സഖാവേ.. എന്തുകൊണ്ട് നമ്മള് തോറ്റു: എല്ലാ തവണയും ഇതുപോലെ, വിലയിരുത്തി സിപിഎം സെക്രട്ടറിയേറ്റ്
തിരുവനന്തപുരം: ലോക്സഭ തിരഞ്ഞെടുപ്പിലെ കനത്ത പരാജയത്തിന് പിന്നെലെ ഔദ്യോഗിക പ്രതികരണവുമായി സി പി എം സംസ്ഥാന സെക്രട്ടറിയേറ്റ്. പാര്ലമെന്റ് തെരഞ്ഞെടുപ്പില് സംസ്ഥാനത്തുണ്ടായ ജനവിധി അംഗീകരിക്കുന്നുവെന്ന് വ്യക്തമാക്കുന്ന സെക്രട്ടറിയേറ്റ് ലോക്സഭ തെരഞ്ഞെടുപ്പില് യുഡിഎഫിന് അനുകൂലമായ ജനവിധിയാണ് കേരളത്തില് പൊതുവിലുണ്ടാവാറുള്ളതെന്നും വിശദീകരിക്കുന്നു.
വര്ഗ്ഗീയ ശക്തികളുടെ വളര്ച്ചയ്ക്കെതിരായി ആശയപരവും, സംഘടനാപരവും, പ്രത്യയശാസ്ത്രപരവുമായ ഇടപെടലുണ്ടാവേണ്ടതിന്റെ പ്രധാന്യം ഈ തെരഞ്ഞെടുപ്പ് ഉയര്ത്തുന്നുണ്ടെന്നും സിപിഎം പ്രസ്താവനയിലൂടെ വ്യക്തമാക്കുന്നു.
സിപിഐ എം സംസ്ഥാന സെക്രട്ടേറിയറ്റ് പുറപ്പെടുവിക്കുന്ന പ്രസ്താവന
-------------------------------
പാര്ലമെന്റ് തെരഞ്ഞെടുപ്പില് സംസ്ഥാനത്തുണ്ടായ ജനവിധി അംഗീകരിക്കുന്നു.
ലോക്സഭ തെരഞ്ഞെടുപ്പില് യുഡിഎഫിന് അനുകൂലമായ ജനവിധിയാണ് കേരളത്തില് പൊതുവിലുണ്ടാവാറുള്ളത്. കഴിഞ്ഞ ലോകസഭ തെരഞ്ഞെടുപ്പിലും എല്ഡിഎഫിന് ഒരു സീറ്റ് മാത്രമാണ് സംസ്ഥാനത്ത് ലഭിച്ചത്. ഒരു സീറ്റ് പോലും പാര്ടിക്ക് ലഭിക്കാത്ത സാഹചര്യവും സംസ്ഥാനത്ത് ഉണ്ടായിട്ടുണ്ട്. അത്തരം ഘട്ടങ്ങളിലെല്ലാം ശരിയായ പരിശോധന നടത്തി ആവശ്യമായ തിരുത്തലുകള് വരുത്തി മുന്നോട്ടുപോകുന്ന ശൈലിയാണ് പാര്ടി സ്വീകരിച്ചിട്ടുള്ളത്.
കഴിഞ്ഞ ലോകസഭ തെരഞ്ഞെടുപ്പിലെ പരാജയത്തിന്റെ കാരണങ്ങള് പരിശോധിച്ച് തിരുത്തുന്ന പ്രവര്ത്തനങ്ങള് നടത്തിയതിന്റെ ഭാഗമായാണ് തുടര്ന്ന് നടന്ന തദ്ദേശ സ്വയംഭരണ തെരഞ്ഞെടുപ്പില് വലിയ വിജയം നേടാന് എല്ഡിഎഫിന് സാധിച്ചത്. അതിനുശേഷം നടന്ന നിയമസഭ തെരഞ്ഞെടുപ്പിലാവട്ടെ കേരളത്തിന്റെ തെരഞ്ഞെടുപ്പ് ചരിത്രത്തില് ആദ്യമായി എല്ഡിഎഫിന് തുടര്ഭരണം ലഭിക്കുന്ന സ്ഥിതിയുമുണ്ടായി.
രാജ്യത്ത് ബിജെപിക്ക് ഒറ്റയ്ക്ക് അധികാരത്തില് വരാന് പറ്റാത്ത സ്ഥതി ഈ തെരഞ്ഞെടുപ്പിലുണ്ടായിട്ടുണ്ട്. എന്നാല്, കേരളത്തില് ഈ പാര്ലമെന്റ് തെരഞ്ഞെടുപ്പില് തൃശ്ശൂരില് എന്ഡിഎക്ക് ഒരു സീറ്റില് വിജയിക്കാനായി. നേമത്തെ തെരഞ്ഞെടുപ്പില് അസംബ്ലിയില് കോണ്ഗ്രസിന്റെ സഹായത്തോടെ ബിജെപി അക്കൗണ്ട് തുറന്നെങ്കിലും പിന്നീട് അതില്ലാതാവുകയാണ് ചെയ്തത്. മൂവാറ്റുപുഴ പാര്ലമെന്റ് മണ്ഡലത്തില് ബിജെപി മുന്നണി സ്ഥാനാര്ത്ഥി നേരത്തെ വിജയിച്ചിരുന്നുവെങ്കിലും പീന്നീട് അത് ആവര്ത്തിക്കാന് കഴിഞ്ഞില്ല.
വര്ഗ്ഗീയ ശക്തികളുടെ വളര്ച്ചയ്ക്കെതിരായി ആശയപരവും, സംഘടനാപരവും, പ്രത്യയശാസ്ത്രപരവുമായ ഇടപെടലുണ്ടാവേണ്ടതിന്റെ പ്രധാന്യം ഈ തെരഞ്ഞെടുപ്പ് ഉയര്ത്തുന്നുണ്ട്. തെരഞ്ഞെടുപ്പ് വിധിയെ ശരിയായ അര്ത്ഥത്തില് പരിശോധിച്ച് തിരുത്തേണ്ടവ തിരുത്തി മുന്നോട്ടുപോകും. ജനങ്ങള്ക്കൊപ്പം കൂടുതല് ചേര്ന്നുകൊണ്ടുള്ള പ്രവര്ത്തനങ്ങള് സംഘടിപ്പിക്കും.
Click it and Unblock the Notifications
Sign in with Google