ജസ്റ്റിസ് ഫോര്‍ കെ സുരേന്ദ്രന്‍ പരിപാടിയില്‍ കോണ്‍ഗ്രസ് നേതാവ്: പ്രതിഷേധവുമായി പ്രവര്‍ത്തകര്‍

കോഴിക്കോട്: റിമാന്റില്‍ കഴിയുന്ന ബിജെപി സംസ്ഥാന ജനറല്‍ സെക്രട്ടറി കെ സുരേന്ദ്രന് നീതി ലഭ്യമാക്കണമെന്ന് ആവശ്യപ്പെട്ട് സംഘടിപ്പിച്ച പരിപാടിയില്‍ കോണ്‍ഗ്രസ് നേതാവ് പങ്കെടുത്തത് വിവാദമാവുന്നു. സുരേന്ദ്രന്‍ അനുകൂലികള്‍ തിങ്കളാഴ്ച്ച വൈകീട്ട് കോഴിക്കോട് നടത്തിയ ജസ്റ്റിസ് ഫോര്‍ കെ സുരേന്ദ്രന്‍ എന്നപരിപാടിയിലാണ് കോണ്‍ഗ്രസ് നേതാവും കെപിസിസി നിര്‍വ്വാഹക സമിതി അംഗവുമായ പിഎം നിയാസ് പങ്കെടുത്തത്.

കോഴിക്കോട്ടെ പ്രമുഖ ആര്‍എസ്എസ് ബിജെപി നേതാക്കളൊന്നും പങ്കെടുക്കാതിരുന്ന പരിപാടിയിലാണ് കോണ്‍ഗ്രസ് നേതാവ് പങ്കെടുത്തത്. സുരേന്ദ്രനെതിരെ നടക്കുന്നത് സമാനതകളില്ലാത്ത സംഭവമാണെന്നായിരുന്നു പരിപാടിയില്‍ പങ്കെടുത്തുകൊണ്ട് നിയാസ് പറഞ്ഞത്. ഇതുപോലൊരു നെറികേട് ഒരു നേതാവിനോടും ഒരു രാഷ്ട്രീയ പാര്‍ട്ടിയും ഇതുവരെ ചെയ്തിട്ടില്ല.

കെ സുരേന്ദ്രനെ എന്നെന്നേക്കുമായി കാരാഗൃഹത്തില്‍ അടക്കാമെന്ന് പിണറായി കരുതേണ്ടെന്നും പി നിയാസ് കൂട്ടിച്ചേര്‍ത്തു. കെ സുരേന്ദ്രന് വേണ്ടി സംഘടിപ്പിച്ച പരിപാടിയില്‍ നിയാസ് പങ്കെടുത്തതിനെതിരെ പാര്‍ട്ടിപ്രവര്‍ത്തകരില്‍ ശക്തമായ പ്രതിഷേധമാണ് ഉയരുന്നത്. എസ്എന്‍ഡിപി യൂണിയന്‍ കോഴിക്കോട് താലൂക്ക് സെക്രട്ടറി സി സുധൂഷായിരുന്നു പരിപാടിയുടെ മുഖ്യസംഘാടകന്‍

English summary

കോഴിക്കോട്ടെ പ്രമുഖ ആര്‍എസ്എസ് ബിജെപി നേതാക്കളൊന്നും പങ്കെടുക്കാതിരുന്ന പരിപാടിയിലാണ് കോണ്‍ഗ്രസ് നേതാവ് പങ്കെടുത്തത്. സുരേന്ദ്രനെതിരെ നടക്കുന്നത് സമാനതകളില്ലാത്ത സംഭവമാണെന്നായിരുന്നു പരിപാടിയില്‍ പങ്കെടുത്തുകൊണ്ട് നിയാസ് പറഞ്ഞത്. ഇതുപോലൊരു നെറികേട് ഒരു നേതാവിനോടും ഒരു രാഷ്ട്രീയ പാര്‍ട്ടിയും ഇതുവരെ ചെയ്തിട്ടില്ല.