പേയാട് റേഷന് കടത്തി: ലൈസൻസ് സസ്പെന്റ് ചെയ്തു
മലയിൻകീഴ് : പേയാട് അമ്പംകോട് റോഡിൽ എൽ.പി.സ്കൂളിന് സമീപത്തുള്ള റേഷൻ കടയിൽ നിന്ന് അരി കടത്തിയത് ഡി.വൈ എഫ്.ഐ. പ്രവർത്തകർ പിടികൂടി അധികൃതരെ വിവരമറിയിച്ചു.ഇരുചക്രവാഹനത്തിൽ അരി കടത്തുന്നെന്ന പരാതി നേരത്തെ ഉയർന്നിരുന്നു.ചൊവ്വാഴ്ച്ച രാത്രി 9.30 മണിയോടെ സ്കൂട്ടറിൽ പച്ചരി നിറച്ച ചാക്കുമായി റേഷൻ കടയിൽ നിന്നിറങ്ങിയ സമീപത്തെ ഫ്ളവർ മിൽ ഉടമയെ ഡി. വൈ.എഫ്.ഐ.ബ്ലോക്ക് ട്രഷറർ അനൂപ് ചന്ദ്രനും പ്രവർത്തകരുമാണ് തടഞ്ഞ് വച്ചത്.
വിളപ്പിൽശാല എസ്.ഐ. കണ്ണന്റെ നേതൃത്വത്തിൽ പൊലീസെത്തി വിശദമായി പരിശോധിച്ച് ക്രമക്കേട് കണ്ടെത്തിയതിനെ തുടർന്ന് താലൂക്ക് സപ്ലേ ഓഫീസറേയും റേഷനിംഗ് ഇൻസ്പെക്ടറെയും വിവരമറിയിച്ചു.കാട്ടാക്കട താലൂക്ക് ഓഫീസർ ഗോപകുമാറും മലയിൻകീഴ് ഫർക്ക റേഷനിംഗ് ഇൻസ്പെക്ടർ സുധയും ചേർന്ന് റേഷൻ കടയിലെ സ്റ്റോക്കുകൾ വിശദമായി പരിശോധിച്ചപ്പോൾ റേഷൻ കടയിൽ വ്യാപക ക്രമക്കേട് കണ്ടെത്തിയിരുന്നു.
തുടർന്ന് ഇന്നലെ റേഷൻ കട ഉടമ ജനനിയുടെ ലൈസൻസ് സസ്പെൻറ് ചെയ്യുകയും പൊതുജനങ്ങൾക്ക് ബുദ്ധിമുട്ടുണ്ടാകാതിരിക്കാൻ അടുത്തുള്ള റേഷൻ കടയുടമ സുഭാഷിനെ ചുമതലയേൽപ്പിച്ചു.ഇന്ന് റേഷൻകട തുറക്കാനുള്ള സംവിധാനമുണ്ടാക്കുമെന്നും കാട്ടാക്കട സപ്ലേ ഓഫീസർ ഗോപകുമാർ പറഞ്ഞു .