മര്യാദക്കുട്ടിയായി ജാമ്യ വ്യവസ്ഥകള്‍ പാലിച്ച് ദിലീപ്; പാസ്‌പോര്‍ട്ട് ഹാജരാക്കി

കൊച്ചി: കൊച്ചിയില്‍ നടിയെ ആക്രമിച്ച കേസിലെ ഗൂഢാലോചനയുമായി ബന്ധപ്പെട്ട് ജയില്‍ വാസത്തിനു ജാമ്യത്തിലിറങ്ങിയ ജനപ്രിയ നായകന്‍ ദിലീപ് പാസ്‌പോര്‍ട്ട് ഹാജരാക്കി. അങ്കമാലി മജിസ്‌ട്രേറ്റ് കോടതിയിലാണ് പാസ്‌പോര്‍ട്ട് ഹാജരാക്കിയത്. ജാമ്യ വ്യവസ്ഥയുടെ ഭാഗമായിട്ടാണ് പാസ്‌പോര്‍ട്ട് ഹാജരാക്കിയത്.

ഏഴ് ദിവസത്തിനുള്ളില്‍ പാസ്‌പോര്‍ട്ട് ഹാജരാക്കാന്‍ കോടതി കര്‍ശന നിര്‍ദേശം നല്‍കിയിരുന്നു. ഇതിനെ തുടര്‍ന്നാണ് ദിലീപ് പാസ്‌പോര്‍ട്ട് ഹാജരാക്കിയത്. നടിയെ ആക്രമിച്ച കേസിലെ രണ്ടാം പ്രതിയാണ് ദിലീപ്. 85 ദിവസത്തെ ജയില്‍ വാസത്തിനു ശേഷമാണ് ദിലീപ് ജാമ്യത്തിലിറങ്ങിയത്.

കര്‍ശന വ്യവസ്ഥയിലാണ് ദിലീപിന് ഹൈക്കോടതി ജാമ്യം അനുവദിച്ചത്. പാസ്‌പോര്‍ട്ട് ഹാജരാക്കുന്നതിന് പുറമെ സാക്ഷികളെ സ്വാധീനിക്കരുതെന്നും ജാമ്യ വ്യവസ്ഥയില്‍ വ്യക്തമാക്കുന്നു. ഒരു ലക്ഷം രൂപ കെട്ടി വയ്ക്കാനും കോടതി നിര്‍ദേശിച്ചിരുന്നു.

ഒക്ടോബര്‍ മൂന്നിനാണ് ദിലീപിന് ജാമ്യം ലഭിച്ചത്. ജാമ്യത്തിലിറങ്ങിയ ദിലീപിന് വന്‍ സ്വീകരണമാണ് ആരാധകര്‍ നല്‍കിയത്. ജാമ്യത്തിലിറങ്ങിയാല്‍ ദിലീപ് സാക്ഷികളെ സ്വാധിക്കുമെന്ന് പ്രോസിക്യൂഷന്‍ കോടതിയെ അറിയിച്ചിരുന്നു.

English summary

dileep submit passport in ankamali court