'അവതാരകര്ക്ക് റഫറിയുടെ ഗോളാണ്; എല്ഡിഎഫ് വിരുദ്ധ രാവണന് കോട്ട കെട്ടാനാണ് ശ്രമം'
തിരുവനന്തപുരം: ചാനല് ചര്ച്ചകളില് പാര്ട്ടി പ്രതിനിധികള്ക്ക് തങ്ങളുടെ ഭാഗം വിശദീകരിക്കാന് മതിയായ സമയം നല്കുന്നില്ലെന്നാരോപിച്ച സിപിഎം ഏഷ്യാനെറ്റ് ചര്ച്ച ബഹിഷ്കരിച്ചത് വലിയ ചര്ച്ചകള്ക്ക് വഴിവെച്ചിരുന്നു. എന്നാല് ഇത്തരം ബഹിഷ്ടകരണങ്ങളെല്ലാം ജനാധിപത്യ വിരുദ്ധമാണെന്നായിരുന്നു ഏഷ്യാനെറ്റ് ന്യൂസ് എഡിറ്റര് എംജി രാധാകൃഷ്ണന്റെ വിശദീകരണം. ബഹിഷ്കരണം എന്നത് ഭ്രഷ്ട് പോലെ തന്നെയാണ് കാണേണ്ടതെന്നും രാധാകൃഷ്ണന് വ്യക്തമാക്കി. എന്നാല് ഇതിന് മറുപടിയുമായി രംഗത്തെത്തിയിരിക്കുകയാണ് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്. ഫേസ്ബുക്ക് കുറിപ്പിലൂടെയാണ് കോടിയേരി രംഗത്തെത്തിയത്.
ചര്ച്ചകളെ അധഃപതിപ്പിക്കരുത്
പൊതുയിടങ്ങളുടെ വാതായനമാണ് മാധ്യമങ്ങള്. പക്ഷേ, തുറന്ന സംവാദങ്ങള് നടക്കേണ്ട പൊതുയിടങ്ങളെ അടഞ്ഞ ജാലിയന് വാലാബാഗുകളാക്കാന് വാര്ത്താ ചാനലുകള് പരിശ്രമിക്കുന്നു. നേരറിയാനുള്ള മൗലികാവകാശം പൗരനുണ്ട്. അത് നിഷേധിക്കുന്നതാകരുത് ചാനല് സംവാദം. വ്യാജവാര്ത്തകളിലും കെട്ടുകഥകളിലും കെട്ടിപ്പൊക്കുന്ന കെട്ടുകാഴ്ചകളായി ചാനല് ചര്ച്ചകളെ അധഃപതിപ്പിക്കരുത്. ഇതൊക്കെ ചെയ്തശേഷവും ഞങ്ങളുടെ ചാനല് നിഷ്പക്ഷമാണ് എന്നുള്ള ഏഷ്യാനെറ്റ് ചാനല് എഡിറ്ററുടെ വിളിച്ചുപറയല് അപഹാസ്യമാണ്.
യുഡിഎഫ് - ബിജെപി അജന്ഡ
രാത്രികാല ചര്ച്ചകളെ യുഡിഎഫ് - ബിജെപി അജന്ഡ നടപ്പാക്കാനുള്ള ആസൂത്രിതവേദിയാക്കി ഈ ചാനല് മാറ്റി. സിപിഐഎം പ്രതിനിധികള് വിട്ടുനില്ക്കാനുള്ള തീരുമാനം പ്രാകൃതമാണെന്നാണ് ചാനല് എഡിറ്ററുടെ പക്ഷം. ഭരണ പാര്ടിയുടെ പ്രതിനിധിയോട് ഞങ്ങള് ചോദ്യങ്ങള് ചോദിച്ചുകൊണ്ടേയിരിക്കുമെന്ന് അദ്ദേഹം പറയുന്നതു കേട്ടു. ചോദ്യങ്ങള് ഉയര്ത്തുകയും ഉത്തരം പറയാന് അവസരം നല്കാതിരിക്കുകയും ചെയ്യുന്നതാണ് കാട്ടാളത്തം.
വിഗ്രഹഭഞ്ജനം
യേശുവിനെ വിചാരണ ചെയ്ത പീലാത്തോസ് പോലും മറുപടി കേള്ക്കാന് സാവകാശം നല്കിയിരുന്നു. എല്ഡിഎഫ് സര്ക്കാരിനും സിപിഐ എമ്മിനുമെതിരെ വീരശൂര പരാക്രമം കാട്ടുന്ന ഇക്കൂട്ടര് എന്തേ, മോഡി സര്ക്കാരിനും ബിജെപിക്കുമെതിരെ ചോദ്യമൊന്നും ഉയര്ത്തുന്നില്ല. അപ്പോള് വിഗ്രഹഭഞ്ജനം ആര്ക്കുവേണ്ടിയാണ്.
