മുഖ്യമന്ത്രിക്കെതിരെ പ്രതിഷേധം കനക്കുന്നു; ബുധനാഴ്ച കോണ്ഗ്രസിന്റെ കരിദിനം, രാജി ആവശ്യം
തിരുവനന്തപുരം: സ്വര്ണക്കടത്ത് കേസ് പ്രതി സ്വപ്ന സുരേഷ് മുഖ്യമന്ത്രി പിണറായി വിജയനെതിരെ നടത്തിയ വെളിപ്പെടുത്തലിന്റെ പശ്ചാത്തലത്തില് മുഖ്യമന്ത്രി രാജിവെയ്ക്കണമെന്ന് ആവശ്യപ്പെട്ട് സംസ്ഥാനവ്യാപകമായി പ്രതിഷേധ സമരത്തിനൊരുങ്ങി കോണ്ഗ്രസ്. ജൂണ് എട്ടിന് വൈകുന്നേകം കോണ്ഗ്രസ് മണ്ഡലം കമ്മിറ്റികളുടെ നേതൃത്വത്തില് കരിദിനം ആചരിക്കാനാണ് തീരുമാനം. കോണ്ഗ്രസ് പ്രവര്ത്തകര് വായ് മൂടിക്കെട്ടിപ്രകടനം നടത്തി കരിദിനം ആചരിക്കുമെന്ന് കെപിസിസി ജനറല് സെക്രട്ടറി ടി യു രാധാകൃഷ്ണന് അറിയിച്ചു.
ഇതേ ആവശ്യം ഉന്നയിച്ച് ജൂണ് 10 വെള്ളിയാഴ്ച ജില്ലാ കോണ്ഗ്രസ് കമ്മിറ്റികളുടെ നേതൃത്വത്തില് കളക്ടേറ്റ് മാര്ച്ച് നടത്തും. ഇന്ത്യയുടെ ചരിത്രത്തിലാദ്യമായാണ് സ്വര്ണ്ണകള്ളക്കടത്ത് കേസില് ഒരു മുഖ്യമന്ത്രിക്ക് പങ്കുണ്ടാകുന്നതെന്നും ഇത് ജനാധിപത്യത്തിന് തന്നെ അപമാനമാണെന്നും രാധാകൃഷ്ണന് പറഞ്ഞു.
അതേസമയം, സ്വപ്ന സുരേഷ് ഞെട്ടിക്കുന്ന വെളിപ്പെടുത്തല് നടത്തിയ സാഹചര്യത്തില് മുഖ്യമന്ത്രിക്ക് ആ കസേരയില് തുടരാന് അര്ഹതയും യോഗ്യതയുമില്ലെന്ന് പ്രതിപക്ഷ നേതാവ് വി ഡി സതീശന് മാധ്യമങ്ങളോട് പറഞ്ഞു. കസ്റ്റംസിന് സ്വപ്ന നല്കിയതും കോടതിയില് നല്കിയതും ഒരേ മൊഴികളാണ്. കസ്റ്റംസിന് മൊഴി നല്കിയതിന് പിന്നാലെയാണ് കേന്ദ്ര ഏജന്സികള് നടത്തിക്കൊണ്ടിരുന്ന അന്വേഷണം നിലച്ചതെന്നും പ്രതിപക്ഷ നേതാവ് വ്യക്തമാക്കി.
സി.പി.എം- ബി.ജെ.പി അവിശുദ്ധബന്ധത്തിന്റെ ഭാഗമായാണ് അന്വേഷണം എങ്ങുമെത്താതെ പോയത്. സ്വപ്ന സുരേഷിന്റെ പുതിയ വെളിപ്പെടുത്തലിന്റെ പശ്ചാത്തലത്തില് കോടതിയുടെ മേല്നോട്ടത്തിലുള്ള അന്വേഷണമാണ് നടത്തേണ്ടത്. ഇക്കാര്യത്തില് മുഖ്യമന്ത്രി പ്രതികരിച്ചേ മതിയാകൂ. പാര്ട്ടി സെക്രട്ടറിയുടെ വിശദീകരണം കൊണ്ട് കാര്യമില്ല. യു.ഡി.എഫ് ഉന്നയിച്ച വിഷയങ്ങള് ഇപ്പോള് ശരിയാണെന്ന് വ്യക്തമായിരിക്കുകയാണ.് കുറ്റസമ്മത മൊഴി ഉള്പ്പെടെ ഞെട്ടിക്കുന്ന വിവരങ്ങള് കൈയ്യിലുള്ളപ്പോള് അന്വേഷണ ഏജന്സികള് എങ്ങനെയാണ് ഒരു സുപ്രഭാതത്തില് അന്വേഷണം അവസാനിപ്പിച്ച് ഏതാനും പേരെ പ്രതികളാക്കി കുറ്റപത്രം സമര്പ്പിച്ചതെന്ന ചോദ്യം പ്രതിപക്ഷം നിരവധി തവണ ഉന്നയിച്ചതാണെന്നും വി ഡി സതീശന് അറിയിച്ചു.
