സിപിഎം ശ്രീനാരായണ ഗുരുവിനെ കുരിശില്‍ തറിച്ചു, പ്രതിഷേധം ശക്തമാകുന്നു

By Sruthi K M

Updated: Monday, September 7, 2015, 14:14 [IST]

കണ്ണൂര്‍: സിപിഐഎം ശ്രീനാരായണ ഗുരുവിനെ കുരിശില്‍ തറിച്ച് പരസ്യമായി അപമാനിച്ചതില്‍ പ്രതിഷേധം ശക്തമാകുന്നു. കണ്ണൂര്‍ ജില്ലയില്‍ ശനിയാഴ്ച്ചയായിരുന്നു ഇങ്ങനെയൊരു കാഴ്ച കണ്ടത്. കണ്ണൂരില്‍ നടന്ന ശ്രീകൃഷ്ണ ജയന്തി ഘോഷയാത്രയിലാണ് ഗുരുദേവനെ അപമാനിക്കുന്ന ദൃശ്യങ്ങള്‍ കണ്ടത്.

ശ്രീനാരായണ ഗുരുവിനെ എസ്എന്‍ഡിപി പ്രവര്‍ത്തകനും ആര്‍എസ്എസ് പ്രവര്‍ത്തകനും കുരിശിലേറ്റുന്ന നിശ്ചല ദൃശ്യമായിരുന്നു സിപിഎം ശോഭയാത്രയില്‍ അവതരിപ്പിച്ചത്. ശ്രീരാനാരായണ ഗുരുദേവന്റെ ഒരു ജാതി ഒരു മതം ഒരു ദൈവം മനുഷ്യന് എന്ന വാക്കുകളെപ്പോലും മാറ്റി ചിത്രീകരിച്ചാണ് നിശ്ചലദൃശ്യം പ്രത്യക്ഷപ്പെട്ടത്.

പല ജാതി പല മതം പല ദൈവം മനുഷ്യന് എന്നായിരുന്നു ബോര്‍ഡില്‍ എഴുതി വെച്ചത്. ഇതിനെതിരെ കണ്ണൂരില്‍ പ്രതിഷേധങ്ങള്‍ ആളിക്കത്തുകയാണ്. സംസ്ഥാന വ്യാപകമായി ഞായറാഴ്ച വൈകുന്നേരം എസ്.എന്‍.ഡി.പി പ്രതിഷേധ പരിപാടികള്‍ സംഘടിപ്പിക്കും.

സെക്രട്ടറിയേറ്റിലേക്കും പ്രതിഷേധ മാര്‍ച്ച് ഉണ്ടാകുന്നതാണ്. ശനിയാഴ്ച നടന്ന ശ്രീകൃഷ്ണ ജയന്തി ഘോഷയാത്രകളില്‍ പലയിടത്തും സിപിഎം കൃഷ്ണന്റെ പ്രതിമയ്‌ക്കൊപ്പം ചെഗുവേരയുടെ ചിത്രങ്ങളും വെച്ചിരുന്നു.