സ്വപ്ന സുരേഷിന്റേതായി പ്രചരിക്കുന്ന ശബ്ദരേഖ: അന്വേഷിക്കാന് ക്രൈംബ്രാഞ്ച്
തിരുവനന്തപുരം: സ്വര്ണ്ണ കളളക്കടത്ത് കേസിലെ പ്രതി സ്വപ്ന സുരേഷിന്റേതായി പ്രചരിക്കുന്ന ശബ്ദരേഖയെക്കുറിച്ച് ക്രൈംബ്രാഞ്ച് പ്രാഥമിക അന്വേഷണം നടത്തുമെന്ന് സംസ്ഥാന പോലീസ് മേധാവി ലോക്നാഥ് ബെഹ്റ അറിയിച്ചു. ക്രൈംബ്രാഞ്ചിലെ പ്രത്യേക അന്വേഷണ സംഘത്തിനായിരിക്കും അന്വേഷണച്ചുമതല. ശബ്ദരേഖ പ്രചരിച്ച സംഭവം അന്വേഷിക്കണമെന്ന് എന്ഫോഴ്സ്മെന്റ് ഡയറക്ടറേറ്റ് ജയില് മേധാവിയോട് അഭ്യര്ത്ഥിച്ചിരുന്നു.
ഇക്കാര്യം ജയില്മേധാവി സംസ്ഥാന പോലീസ് മേധാവിയുടെ ശ്രദ്ധയില്പ്പെടുത്തിയതിനെ തുടര്ന്നാണ് പ്രാഥമിക അന്വേഷണം നടത്താന് ക്രൈംബ്രാഞ്ചിനെ ചുമതലപ്പെടുത്തിയത്. ഇഡിക്ക് മറുപടി നൽകാൻ അന്വേഷണം നടത്തണമെന്ന് ഋഷിരാജ് സിംഗ് പൊലീസ് മേധാവിയോട് പറഞ്ഞിരുന്നു. ഇതേ തുടര്ന്നാണ് ലോക്നാഥ് ബെഹ്റ അന്വേഷണത്തിന് ഉത്തരവിട്ടത്.
അതേസമയം, ഇഡിക്കെതിരേയുള്ള ആരോപണം ശക്തമാക്കി സിപിഎം രംഗത്തെത്തി. എല്ഡിഎഫ് സര്ക്കാരിനെ അട്ടിമറിക്കാനുള്ള കുറ്റകരമായ ക്രിമിനല് ഗൂഢാലോചനയില് ഇ.ഡിയും ഭാഗമാണെന്നു വ്യക്തമാക്കുന്നതാണ് അവരുടേതായി ചില മാധ്യമങ്ങളില് വന്ന പ്രതികരണം. സ്വര്ണ്ണക്കടത്ത് കേസിലെ പ്രതിയുടേതായി പുറത്തു വന്ന ശബ്ദ സന്ദേശത്തെ സംബന്ധിച്ച് ബിജെപിയും കോണ്ഗ്രസും പറയുന്നത് അതേ പോലെ ആവര്ത്തിക്കുകയാണ് ഇ.ഡി ചെയ്തിരിക്കുന്നതെന്നും സിപിഎം സംസ്ഥാന സെക്രട്ടറിയേറ്റ് പുറപ്പെടുവിച്ച പ്രസ്താവനയില് പറഞ്ഞു.
