ സിനിമ നിര്മാതാവും പാര്ട്ടികളില് പങ്കെടുത്തിട്ടുണ്ടെന്നാണ് ബ്ലസ്സി മൊഴി നല്കിയിട്ടുള്ളത്. ഗോവയില് നിന്ന് ഫ്രാങ്കി എന്നയാളില് നിന്നാണ് കൊക്കെയ്ന് ലഭിച്ചതെന്ന് നേരത്തെ മൊഴി നല്കിയിരുന്നു. എന്നാല് ഈ വ്യക്തി തന്റെ സുഹൃത്തല്ലെന്നും ബ്ലസ്സി മൊഴി നല്കിയിട്ടുണ്ടത്രെ.
കേസിലെ അഞ്ച് പ്രതികളേയും പോലീസ് നാല് ദിവസത്തേക്ക് കസ്റ്റഡിയില് വാങ്ങിയിട്ടുണ്ട്. ഒന്നാം പ്രതി രേഷ്മ രംഗസ്വാമിയേയും രണ്ടാം പ്രതി ബ്ലസ്സിയേയും ഗോവയില് കൊണ്ടുപോയി തെളിവെടുപ്പ് നടത്താന് പോലീസ് തീരുമാനിച്ചിട്ടുണ്ട്.
നിസാമിനെ കസ്റ്റഡിയില് വാങ്ങിയ പോലീസ് തെളിവെടുപ്പിനായി ബംഗളൂരുവിലേക്ക കൊണ്ടുപോയി. ബംഗളൂരുവിലെ നിസാമിന്റെ ഫ്ലാറ്റിലും പോലീസ് തെളിവെടുപ്പ് നടത്തുന്നുണ്ട്.