'ദുരന്തബാധിതരെ വാടക വീടുകളിലേക്ക് മാറ്റണം ; വാടക സർക്കാർ നൽകണം' ; വിഡി സതീശൻ
കല്പ്പറ്റ: ദുരന്തബാധിതരെ പുനരധിവസിപ്പിക്കാന് സര്ക്കാര് സ്ഥലം കണ്ടെത്തണമെന്ന് പ്രതിപക്ഷ നേതാവ് വിഡി സതീശന്. പുനരധിവസിപ്പിക്കുന്നതുവരെ ഇവരെ വാടക വീട്ടിൽ താമസിപ്പിക്കണമെന്നും അതിനുള്ള സൗകര്യങ്ങൾ സർക്കാർ ഏർപ്പെടുത്തണമെന്നും പ്രതിപക്ഷ നേതാവ് പറഞ്ഞു. മേപ്പാടിയിൽ മാധ്യമപ്രവർത്തകരോട് സംസാരിക്കുകയായിരുന്നു അദ്ദേഹം.
'വയനാട് ദുരന്തത്തില് മരണസംഖ്യ ഉയര്ന്നുകൊണ്ടിരിക്കുകയാണ്. ചാലിയാറിലൂടെ ശരീര അവശിഷ്ടങ്ങള് ഉള്പ്പെടെ ഒഴുകുകയാണ്. മണ്ണിനടയില്പ്പെട്ടവരെയും ഒറ്റപ്പെട്ടു പോയവരെയും കണ്ടെത്താന് രക്ഷാപ്രവര്ത്തകര് ശ്രമിച്ചുകൊണ്ടിരിക്കുകയാണ്. ക്യാമ്പുകളില് പുറത്തു നിന്നെത്തുന്ന ഡോക്ടര്മാരുടെ സേവനം ഉറപ്പാക്കാനും നിര്ദ്ദേശം നല്കിയിട്ടുണ്ട്. ക്യാമ്പുകളില് ഭക്ഷണവും മരുന്നുകളും ഉള്പ്പെടെ ഏത് സാധത്തിന് കുറവുണ്ടെങ്കിലും പരിഹരിക്കാന് പുറത്തു നിന്നുള്ള സംവിധാനം ഒരുക്കിയിട്ടുണ്ട്. സര്ക്കാര് ഒരുക്കിയിരിക്കുന്ന സംവിധാനത്തിന് പുറമെയാണിത്. ക്യാമ്പുകളിലേക്ക് സാധനങ്ങള് എത്തിക്കാന് യു ഡി എഫ് പ്രവര്ത്തകര് തയാറാണെന്ന് എം എൽ എയ്ക്ക് ഉറപ്പ് നല്കിയിട്ടുണ്ട്.
കൂടുതല് മൃതദേഹങ്ങള് എത്തുമ്പോള് ഫ്രീസറുകളുടെ കുറവുണ്ടായാല് അതിന് പകരമായി ഫ്രീസറുകളുള്ള കണ്ടെയ്നുകള് പുറത്ത് നിന്നും എത്തിച്ചു നല്കാമെന്ന് ആരോഗ്യ വകുപ്പ് അധികൃതരെ അറിയിച്ചിട്ടുണ്ട്. എന്ത് ആവശ്യം ഉണ്ടെങ്കിലും പരിഹരിക്കും. ക്യാമ്പുകളില് കഴിയുന്നവര്ക്ക് പെട്ടന്ന് വീട്ടിലേക്ക് പോകാനോ ദുരന്തമേഖലയില് വീണ്ടും വീട് പണിയാനോ സാധിക്കില്ല. മറ്റൊരു സ്ഥലം കണ്ടെത്തി വീട് നിര്മ്മിക്കുന്നത് വരെ അവര്ക്ക് വാടക വീടുകള് കണ്ടെത്തി വാടക നല്കുന്നതിന് സംവിധാനം ഒരുക്കും. ഇതിന്റെ ഭാഗമായി വീടുകളിലേക്ക് മടങ്ങാന് സാധിക്കാത്തവരുടെ പട്ടിക എം എല് എയുടെയും പഞ്ചായത്ത് പ്രസിഡന്റിന്റെയും നേതൃത്വത്തില് യോഗം ചേര്ന്ന് തയാറാക്കും. മുഖ്യമന്ത്രി വിളിച്ചിരിക്കുന്ന സര്വകക്ഷിയോഗത്തിനും പ്രതിപക്ഷം എല്ലാ സഹകരണവും നല്കും', വി ഡി സതീശൻ വ്യക്തമാക്കി.
അതേസമയം മുണ്ടക്കൈയിലും ചൂരൽമലയിലും ചൊവ്വാഴ്ച പുലർച്ചെ ഉണ്ടായ ഉരുൾപൊട്ടലിൽ 126 മരണങ്ങൾ ഔദ്യോഗികമായി സ്ഥിരീകരിച്ചു. ഇതിൽ 75 പേരെ തിരിച്ചറിഞ്ഞു. 70 പേർ പുരുഷൻമാരും 56 പേർ സ്ത്രീകളുമാണ്. 123 മൃത ദേഹങ്ങൾ പോസ്റ്റുമോർട്ടം ചെയ്തു. 63 മൃതദേഹങ്ങൾ ബന്ധുക്കൾക്ക് വിട്ടു നൽകി.106 പേർ ക്യാമ്പുകളിൽ കഴിയുന്നു. 195 പേരെയാണ് ദുരന്ത പ്രദേശത്തുനിന്ന് ആശുപത്രികളിൽ എത്തിച്ചത്. ഇതിൽ 90 പേർ വിവിധ ആശുപത്രികളിൽ ചികിത്സയിൽ തുടരുന്നു. വയനാട്ടിൽ 85 പേരും മലപ്പുറത്ത് 5 പേരുമാണ് ചികിത്സയിലുള്ളത്.
Click it and Unblock the Notifications
Sign in with Google