യൂസഫലിക്ക് സിപിഎമ്മിന്റെ ക്ലീന് ചിറ്റ്
തിരുവനന്തപുരം: പ്രവാസി വ്യവസായി എംഎ യൂസഫലിക്കെതിരെ സിപിഎം എറണാകുളം ജില്ലാ കമ്മിറ്റി ഉയര്ത്തിയ പ്രശ്നങ്ങള്ക്കെല്ലാം ഒടുവില് ശുഭാന്ത്യം. യൂസഫലിക്കെതിരെ ഇനി അനാവശ്യമായി സമരത്തിറങ്ങരുതെന്ന് പാര്ട്ടി സംസ്ഥാന സമിതി ജില്ലാ കമ്മിറ്റിക്ക് ഇണ്ടാസ് നല്കി. യൂസഫലിക്കെതിരെ തയ്യാറാക്കിയ അന്വേഷണ കമ്മീഷന് റിപ്പോര്ട്ട് തള്ളുകയും ചെയ്തു.
ഇടപ്പള്ളിയില് തുടങ്ങിയ ലുലു മാള്, ബോള്ഗാട്ടിയില് തുടങ്ങാനിരുന്നു കണ്വെന്ഷന് സെന്റര്. ഇതിന് രണ്ടിനും എതിരായിട്ടായിരുന്നു സിപിഎം എറണാകുളം ജില്ലാ കമ്മിറ്റിയുടെ ആക്ഷേപങ്ങള്. ലുലു സെന്റര് നിര്മിച്ചത് തോട് കയ്യേറിയിട്ടായിരുന്നു എന്നതായിരുന്നു ഒരു ആരോപണം. ബോള്ഗാട്ടിയിലെ ഭൂമി സ്വാധീനം ഉപയോഗിച്ച് കുറഞ്ഞ വിലക്ക് സ്വന്തമാക്കി എന്നതായിരുന്നു മറ്റൊരു ആരോപണം.
വിഎസ്സുമായി അടുത്ത ബന്ധം പുലര്ത്തുന്ന വ്യവസായിയാണ് യൂസഫലി. അതുകൊണ്ട് തന്നെ ലുലു മാളിന്റെ ഉദ്ഘാടനത്തിനും വിഎസ് പങ്കെടുത്തിരുന്നു. എന്നാല് ലുലുവിനെതിരെ സിപിഎം ജില്ലാ സെക്രട്ടറി ദിനേശ് മണിയും രാജ്യസഭ എംപി പി രാജീവും പരസ്യമായി രംഗത്തെത്തിയതോടെ പാര്ട്ടിക്കുള്ളിലെ വിഭാഗീയ പ്രശ്നമായി ഇത് മാറി.
യൂസഫലിയെ എതിര്ക്കുന്ന പി രാജീവും, അനുകൂലിക്കുന്ന കെ ചന്ദ്രന് പിള്ളയും ആയിരുന്നു ജില്ലാ കമ്മിറ്റിയുടെ അന്വേഷണ കമ്മീഷന് അംഗങ്ങള്. യൂസഫലിക്കെതിരെ രൂക്ഷ വിമര്ശനം ഉന്നയിക്കുന്ന റിപ്പോര്ട്ട് പക്ഷേ ജില്ലാ കമ്മിറ്റിയില് അവതരിപ്പിച്ചിരുന്നില്ല. നേതൃത്വം ഇടപെട്ട് സംസ്ഥാന കമ്മിറ്റിയാണ് റിപ്പോര്ട്ട് പരിശോധിച്ചത്.
സിപിഎം സംസ്ഥാന സെക്രട്ടറി പിണറായി വിജയന് തന്നെയാണ് സംസ്ഥാന സമിതിയില് യൂസഫലിയെ അനുകൂലിച്ച് സംസാരിച്ചത്. നിയമം പാലിച്ചാണ് ഇടപ്പള്ളിയിലേയും ബോള്ഗാട്ടിയിലേയും ഭൂമി യൂസഫലി വാങ്ങിയിട്ടുള്ളതെന്നും കോടതി പോലും അതില് തെറ്റ് കണ്ടെത്തിയിട്ടില്ലെന്നും പിണറായി വിജയന് പറഞ്ഞു.
അറിയപ്പെടുന്ന വ്യവസായിയായ യൂസഫലിക്കെതിരെ ശത്രുതയുമായി ആരും ഇനി ഇറങ്ങേണ്ടതില്ലെന്നും പിണറായി വ്യക്തമാക്കി. ഇനി ഇത് ആവര്ത്തിക്കരുതെന്ന് പിണറായി താക്കീതും നല്കിയിട്ടുണ്ട്.