കൊവിഡ് പടരുന്നു, രക്ഷാപ്രവര്ത്തനത്തിനിറങ്ങുക; പാര്ട്ടി പ്രവര്ത്തകരോട് കോടിയേരി
തിരുവനന്തപുരം: കൊവിഡ് മൂന്നാം തരംഗത്തില് പശ്ചാത്തലത്തില് പാര്ട്ടി പ്രവര്ത്തകരോട് രക്ഷാപ്രവര്ത്തനത്തിനിറങ്ങാന് സി പി ഐ എം സംസ്ഥാന സെക്രട്ടറി കോടിയേരി ബാലകൃഷ്ണന്.ദുരിതം നേരിടുന്നവരെ സഹായിക്കാന് എല്ലാ പാര്ട്ടി ഘടകങ്ങളും പ്രവര്ത്തകരും ബഹുജന സംഘടനകളും സജീവമായി രംഗത്ത് വരണമെന്ന് കോടിയേരി ആഹ്വാനം ചെയ്തു. ലോകവും രാജ്യവും മഹാമാരിയുടെ പുതിയ തരംഗത്തിലാണ് എന്നതിനാലും ഒറ്റപ്പെട്ട തുരുത്തല്ല കേരളം എന്നതിനാലും ഇവിടെയും രോഗബാധിതരുടെ എണ്ണം കുതിച്ചുയരുകയാണ്.
ഇതിനെ നേരിടാനും ജനങ്ങളെ സഹായിക്കാനും സംസ്ഥാന സര്ക്കാര് യുദ്ധകാലാടിസ്ഥാനത്തില് നടപടികള് ഇതിനകം സ്വീകരിച്ചിട്ടുണ്ട്. കാര്യങ്ങള് ദൈനംദിനം അവലോകനം ചെയ്ത് സമയബന്ധിതമായി ഭരണ സംവിധാനങ്ങളെ സര്ക്കാര് ചലിപ്പിക്കുന്നുണ്ടെന്നും കോടിയേരി പ്രസ്താവനയില് പറഞ്ഞു. ഈ ഘട്ടത്തില് തദ്ദേശ ഭരണ സ്ഥാപനങ്ങളും കൂടുതല് സജീവമായി രംഗത്ത് വന്നുകൊണ്ടിരിക്കുകയാണ്. പക്ഷേ മഹാമാരി പോലുള്ള ദുരന്തം നാട് നേരിടുമ്പോള് അതിനെ ചെറുക്കാന് ജനകീയ പ്രസ്ഥാനങ്ങളും സന്നദ്ധ സംഘടനകളും കൂടുതല് ഉണര്ന്ന് പ്രവര്ത്തിക്കേണ്ടതുണ്ടെന്ന് അദ്ദേഹം വ്യക്തമാക്കി.
മുഖ്യമന്ത്രി സ്ഥാനാര്ത്ഥി താന് തന്നെയെന്ന സൂചനയുമായി പ്രിയങ്ക ഗാന്ധി; ആവേശത്തില് കോണ്ഗ്രസ്
ഒന്നും രണ്ടും തരംഗങ്ങളില് എന്നപോലെ ഇന്നത്തെ ഘട്ടത്തിലും സി പി ഐ എം പ്രവര്ത്തകരും അനുഭാവികളും ബഹുജന സംഘടനകളും മാതൃകാപരമായി ഇടപെടണമെന്നും അദ്ദേഹം അഭ്യര്ത്ഥിച്ചു. ഡെല്റ്റ , ഒമിക്രോണ് വകഭേദങ്ങള് ഒന്നിച്ച് ഇവിടെ പടരുകയാണെന്ന് കോടിയേരി ഓര്മപ്പെടുത്തി. ഒമിക്രോണ് തീവ്രത കുറഞ്ഞ ഇനമാണെന്ന ധാരണയില് നിസാരതയോടുള്ള സമീപനം കാട്ടുന്നത് ആപത്താണെന്നും അദ്ദേഹം പറഞ്ഞു. വ്യാപന ശേഷി കൂടിയ വകഭേദം ആയതിനാല് ആരോഗ്യ വകുപ്പിന്റെയും സര്ക്കാരിന്റെയും നിര്ദ്ദേശങ്ങള് പാലിക്കാന് എല്ലാവരും ജാഗ്രത കാട്ടണം. വാക്സിന് സ്വീകരിച്ചവര്ക്ക് രോഗം പൊതുവില് തീവ്രമല്ല. ജനസംഖ്യാനുപാതികമായി ഇന്ത്യയില് ഏറ്റവും കൂടുതല് പേര്ക്ക് വാക്സിന് നല്കിയത് കേരളമാണെന്നും കോടിയേരി പറഞ്ഞു.