Recommended Video
റഫറിയുടെ റോള്
ചര്ച്ചകളില് അവതാരകര്ക്ക് ഒരര്ഥത്തില് റഫറിയുടെ റോളാണ്. എന്നാല്, റഫറി ഗോളടിക്കുക എന്നത് ഇത്തരം ചാനലുകള് ഒരു നയമാക്കി മാറ്റിയിരിക്കുകയാണ്. അതിനാല് അവതാരകരോടല്ല, അവരെ ഗോളടിക്കുന്ന റഫറിമാരാക്കിയിരിക്കുന്ന നയമാണ് തുറന്നുകാട്ടപ്പെടുന്നത്. ഡല്ഹി കലാപത്തിലെ റിപ്പോര്ട്ടിങ്ങിന് സംപ്രേഷണ വിലക്കുവന്ന കാര്യം ഏഷ്യാനെറ്റ് പ്രതിനിധി നിഷ്പക്ഷതയ്ക്ക് തെളിവായി സൂചിപ്പിക്കുന്നുണ്ട്. പക്ഷേ, ആ റിപ്പോര്ട്ടില് മോഡി സര്ക്കാരിനോട് മാപ്പിരന്നതുകൊണ്ടാണ് കാര്യങ്ങള് സമവായത്തിലായതെന്ന് കേന്ദ്രമന്ത്രി പറഞ്ഞിരുന്നല്ലോ?
എല്ഡിഎഫ് വിരുദ്ധത
ബിജെപിയുടെ പാര്ലമെന്റംഗത്തിന്റെ ഉടമസ്ഥതയിലുള്ള ചാനല് എല്ഡിഎഫ് വിരുദ്ധത രാഷ്ട്രീയനയമായി സ്വീകരിച്ചിരിക്കുന്നതും ആശ്ചര്യമല്ല. നിയമസഭാ തെരഞ്ഞെടുപ്പ് അടുത്തുവന്നിരിക്കുന്ന ഘട്ടത്തില് പ്രത്യേകിച്ച്. ഇത്തരം നയം സ്വീകരിക്കാനുള്ള സ്വാതന്ത്ര്യം അവര്ക്കുണ്ട്. എന്നിട്ടും നിഷ്പക്ഷതയുടെ മുഖംമൂടി അണിയുന്നതാണ് കപടത. അത് ജനങ്ങളോടു പറയാനുള്ള അവകാശം ഒരു രാഷ്ട്രീയപ്രസ്ഥാനത്തിനുണ്ട്. അത് ജനാധിപത്യം അനുവദിക്കുന്ന സ്വാതന്ത്ര്യമാണ്.
രാവണന്കോട്ട തീര്ക്കുന്നു
നാലുപേരെ സംഘടിപ്പിച്ച് ചര്ച്ച നടത്തുമ്പോള് മൂന്നുപേരും അവതാരകരും ചേര്ന്ന് എല്ഡിഎഫ് വിരുദ്ധ രാവണന്കോട്ട തീര്ക്കുന്നു. എന്നിട്ടവര് വാദങ്ങളും ചോദ്യങ്ങളുമായി കെട്ടിയുയര്ത്തുന്ന വ്യാജകഥകളെ പൊളിക്കാന് സിപിഐ എം പ്രതിനിധി സംസാരിക്കാന് തുടങ്ങുമ്പോഴേ അവതാരകര് ഇടപെടുകയോ മൈക്ക് ഓഫ് ചെയ്യുകയോ ചെയ്യുന്നു. ഇങ്ങനെ സിപിഐ എം പ്രതിനിധികളുടെ നാവിന് കത്രികപ്പൂട്ട് ഇടാന് നോക്കുന്നു.
രാഷ്ട്രീയ ഗൂഢലക്ഷ്യം
ഇത്തരം സംവാദങ്ങള് ജനാധിപത്യ മര്യാദകളുടെ പൂര്ണ ലംഘനമാണ്. ഇതിനാലാണ് ഏഷ്യാനെറ്റ് ന്യൂസ് ചര്ച്ചയുടെ രാഷ്ട്രീയ ഗൂഢലക്ഷ്യം വെളിപ്പെടുത്തുന്നതിന് സിപിഐ എം പ്രതിനിധികള് വിട്ടുനില്ക്കാന് തീരുമാനിച്ചത്. ഇക്കാര്യത്തില് എന്തെങ്കിലും സ്വയംവിമര്ശനം നടത്തേണ്ടതുണ്ടോ എന്ന് പരിശോധിക്കുന്നതിനു പകരം സിപിഐ എമ്മിനെതിരെയുള്ള കലിതുള്ളലുമായി ഏഷ്യാനെറ്റ് പത്രാധിപര് ഇറങ്ങിയത് അപക്വ നടപടിയാണ്.