ആവശ്യമായത് തെരഞ്ഞടുത്ത് ചോര്ത്തി കൊടുത്തുകൊണ്ടിരിക്കുന്ന രീതിയില് തന്നെയാണ് ഔദ്യോഗിക കുറിപ്പല്ലാതെ ഇ.ഡി വൃത്തങ്ങളുടേതായി ഈ വാര്ത്തയും വന്നിരിക്കുന്നത്. ജനാധിപത്യപരമായി തെരഞ്ഞെടുത്ത സര്ക്കാരിനെ അട്ടിമറിക്കുന്നതിനായി ഇ.ഡി ശ്രമിച്ചെന്ന അതീവഗൗരവമായ വെളിപ്പെടുത്തലാണ് ശബ്ദസന്ദേശത്തിലുള്ളത്. ഇത് ഔദ്യോഗികമായി നിഷേധിക്കാന് ഇതുവരെ ഇ.ഡിക്ക് കഴിഞ്ഞിട്ടില്ല. ഈ പ്രതിയുടെ മൊഴിയായി ഇ.ഡി സമര്പ്പിച്ച രേഖയുടെ വിശ്വാസ്യതയില് കോടതി തന്നെ സംശയം രേഖപ്പെടുത്തിയിരുന്നു. രാഷ്ട്രീയ നേതൃത്വത്തിന്റെ പേരു പറയാന് നിര്ബന്ധിക്കുന്നെന്ന ഗൗരവമായ പരാതി മറ്റൊരു പ്രതി കോടതിയില് തന്നെ പരസ്യമായി പറഞ്ഞിരിക്കുന്നു.
ഇ.ഡിയുടെ വിശ്വാസ്യത തകര്ക്കാനാണ് നീക്കമെന്ന വിശദീകരണം പരിഹാസ്യമാണ്. ദിവസേന സ്വയം വിശ്വാസ്യത തകര്ത്തു കൊണ്ടിരിക്കുന്ന അന്വേഷണ ഏജന്സിയായി ഇ.ഡി മാറിക്കഴിഞ്ഞു. ഈ കേസില് തന്നെ കോടതിയില് കൊടുത്ത റിപ്പോര്ട്ടുകളിലെ വൈരുദ്ധ്യം കോടതി തന്നെ പരാമര്ശിക്കുകയുണ്ടായി. കാലാവധി കഴിഞ്ഞ ഇ.ഡി ഡയറക്ടര്ക്ക് തികച്ചും അസാധാരണമായ നിലയില് ജോലി നീട്ടിക്കൊടുത്ത കേന്ദ്ര ബിജെപി ഭരണത്തിന്റെ ദുഷ്ടലാക്ക് നിയമവിദഗ്ദ്ധര് തന്നെ തുറന്ന് വിമര്ശിച്ചതിന്റെ പശ്ചാത്തലത്തില് വേണം ഇ.ഡിയുടെ വിശ്വാസ്യത വിലയിരുത്തുവാന്.
സ്വര്ണ്ണക്കടത്ത് സംബന്ധിച്ച് അന്വേഷിക്കാന് വന്നവര് ഇപ്പോള് അതൊഴികെയുള്ളതെല്ലാം അന്വേഷിച്ച് സര്ക്കാരിനെ ലക്ഷ്യംവെയ്ക്കാനും അട്ടിമറിക്കാനുമാണ് ശ്രമിക്കുന്നത്. ബിജെപിയും ഇ.ഡിയും പറഞ്ഞ ന്യായങ്ങള് ഇപ്പോള് പ്രതിപക്ഷ നേതാവ് രമേശ് ചെന്നിത്തലയും ആവര്ത്തിച്ചിരിക്കുന്നു. രാഷ്ട്രീയ ഉപകരണമാണ് കേന്ദ്ര അന്വേഷണ ഏജന്സികളെന്ന കോണ്ഗ്രസ് അഖിലേന്ത്യാ നേതൃത്വത്തിന്റെ നിലപാട് തള്ളി ഇ.ഡി യുടെ വക്താവായി രമേശ് ചെന്നിത്തല മാറിയിരിക്കുന്നു. കേരളത്തിലെ ജ്യോതിരാദിത്യ സിന്ധ്യയായാണ് ചെന്നിത്തലയെ ബിജെപി കാണുന്നത്. കേന്ദ്ര അന്വേഷണ ഏജന്സികള് കുടി ഉള്പ്പെടുന്ന അവിശുദ്ധ കൂട്ടുകെട്ടിന്റ നിയമവിരുദ്ധ നടപടികളെ ജനങ്ങള് തിരിച്ചറിയുക തന്നെ ചെയ്യുമെന്നും സിപിഎം അഭിപ്രായപ്പെട്ടു.