രാഷ്ട്രീയം പ്രസംഗിക്കാത്ത സുധീരന്റെ യാത്ര വെജിറ്റേറിയന്‍ യാത്ര

തിരുവനന്തപുരം: കെപിസിസി പ്രസിഡന്റ് വി.എം സുധീരന്റെ ജനപക്ഷ യാത്രയ്ക്ക് വിവാദങ്ങള്‍ ഒഴിഞ്ഞിട്ട് നേരമില്ല. എല്ലാ രാഷ്ട്രീയ നേതാക്കളും ഇതിനോടകം രംഗത്തു വന്നു. അവസാനം കെ.മുരളീധരനും മിണ്ടാതിരുന്നില്ല. സുധീരന്റെ യാത്രയില്‍ രാഷ്ട്രീയ പ്രസംഗം ഇല്ലെന്നതാണ് പുള്ളിക്കാരന്റെ പ്രശ്‌നം. രാഷ്ട്രീയ പ്രസംഗം ഇല്ലാത്ത ജനപക്ഷയാത്ര വെറും വെജിറ്റേറിയന്‍ യാത്ര ആണെന്നാണ് നമ്മുടെ എംഎല്‍എ പറഞ്ഞിരിക്കുന്നത്.

സുധീരന്‍ പ്രസംഗിക്കുന്നത് വെറും പച്ചക്കറി കൃഷിയെക്കുറിച്ചും മാലിന്യ സംസ്‌ക്കരണത്തെ കുറിച്ചുമാണ്. ഇതില്‍ തനിക്ക് നിരാശ ഉണ്ടെന്നാണ് മുരളീധരന്‍ പറഞ്ഞിരിക്കുന്നത്. രാഷ്ട്രീയം പറയാത്ത യാത്രയെ കൊണ്ട പാര്‍ട്ടിക്ക് ഒരു ഗുണവും ഇല്ലെന്ന് തുറന്നടിച്ചിരിക്കുകയാണ് അദ്ദേഹം.

മുഖ്യമന്ത്രി ഉമ്മന്‍ചാണ്ടിയും സുധീരനും തമ്മില്‍ മാനസിക പൊരുത്തം ഇല്ല. ഇത് സര്‍ക്കാരിന്റെ പ്രവര്‍ത്തനത്തെ കാര്യമായി ബാധിക്കുന്നുണ്ടെന്നും മുരളീധരന്‍ പറഞ്ഞു. ഇപ്പോഴത്തെ പ്രശ്‌നങ്ങള്‍ പരിഹരിച്ചിട്ട് മതി സുധീരന്റെ യാത്ര എന്നും അദ്ദേഹം പറഞ്ഞു.

ജനപക്ഷ യാത്രയെ തകര്‍ക്കാന്‍ ഗൂഢാലോചന നടക്കുന്നതായി സുധീരന്‍ ആരോപിച്ചിരുന്നു. എന്തായാലും സുധീരന്റെ യാത്രയോട് എല്ലാവര്‍ക്കും അസൂയയും എതിര്‍പ്പും ഉണ്ട്. പാവം സുധീരന്‍ ഒരു യാത്ര കൊണ്ട് ഇത്ര അധികം പൊല്ലാപ്പുണ്ടാകുമെന്ന് കരുതി കാണില്ല.

English summary

K Muraleedharan against Sudheeran. he said that Janapaksha yathra has been just vegetarian yathra.