കുട്ടികള്ക്ക് വാക്സിന് നല്കുന്നതിന് പ്രത്യേക സംവിധാനം വിദ്യാലയങ്ങളില് തന്നെ ഇതിനകം ഒരുക്കി സംസ്ഥാനം ദേശീയമായി തന്നെ മാതൃകയായിരിക്കുകയാണ്. ഇപ്രകാരമുള്ള നടപടികളെല്ലാം കേരളം സ്വീകരിച്ചിട്ടുണ്ടെങ്കിലും രോഗവ്യാപനം രൂക്ഷമാണ്. ഈ സ്ഥിതി നേരിടുന്നതിനുള്ള സംസ്ഥാന സര്ക്കാരിന്റെയും തദ്ദേശ ഭരണ സ്ഥാപനങ്ങളുടെയും പ്രവര്ത്തനങ്ങളെ എല്ലാ വിഭാഗം ജനങ്ങളും പിന്തുണയ്ക്കണമെന്ന് അദ്ദേഹം ആവശ്യപ്പെട്ടു. ദുരിതാശ്വാസ പ്രവര്ത്തനത്തില് എല്ലാ തലങ്ങളിലുമുള്ള പാര്ടി ഘടകങ്ങള് അടിയന്തരമായി ഇടപെടണം. ലോക്കല് അടിസ്ഥാനത്തില് ഹെല്പ്പ് ഡെസ്ക് ആരംഭിക്കണം.
ബ്രാഞ്ചുകള് പ്രവര്ത്തനങ്ങളില് സജീവമാകണം. ദുരിതമനുഭവിക്കുന്നവര്ക്ക് ഭക്ഷണം, മരുന്ന് തുടങ്ങിയവ എത്തിക്കാനും സാധ്യമായ ഇടങ്ങളില് ആംബുലന്സ് സേവനം നല്കാനും കഴിയണമെന്ന് അദ്ദേഹം നിര്ദേശിച്ചു. ഓക്സിമീറ്റര്, മാസ്ക്ക് തുടങ്ങിയവ എത്തിക്കാന് കഴിയുന്ന തലങ്ങളില് അത് ചെയ്യണം. അവശ്യസേവനത്തിന് കൈയ്യെത്തും ദൂരത്ത് സി പി ഐ എമ്മിന്റെയും ബഹുജന സംഘടനകളുടെയും പ്രവര്ത്തകര് ഉണ്ടാകണമെന്നും പ്രസ്താവനയില് കോടിയേരി പറഞ്ഞു.
സംസ്ഥാനത്ത് ഒരിടവേളയ്ക്ക് ശേഷം പ്രതിദിന കൊവിഡ് ബാധിതരുടെ എണ്ണം 40000 കടന്നിരിക്കുകയാണ്. വ്യാഴാഴ്ച മാത്രം 46,387 പേര്ക്കാണ് കൊവിഡ് സ്ഥിരീകരിച്ചത്. തിരുവനന്തപുരം 9720, എറണാകുളം 9605, കോഴിക്കോട് 4016, തൃശൂര് 3627, കോട്ടയം 3091, കൊല്ലം 3002, പാലക്കാട് 2268, മലപ്പുറം 2259, കണ്ണൂര് 1973, ആലപ്പുഴ 1926, പത്തനംതിട്ട 1497, ഇടുക്കി 1441, കാസര്ഗോഡ് 1135, വയനാട് 827 എന്നിങ്ങനേയാണ് ജില്ലകളില് രോഗ ബാധ സ്ഥിരീകരിച്ചിരിക്കുന്നത്.
Recommended Video
ഒമിക്രോണ് വ്യാപനവും സംസ്ഥാനത്ത് രൂക്ഷമാണ്. കഴിഞ്ഞ ദിവസം സംസ്ഥാനത്ത് 62 പേര്ക്ക് കൂടി ഒമിക്രോണ് സ്ഥിരീകരിച്ചു. തൃശൂര് 14, കണ്ണൂര് 11, പത്തനംതിട്ട 9, എറണാകുളം 8, കോഴിക്കോട്, തിരുവനന്തപുരം 5 വീതം, കൊല്ലം, ആലപ്പുഴ, പാലക്കാട്, കാസര്ഗോഡ് 2 വീതം, ഇടുക്കി 1, എന്നിങ്ങനെയാണ് ഒമിക്രോണ് സ്ഥിരീകരിച്ചത്. ഇതോടെ സംസ്ഥാനത്ത് ആകെ 707 പേര്ക്കാണ് ഒമിക്രോണ് സ്ഥിരീകരിച്ചത്.