ശോഭ സുരേന്ദ്രനെതിരെ മാനനഷ്ട കേസെടുക്കാൻ കോടതി ഉത്തരവ്; നടപടി കെസി വേണു​ഗോപാൽ നൽകിയ ഹർജിയിൽ

ആലപ്പുഴ: ബി ജെ പി നേതാവ് ശോഭ സുരേന്ദ്രന് എതിരെ മാനനഷ്ട കേസെടുക്കാൻ കോടതി ഉത്തരവ്. ആലപ്പുഴ ഒന്നാം ക്ലാസ് മജിസ്ട്രേറ്റ് ഷാനാ ബീ​ഗമാണ് ഉത്തരവിട്ടത്. എ ഐ സി സി ജനറൽ സെക്രട്ടറിയും ആലപ്പുഴ എം പിയുമായ കെ സി വേണു​ഗോപാൽ നൽകിയ ഹർജിയിലാണ് നടപടി. ലോക്സഭാ തിരഞ്ഞെടുപ്പ് സമയത്ത് ശോഭാ സുരേന്ദ്രൻ ഉന്നയിച്ച ആരോപണങ്ങക്കെതിരെയാണ് കെ സി വേണു ​ഗോപാൽ കോടതിയെ സമീപിച്ചത്.

വ്യക്തിഹത്യ നടത്താനും ആശയക്കുഴപ്പം സൃഷ്ടിക്കാനും ബോധപൂർവ്വം നടത്തിയ ആരോപണങ്ങൾ പിൻവലിച്ച് മാപ്പ് പറയണമെന്ന് ആവശ്യപ്പെട്ട് കെ സി വേണു ​ഗോപാൽ നേരത്തെ വക്കീൽ നോട്ടീസ് അയച്ചിരുന്നു. എന്നാൽ നിശ്ചിത സമയപരിധി കഴിഞ്ഞിട്ടും മാപ്പ് പറയാൻ ശോഭാ സുരേന്ദ്രൻ തയ്യാറകാതെ വന്നതോടെയാണ് ആലപ്പുഴ ഒന്നാം ക്ലാസ് മജിസ്ട്രേറ്റ് കോടതിയിൽ വേണു​ഗോപാൽ ഹർജി ഫയൽ ചെയ്തത്.

ആലപ്പുഴ സൗത്ത് പോലീസ് സ്റ്റേഷനിലും കെ സി വേണു​ഗോപാൽ പരാതി നൽകിയിരുന്നു. ഹർജിക്കാരനായ വേണു​ഗോപാൽ കോടതിയിൽ നേരിട്ടെത്തി മൊഴിയും നൽകിയിരുന്നു. 2024 ലോക്സഭാ തിരഞ്ഞെടുപ്പിൽ ആലപ്പുഴ മണ്ഡലത്തിവ്‍ കെ സി വേണു​ഗോപാലിനെതിരെ ബി ജെ പി സ്ഥാനാർത്ഥിയായി മത്സരിച്ചത് ശോഭാ സുരേന്ദ്രനായിരുന്നു.

കരിമണൽ ഖനനവുമായി ബന്ധപ്പെട്ടാണ് ശോഭാ സുരേന്ദ്രൻ വേണു​ഗോപാലിനെതിരെ ആരോപണം ഉന്നയിച്ചത്. രാജസ്ഥാനിലെ മുൻ ഖനന വകുപ്പ് മന്ത്രി കിഷോറാം ഓലയുടെ സഹായത്തോടെ കേരളത്തിലെ ധാതുക്കളെല്ലാം കവർന്നെടുത്ത് വേണു​ഗോപാൽ കോടികൾ ഉണ്ടാക്കിയെന്നായിരുന്നു ശോഭ ആരോപിച്ചത്.

കിഷോറാം ഓലയും കെ സി വേണു​ഗോപാലും ചേർന്ന് രാജ്യാന്തര തലത്തിൽ പല തരത്തിലുമുള്ള ഇടപാടുകൾ നടത്തിയിട്ടുണ്ട്. കിഷോറാം ഓലയുടെ കുടുംബവുമായി ചേർന്ന് ഇപ്പോഴും ബെനാമി പേരിൽ വേണു ​ഗോപാൽ ആയിരക്കണക്കിന് കോടികൾ സമ്പാദിക്കുന്നുണ്ട്.
അതിലുൾപ്പെട്ട ഒരു ചെറിയ ആളാണ് ആലപ്പുഴയിലെ കരിമണൽ കർത്ത എന്നും കെ സി വേണു​ഗോപാൽ പറഞ്ഞിട്ട് കിഷോറാം ഓലയാണ് ആലപ്പുഴയിൽ നിന്ന് കരിമണൽ കയറ്റുമതിക്കുള്ള അനുവാദം കർത്തയ്ക്ക് കൊടുത്തതെന്നും ശോഭ ആരോപിച്ചിരുന്നു.