സടകുടഞ്ഞെഴുന്നേറ്റ് പോലീസ്!ജിഷ്ണുവിന്റെ മരണം അന്വേഷിക്കാന്‍ പ്രത്യേക സംഘം

ഡിജിപിയുടെ നിര്‍ദേശത്തിന്റെ അടിസ്ഥാനത്തില്‍ പുതിയ അന്വേഷണ സംഘം ഉടന്‍ അന്വേഷണ ചുമതല ഏറ്റെടുക്കും.

തിരുവനന്തപുരം: പാമ്പാടി നെഹ്‌റു കോളേജ് വിദ്യാര്‍ത്ഥിയായിരുന്ന ജിഷ്ണു പ്രണോയിയുടെ മരണവുമായി ബന്ധപ്പെട്ട കേസ് അന്വേഷിക്കാന്‍ പ്രത്യേക സംഘത്തെ നിയോഗിച്ചു. ക്രൈം ബ്രാഞ്ച് എഡിജിപിയുടെ നേതൃത്വത്തിലുള്ള പ്രത്യേക അന്വേഷണ സംഘത്തെയാണ് കേസ് അന്വേഷിക്കാന്‍ ചുമതലപ്പെടുത്തിയിരിക്കുന്നത്.

രണ്ടാഴ്ച്ചയ്ക്കകം കേസിലെ മുഴുവന്‍ പ്രതികളെ പിടികൂടാനാണ് ഡിജിപി നല്‍കിയിരിക്കുന്ന നിര്‍ദേശം. ഡിജിപിയുടെ നിര്‍ദേശത്തിന്റെ അടിസ്ഥാനത്തില്‍ പുതിയ അന്വേഷണ സംഘം ഉടന്‍ അന്വേഷണ ചുമതല ഏറ്റെടുക്കും. നിലവില്‍ ഇരിങ്ങാലക്കുട ഡിവൈഎസ്പി കിരണ്‍ നാരായണിന്റെ നേതൃത്വത്തിലുള്ള സംഘമാണ് ജിഷ്ണു കേസ് അന്വേഷിക്കുന്നത്.

ജിഷ്ണുവിന്റെ മരണവുമായി ബന്ധപ്പെട്ട കേസിലെ പോലീസ് അനാസ്ഥയ്‌ക്കെതിരെ തിരുവനന്തപുരം പോലീസ് ആസ്ഥാനത്ത് സമരം ചെയ്യാനെത്തിയ ജിഷ്ണുവിന്റെ അമ്മയെ മര്‍ദ്ദിച്ച പോലീസ് നടപടി വിവാദത്തിന് വഴിവെച്ചതിനെ തുടര്‍ന്നാണ് പുതിയ അന്വേഷണ സംഘത്തെ നിയോഗിച്ചിരിക്കുന്നത്. പോലീസ് അതിക്രമത്തില്‍ ജിഷ്ണുവിന്റെ അമ്മയ്ക്കും ബന്ധുക്കള്‍ക്കും പരിക്കേറ്റിരുന്നു.

English summary

Jishnu case; DGP formed a special investigation team.