ദുരന്തബാധിതരായ കുട്ടികള്‍ക്ക് ഭക്ഷ്യവിഷബാധ: വന്‍ പ്രതിഷേധവുമായി സിപിഎം, മേപ്പാടിയില്‍ റോഡ് ഉപരോധം

മേപ്പാടി: ചൂരല്‍മല-മേപ്പാടി ഉരുള്‍പൊട്ടല്‍ ദുരന്തബാധിതർ താമസിക്കുന്ന ഫ്ലാറ്റില്‍ ഭക്ഷ്യവിഷബാധ. മൂന്ന് കുട്ടികള്‍ക്കാണ് ഭക്ഷ്യവിഷബാധയേറ്റത്. ശാരീരിക അസ്വസ്ഥത നേരിട്ട കുട്ടികളെ വൈത്തിരിയിലെ ആശുപത്രിയിലേക്ക് മാറ്റി. ദുരന്തബാധിതർക്ക് നല്‍കിയ ഭക്ഷ്യ കിറ്റിലെ സോയാബീനായിരുന്നു വീട്ടില്‍ പാചകം ചെയ്തിരുന്നത്. ഇത് കഴിച്ചതാണ് ഭക്ഷ്യവിഷബാധയ്ക്ക് കാരണമായതെന്നാണ് പരാതി.

ആശുപത്രിയില്‍ പ്രവേശിപ്പിച്ച കുട്ടികളെ മന്ത്രി പി പ്രസാദ് സന്ദർശിച്ചു. ഭക്ഷ്യവിഷബാധയിൽ രാഷ്ട്രീയം കലർത്തുന്നുവെന്ന് കുട്ടിയുടെ രക്ഷിതാക്കള്‍ മന്ത്രിയോട് പറഞ്ഞു. ഏതെങ്കിലും തരത്തിലുള്ള ഭീഷണികള്‍ ഉണ്ടെങ്കില്‍ അറിയിക്കണമെന്നും സർക്കാർ ഒപ്പമുണ്ടെന്നും മന്ത്രി പ്രതികരിച്ചു. അതോടൊപ്പം തന്നെ ഭക്ഷണസാമഗ്രികളുടെ ഗുണനിലവാരം പരിശോധിക്കുവാൻ നിർദ്ദേശം നൽകിയതായും അദ്ദേഹം കൂട്ടിച്ചേർത്തു.

അതേസമയം, വിഷയത്തില്‍ യു ഡി എഫ് ഭരിക്കുന്ന മേപ്പാടി പഞ്ചായത്തിനെതിരെ പ്രതിഷേധവുമായി സി പി എം, ബി ജെ പി പ്രവർത്തകർ രംഗത്ത് വന്നു. മേപ്പാടിയിൽ സി പി എം പ്രവർത്തകർ റോഡ് ഉപരോധിച്ചു. ഭക്ഷ്യവസ്തുക്കൾ വിതരണം ചെയ്യുന്നതില്‍ മേപ്പാടി ഗ്രാമ പഞ്ചായത്തിന്റെ ഭാഗത്ത് നിന്നും ഗുരുതര വീഴ്ചയുണ്ടായെന്നാണ് സി പി എം ആരോപിക്കുന്നത്. വാഹന ഗതാഗതം തടസ്സപ്പെട്ടതോടെ പ്രവർത്തകരെ മാറ്റാൻ പൊലീസ് ശ്രമിച്ചത് സംഘർഷത്തിന് ഇടയാക്കി.ഉന്തും തള്ളുമായതോടെ പ്രവർത്തകരെ പോലീസ് അറസ്റ്റ് ചെയ്ത് നീക്കുകയായിരുന്നു.

അതേസമയം, ചൂരൽമല ദുരന്ത ബാധിതർക്ക് വിതരണം ചെയ്യാനായി നവംബർ 01 ന് സർക്കാർ പഞ്ചായത്തിന് കൈമാറിയ അരി പൂഴ്ത്തിവെച്ചാണ് പഴകിയ അരി ഉൾപ്പെടെയുള്ള ഭക്ഷണ പദാർഥങ്ങൾ ദുരിത ബാധിതർക്ക് യു ഡി എഫ് ഭരിക്കുന്ന മേപ്പാടി ഗ്രാമ പഞ്ചായത്ത് ഭരണ സമിതി വിതരണം ചെയ്തതെന്ന് ഡി വൈ എഫ് ഐ ആരോപിച്ചു. സർക്കാർ നൽകിയ നല്ല അരി ഉണ്ടായിട്ടും അത് വിതരണം ചെയ്യാതെ പൂഴ്ത്തി വെച്ച് , പഴകിയ അരിയും റവയും ഗോതമ്പും ഉൾപ്പെടെയുള്ള ഭക്ഷ്യ വസ്തുക്കൾ വിതരണം ചെയ്ത് ദുരിത ബാധിതരോട് എന്തിനായിരുന്നു ഈ കൊടും ക്രൂരതയെന്നും ഡി വൈ എഫ് ഐ ജില്ലാ സെക്രട്ടറി കെ റഫീഖ് അഭിപ്രായപ്പെട്ടു,

ഴുവരിച്ച അരിയും ഭക്ഷ്യവസ്തുക്കളും വിതരണം ചെയ്ത സംഭവത്തിൽ മുഖ്യമന്ത്രി പിണറായി വിജയന്‍ കഴിഞ്ഞ ദിവസം വിജിലന്‍സ് അന്വേഷണത്തിന് ഉത്തരവിട്ടിരുന്നു.
മേപ്പാടി പഞ്ചായത്തിലെ ചൂരൽമല ഉരുൾപൊട്ടൽ ദുരന്തബാധിതർക്ക് ലഭിച്ച ഭക്ഷ്യവസ്തുക്കൾ പുഴുവരിച്ച നിലയിൽ കണ്ടെത്തിയ വാർത്തയുടെ പശ്ചാത്തലത്തിലാണ് അന്വേഷണം. പഞ്ചായത്ത് വിതരണം ചെയ്തത് പഴയ സ്റ്റോക്ക് ആണോ ലഭ്യമായ ഭക്ഷ്യധാന്യങ്ങൾ ഏതെങ്കിലും തരത്തിൽ മാറ്റിയോ എന്നിങ്ങനെയുള്ള കാര്യങ്ങളും
അന്വേഷണ വിധേയമാക്കും. ഇത് സംബന്ധിച്ച് പ്രാഥമിക അന്വേഷണം നടത്തി അടിയന്തരമായി റിപ്പോർട്ട് സമർപ്പിക്കാൻ മുഖ്യമന്ത്രി നിർദേശിച്ചു.