ഇഎസ് ബിജിമോള് എഡിഎമ്മിനെ തല്ലിയോ? വീഡിയോ കാണാം...
പെരുവന്താനം: ഇടുക്കി അഡീഷണല് ജില്ലാ മജിസ്ട്രേറ്റിനെ പീരുപമേട് എംഎല്എ ഇഎസ് ബിജിമോള് കൈയ്യേറ്റം ചെയ്യാന് ശ്രമിച്ചു. പെരുവന്താനം ടിആര് ആന്റ് ടി കമ്പനിയുടെ ഗേറ്റ് പുനസ്ഥാപിയ്ക്കാന് എത്തിയ എഡിഎം മോന്സ് പി അലക്സാണ്ടറെ ആണ് ബിജിമോള് കൈയേറ്റം ചെയ്യാന് ശ്രമിച്ചത്.
എന്നാല് താന് ആരേയും കൈയേറ്റം ചെയ്തിട്ടില്ലെന്നും എഡിഎമ്മിനെ ജനരോഷത്തില് നിന്ന് രക്ഷിയ്ക്കുകയാണ് ചെയ്തത് എന്നുമാണ് ബിജിമോള് പ്രതികരിച്ചത്. എന്തായാലും ബിജിമോള്ക്കെതിരെ പോലീസ് കേസെടുത്തിട്ടുണ്ട്.
തെക്കേമല-വള്ളിയങ്കാവ് റോഡില് ടിആര് ആന്റ് ടി കമ്പനി ഗേറ്റ് സ്ഥാപിച്ചിരുന്നു. മനുഷ്യാവകാശ കമ്മീഷന്റെ ഉത്തരവ് പ്രകാരം ഈ ഗേറ്റ് നീക്കം ചെയ്തിരുന്നു. എന്നാല് പിന്നീട് ഹൈക്കോടതി കമ്പനിയ്ക്ക് അനുകൂലമായി വിധി പ്രസ്താവിച്ചു. ഈ ഉത്തരവ് നടപ്പിലാക്കാനാണ് എഡിഎം എത്തിയത്.
എന്നാല് ഇതിനെതിരെ ശക്തമായ ജനരോഷമാണ് പ്രദേശത്ത് അരങ്ങേറിയത്. ഗേറ്റ് പുനസ്ഥാപിയ്ക്കാനുള്ള തീരുമാനത്തെ ജനങ്ങള് എതിര്ത്തു. ബിജിമോളുടെ നേതൃത്വത്തിലായിരുന്നു പ്രതിഷേധം. ഇതിനിടെയാണ് റവന്യൂ ഉദ്യോഗസ്ഥരുമായി ഉന്തും തള്ളും ഉണ്ടായത്. കമ്പനി അധികൃതര്ക്ക് വേണ്ടി ജനങ്ങളെ പ്രകോപിപ്പിയ്ക്കുന്ന തരത്തിലാണ് എഡിഎം പെരുമാറിയതെന്നും ബിജിമോള് ാരോപിച്ചു.