ഡല്ഹിയിലെ വായുമലിനീകരണത്തിന്റെ കാരണം ഗള്ഫില് നിന്നുള്ള പൊടിക്കാറ്റ്; ടിപി സെന്കുമാര്
ഡല്ഹിയിലെ വായുമലിനീകരണത്തെ കുറിച്ചും അതിനുള്ള കാരണങ്ങള് വിശദീകരിച്ചും മുന് ഡിജിപി ടിപി സെന്കുമാര് എഴുതിയ കുറിപ്പ് വിവാദത്തില്. ഡല്ഹിയിലെ വായുമലിനീകരണത്തിന് ഒരു കാരണം ഗള്ഫില് നിന്നുള്ള പൊടിക്കാറ്റ് ആണ് എന്ന് അദ്ദേഹം പറയുന്നു. സൗദി അറേബ്യ, കുവൈത്ത്, ഇറാഖ് എന്നിവിടങ്ങളില് നിന്നുള്ള പൊടിക്കാറ്റ് അന്തരീക്ഷത്തിലൂടെ ഇന്ത്യയില് എത്തുന്നുണ്ടത്രെ.
ട്രംപിന്റെ താരിഫ് ഭീഷണിയേക്കാള് വലുതാണ് വായുമലിനീകരണം. ട്രംപിന്റെ താരിഫ് കൊണ്ട് ഇന്ത്യന് ജിഡിപിയുടെ ഒരു ശതമാനത്തെയാണ് ബാധിക്കുന്നത്. എന്നാല് വായു മലിനീകരണം കൊണ്ട് എട്ട് ശതമാനം ജിഡിപിയെ ബാധിക്കുന്നു എന്ന് സെന്കുമാര് കുറിക്കുന്നു. ഏകദേശം രണ്ട് ദശലക്ഷം ആളുകള് ഇതുമൂലം മരിക്കുന്നുണ്ടെന്നും സെന്കുമാര് പറഞ്ഞു.
ടിപി സെന്കുമാറിന്റെ കുറിപ്പ് വായിക്കാം: ''മലിനീകരണം. പ്രത്യേകിച്ച് വായു മലിനീകരണംഇന്ത്യയുടെ ജിഡിപിയുടെ 9 ശതമാനം വരെ ബാധിക്കുന്നു എന്നാണ് കണക്ക്. ശ്രദ്ധിക്കുക. ട്രംപിന്റെ രണ്ടാം വരവിലുള്ള താരിഫ് കൊണ്ട് ഇന്ത്യയുടെ ജിഡിപിയുടെ 1 ശതമാനത്തെയാണ് ബാധിക്കുന്നത്. അതായത് അതിനേക്കാള് 8 ശതമാനം കൂടുതല് ജിഡിപിയെ ബാധിക്കുന്ന ഒന്നാണ് വായു മലിനീകരണം.അത് ഡല്ഹിയില് മാത്രമല്ല നോര്ത്ത് ഇന്ത്യയില് ശൈത്യകാലത്തു പ്രത്യേകിച്ചും വരുന്ന മലിനീകരണം.
ഏകദേശം 2 ദശലക്ഷം ആളുകള് ഇതുമൂലം മരിക്കുന്നുണ്ട്. ഇതുമൂലം 130 കോടി മനുഷ്യ പ്രയത്ന ദിനങ്ങളാണ് നഷ്ടപ്പെടുന്നത്. വാസ്തവത്തില് അടിയന്തിരമായി നമ്മള് ശ്രദ്ധ കേന്ദ്രീകരിക്കേണ്ട വിഷയമാണ് മലിനീകരണം എങ്ങനെ നിയന്ത്രിക്കാം എന്നുള്ളത്. വായു മലിനീകരണം ഡല്ഹിയില് മാത്രമല്ല ഉത്തരേന്ത്യയില് പൊതുവെ ഉണ്ട് , നമുക്കറിയാം ലക്നൗവില് ഒരു ക്രിക്കറ്റ് മാച്ച് വച്ചിട്ട് അവിടെ ഉണ്ടായിരുന്ന മൂടല്മഞ്ഞു മൂലം അവിടെ മത്സരം മാറ്റിവെക്കേണ്ടി വന്നു. അപൂര്വമായി ഇത്തരം സാഹചര്യങ്ങള് മുംബൈയിലോക്കെ കാണാറുണ്ട്.
ഡല്ഹിയിലൊക്കെ ഇത്രയും മലിനീകരനം ഉണ്ടാവുന്നതിന്റെ പ്രധാന കാരണം ഹരിയാനയിലും പഞ്ചാബിലുമൊക്കെ കത്തിക്കുന്ന വൈക്കോല് തീവെപ്പ് ആണ്. പിന്നെ ഡല്ഹിയിലും മറ്റു സമീപ സംസ്ഥാനങ്ങളിലും ഓടുന്ന വാഹനങ്ങളുടെ പുക , നിര്മ്മാണ പ്രവര്ത്തനങ്ങള് മൂലമുണ്ടാകുന്ന പൊടി , അവിടെയുള്ള വ്യവസായ സ്ഥാപനങ്ങളില് ഉണ്ടാകുന്ന പുകയും ഇതെല്ലാം കാരണമാണ്.
