സിനിമാ താരങ്ങളെ ഉൾപ്പെടുത്തി ശബരിമല പരസ്യം; വിവാദ തീരുമാനം പിൻവലിച്ചു

തിരുവനന്തപുരം: ശബരിമലയിലേക്ക് കൂടുതൽ തീർത്ഥാടകരെ ആകർഷിക്കാൻ സിനിമാ താരങ്ങളെ ഉൾപ്പെടുത്തി പരസ്യം ചെയ്യാനുള്ള തീരുമാനം ദേവസ്വം ബോർഡ് പിൻവലിച്ചു. തീരുമാനത്തിനെതിരെ കടുത്ത വിമർശനം ഉണ്ടായ സാഹചര്യത്തിലാണ് നടപടി.

മണ്ഡല-മകരവിളക്ക് തീർത്ഥാടനത്തിനായി ശബരിമല നട തുറന്നതുമുതൽ മുൻവർഷങ്ങളെ അപേക്ഷിച്ച് തീർത്ഥാടകരുടെ എണ്ണത്തിൽ വലിയ കുറവാണ് അനുഭവപ്പെട്ടത്. ശബരിമലയിലെ പ്രതിഷേധങ്ങളുടെ പശ്ചാത്തലത്തിൽ‌ ഇതരസംസ്ഥാനത്ത് നിന്നെത്തുന്നവരുടെ എണ്ണത്തിലും വലിയ കുറവുണ്ട്. ഈ സാഹചര്യത്തിലാണ് സിനിമാ താരങ്ങളെ ഉൾപ്പെടുത്തി വിവിധ ഭാഷകളിൽ പരസ്യം ചെയ്യാൻ തീരുമാനമെടുത്തത്.

സിനിമാ താരങ്ങളെ ഉൾപ്പെടുത്തിയ പരസ്യങ്ങൾക്ക് പകരം പത്രങ്ങളിൽ പരസ്യം നൽകും. ശബരിമലയ്ക്കെതിരെ നടക്കുന്ന വ്യാജപ്രചരണങ്ങൾ തടയാനാണ് ദേവസ്വം ബോർഡ് നീക്കം. പത്രപരസ്യം കൂടാതെ മറ്റു മാർഗങ്ങൾ തേടുന്നതും ദേവസ്വം ബോർഡിന്റെ പരിഗണനയിലുണ്ട്.

English summary

decision to take sabarimala advertisement with film actors withdrawn