അതേസമയം, സ്വപ്ന സുരേഷിന്റെ വെളിപ്പെടുത്തലിന്റെ പശ്ചാത്തലത്തില് യൂത്ത് കോണ്ഗ്രസ് പ്രവര്ത്തകര് മുഖ്യമന്ത്രിക്കെതിരെ സെക്രട്ടറിയേറ്റിന് മുന്നില് പ്രതിഷേധിച്ചു. കോണ്ഗ്രസ് പ്രവര്ത്തകര് മുഖ്യമന്ത്രിയുടെ കോലം കത്തിച്ചു. പൊലീസും പ്രവര്ത്തകരും തമ്മില് ഉന്തും തള്ളമുണ്ടായി. പൊലീസ് ആറ് തവണയാണ് ജലഭീരങ്കി ഉപയോഗിച്ചത്. കണ്ണൂര് കളക്ട്രേറ്റിന് മുന്നില് നടത്തിയ യൂത്ത് കോണ്ഗ്രസ് മാര്ച്ചിലും പൊലീസ് ജലപീരങ്കി പ്രയോഗിച്ചു.
ഇതിനിടെ ആരോപണങ്ങള് നിഷേധിച്ച് മുഖ്യമന്ത്രി പിണറായി വിജയന് രംഗത്തെത്തി. സ്വര്ണ്ണക്കടത്ത് പുറത്തുവന്ന അവസരത്തില് തന്നെ ഏകോപിതവും കാര്യക്ഷമവുമായ അന്വേഷണം വേണമെന്ന് കേന്ദ്ര സര്ക്കാരിനോട് ആദ്യം ആവശ്യപ്പെട്ടത് സംസ്ഥാന സര്ക്കാരാണെന്ന് മുഖ്യമന്ത്രി പറഞ്ഞു. പിന്നീട് അന്വേഷണ രീതികളെപ്പറ്റിയുണ്ടായ ന്യായമായ ആശങ്കകള് യഥാസമയം ചൂണ്ടിക്കാണിച്ചിട്ടുമുണ്ട്.
രാജ്യത്തിന്റെ സമ്പദ്ഘടനയെ തകര്ക്കുന്ന സാമ്പത്തിക കുറ്റകൃത്യങ്ങളുടെ സ്രോതസ് മുതല് അവസാന ഭാഗം വരെയുള്ള കാര്യങ്ങള് അന്വേഷിച്ച് കണ്ടെത്തണമെന്ന കാര്യത്തില് ഒരു വിട്ടുവീഴ്ചയും പാടില്ല എന്ന് നിര്ബന്ധമുള്ള ഞങ്ങള്ക്കെതിരെ സങ്കുചിത രാഷ്ട്രീയ കാരണങ്ങളാല് ചില കോണുകളില് നിന്നും അടിസ്ഥാനരഹിതമായ ആരോപണങ്ങള് മാധ്യമങ്ങളിലൂടെ വീണ്ടും വീണ്ടും ഉന്നയിക്കപ്പെട്ടിട്ടുണ്ട്. ഇത് ചില രാഷ്ട്രീയ അജണ്ടകളുടെ ഭാഗമാണ്. ഇത്തരം അജണ്ടകള് ജനങ്ങള് തള്ളിക്കളഞ്ഞതാണ്. ഒരു ഇടവേളയ്ക്കുശേഷം പഴയ കാര്യങ്ങള് തന്നെ കേസില് പ്രതിയായ വ്യക്തിയെക്കൊണ്ട് വീണ്ടും പറയിക്കുകയാണ്. ഇതില് വസ്തുതകളുടെ തരിമ്പുപോലുമില്ലെന്ന് മുഖ്യമന്ത്രി പറഞ്ഞു.
Click it and Unblock the Notifications
Sign in with Google