നടി ആക്രമിക്കപ്പെട്ട കേസ്; ദിലീപ് കുറ്റവിമുക്തന്‍: 1 മുതല്‍ 6 വരെയുള്ള പ്രതികള്‍ കുറ്റക്കാര്‍

നടി ആക്രമിക്കപ്പെട്ട കേസില്‍ ദിലീപ് കുറ്റവിമുക്തന്‍. ഗൂഢാലോചന തെളിയിക്കാന്‍ കഴിഞ്ഞില്ല. ഒന്നു മുതല്‍ ആറ് വരെയുള്ള പ്രതികള്‍ കുറ്റക്കാര്‍. എറണാകുളം പ്രിന്‍സിപ്പല്‍ സെഷന്‍സ് കോടതിയാണ് ഇന്ന് രാവിലെ 11 മണിക്കു ശേഷം വിധി പറഞ്ഞത്. ജഡ്ജി ഹണി എം വര്‍ഗീസാണ് വിധി പ്രസ്താവിച്ചത്. 1 മുതല്‍ 6 വരെയുള്ള പ്രതികള്‍ക്കുള്ള ശിക്ഷ 12-ന് വിധിക്കും.

രാജ്യം മുഴുവന്‍ ഉറ്റുനോക്കിയ വിധി വലിയ ആകാംക്ഷയ്‌ക്കൊടുവിലാണ് ഇന്നു പുറത്തുവന്നത്. എട്ടു വര്‍ഷം നീണ്ട നിയമപോരാട്ടം ഇനിയും നീളുമെന്ന് ഉറപ്പായി. നടിയെ പീഡിപ്പിച്ചു ദൃശ്യങ്ങള്‍ പകര്‍ത്തിയെന്ന കേസില്‍ ദിലീപ് അടക്കം പത്തു പ്രതികളാണ് ഉണ്ടായിരുന്നത്. രാവിലെ കൃത്യം 11-ന് കോടതി നടപടികള്‍ തുടങ്ങി. കൃത്യത്തില്‍ നേരിട്ടു പങ്കെടുത്തില്ല എങ്കിലും സംഭവത്തിന്റെ മുഖ്യ ആസൂത്രകന്‍ എന്നാണ് ദിലീപിനെതിരേ പ്രോസിക്യൂഷന്‍ ആരോപിച്ചത്. എന്നാല്‍ ഗൂഡാലോചന തെളിയിക്കാന്‍ കഴിഞ്ഞില്ല എന്നാണ് കോടതി നിരീക്ഷണം. ആറു വര്‍ഷം നീണ്ട വിചാരണയ്‌ക്കൊടുവിലാണ് വിധി വന്നത്.

നടി ആക്രമിക്കപ്പെട്ട കേസ് ഇന്നത്തെ ആദ്യത്തെ കേസായിട്ടാണ് പരിഗണിച്ചത്. സമീപകാലത്തൊന്നും കേരളം ഇത്ര ആകാംക്ഷയോടെ ഒരു കോടതി വിധിക്കു വേണ്ടി കാത്തിരുന്നിട്ടില്ല.

2017 ഫ്രെബ്രുവരി 17-ന് രാത്രിയിലാണ് കേരളം നടുക്കത്തോടെ കേട്ട, നടി ആക്രമിക്കപ്പെട്ട സംഭവം ഉണ്ടായത്. കൊച്ചി നഗരത്തില്‍ ഓടിക്കൊണ്ടിരുന്ന കാറില്‍ വച്ചാണ് നടി പീഡനത്തിന് ഇരയായത്. പീഡന ദൃശ്യങ്ങള്‍ ഒന്നാം പ്രതിയായ പള്‍സര്‍ സുനി പകര്‍ത്തി. സംഭവത്തില്‍ അന്നു തന്നെ ഡ്രൈവര്‍ മാര്‍ട്ടിന്‍ അറസ്റ്റിലായി. ഫ്രെബ്രുവരി 23-ന് കോടതിയിലെത്തിയ പള്‍സര്‍ സുനിയെ പൊലീസ് ബലം പ്രയോഗിച്ച് അറസ്റ്റ് ചെയ്തു. ജൂലൈ പത്തിനാണ് ദിലീപ് അറസ്റ്റിലാകുന്നത്.

2019 ലാണ് കേസില്‍ വിചാരണ നടപടി തുടങ്ങിയത്. 261 സാക്ഷികളെ വിസ്തരിച്ച കോടതി 1700 രേഖകള്‍ പരിഗണിച്ചു. കേസില്‍ സാക്ഷികള്‍ നിരവധി ചലച്ചിത്ര താരങ്ങളാണ് കൂറു മാറിയത്. സിദ്ദിഖ്, ഇടവേള ബാബു, ബിന്ദു പണിക്കര്‍, ഭാമ തുടങ്ങി 28 സാക്ഷികള്‍ വിചാരണയ്ക്കിടെ മൊഴിമാറ്റി.