ഇനിയുള്ളത് കാലാവസ്ഥ വ്യതിയാനം. അതുകൊണ്ട് എന്ത് സംഭവിക്കുന്നു എന്ന് വച്ചാല് തഴെ തട്ടില് കിടക്കുന്ന പൊടിപടലങ്ങള് ശൈത്യകാലത്ത് എങ്ങും പോകാനാകാതെ അവിടെത്തന്നെ കൂടിക്കിടക്കുന്നു. അത് കാറ്റോ മഴയോ മറ്റോ ഉണ്ടെങ്കില് സ്ഥാനമാറ്റം വരികയോ മണ്ണില് ലയിച്ചു പോകുകയോ ചെയ്യും. അതാണ് വേനല്ക്കാലത്തു സംഭവിക്കുന്നത്. അത് ശൈത്യകാലത്തു സംഭവിക്കില്ല.
നമുക്ക് അത്ഭുതം തോന്നാം. കേള്ക്കുമ്പോള് അത്ഭുതം തോന്നാം , കാരണം ചിലപ്പോള് 40 ശതമാനം ഡല്ഹിയിലെ മലിനീകരണത്തിന്റെ കാരണം ഗള്ഫില് നിന്നുള്ള പൊടിക്കാറ്റ് ആണെന്. ഇറാക്ക് , കുവൈറ്റ് , സൗദി അറേബ്യ എന്നീ മേഖലകളില് നിന്നുമുണ്ടാകുന്ന വലിയ പൊടിക്കാറ്റുകള് അന്തരീക്ഷത്തില് ഉയരത്തില് സഞ്ചരിച്ചു വടക്കേ ഇന്ത്യയില് എത്തുന്നു. ഡല്ഹിയിലും ഉത്തരേന്ത്യയിലും ഈ ശൈത്യകാലത്തു പൊടിപടലങ്ങള് നീങ്ങിപ്പോകാതെ അവിടെത്തന്നെ കെട്ടിക്കിടക്കുകയാണ്.
ഉത്തരേന്ത്യയില് ഹിമാലയം ഉണ്ട് , അതുകൊണ്ടു ഉത്തരേന്ത്യയിലും വടക്ക് കിഴക്കന് മേഖലയിലും ശൈത്യകാലത്തു വായുവിന്റെ സഞ്ചാരം കുറവാണ്. അതുകൊണ്ട് ഇതൊരു വലിയ പ്രശ്നമാണ്. അടിയന്തരമായി നമ്മുടെ രാജ്യം പരിഹരിക്കേണ്ട ഒരു കാര്യമാണിത്. ഡല്ഹിയിലൊക്കെ ഇനി മത്സരങ്ങള് സംഘടിപ്പിച്ചാല് അത് നടത്താന് പറ്റില്ല , കാരണം മറ്റ് രാജ്യങ്ങള് അത് ബഹിഷ്കരിക്കും. കാരണം ഇത്രയും വായു മലിനീകരണം ഉള്ള ഒരു നഗരത്തില് മത്സരങ്ങള് വച്ചാല് ഒരു ദിവസം കൊണ്ട് തന്നെ അവരുടെ ശ്വാസകോശം പണിമുടക്കും !
അതുകൊണ്ട് ഈ പ്രശ്നം പരിഹരിക്കാന് അടിയന്തിര ശ്രദ്ധ ആവശ്യമാണ്. അത് കൃത്രിമ മഴ പെയ്യിക്കുക, വൃക്ഷങ്ങള് നടുകയും പിന്നെ ശാസ്ത്രീയമായ പഠനവും സാറ്റലൈറ്റ് മോണിറ്ററിങ്ങും ആവശ്യമാണ്. വായു മലിനീകരണം അടിയന്തിരമായി പരിഹരിച്ചില്ലെങ്കില് വലിയ ബുദ്ധിമുട്ട് ഉണ്ടാവും. നമ്മുടെ രാജ്യ തലസ്ഥാനത്തേക്ക് ആളുകള് പോകാന് മടിക്കും. അവിടെയുള്ള ആളുകള്ക്ക് ആരോഗ്യ പ്രശ്നങ്ങള് ഉണ്ടാകും , മരണ സംഖ്യ വര്ദ്ധിക്കും, കുട്ടികളുടെ ആരോഗ്യത്തെ ബാധിക്കും. അങ്ങനെ കുറേയധികം കാര്യങ്ങളുണ്ട്. അതുകൊണ്ട് ഈ വിഷയത്തിന് അടിയന്തിര ശ്രദ്ധ ആവശ്യമുണ്ട്, സര്ക്കാര് ഈ വിഷയം ഗൗരവമായി എടുക്കണം എന്നാണ് എന്റെ അപേക്ഷ.''
Click it and Unblock the Notifications
Sign in with Google