ഇടി മുഹമ്മദ് ബഷീര്‍ വര്‍ഗീയവാദി: ആര്യാടന്‍

തിരുവനന്തപുരം: സംസ്ഥാനത്തെ കോണ്‍ഗ്രസ് - മുസ്ലിം ലീഗ് പോര് മുറുകുന്നു. ലീഗ് ജനറല്‍ സെക്രട്ടറി ഇ ടി മുഹമ്മദ് ബഷീര്‍ ഒന്നാം നമ്പര്‍ വര്‍ഗീയവാദിയാണെന്ന ആരോപണവുമായി മുതിര്‍ന്ന കോണ്‍ഗ്രസ് നേതാവ് ആര്യാടന്‍ മുഹമ്മദാണ് രംഗത്തെത്തിയത്. ലോക്‌സഭാ തിരഞ്ഞെടുപ്പിന്റെ സീറ്റ് തര്‍ക്കവുമായി ബന്ധപ്പെട്ട് തുടങ്ങിയ പോര് ഉടനെയെങ്ങും തീരാനിടയില്ല എന്ന സൂചനയാണ് ആര്യാടന്റെ പ്രസ്താവന നല്‍കുന്നത്.

പൊന്നാനിയില്‍ തിരഞ്ഞെടുപ്പ് പ്രചാരണത്തിന് കോണ്‍ഗ്രസിന്റെ സഹായം വേണോയെന്ന് ലീഗിന് തീരുമാനിക്കാം എന്നും ആര്യാടന്‍ പറഞ്ഞു. കുറ്റിപ്പുറത്തും മങ്കടയിലും മഞ്ചേരിയിലും തോറ്റത് ലീഗ് മറക്കരുത്. കൂടുതല്‍ സീറ്റ് കിട്ടാന്‍ വേണ്ടി ബഹളം വെച്ചിട്ട് കാര്യമില്ല.

കണ്ണൂരിലും വടകരയിലും ജയിച്ചത് കോണ്‍ഗ്രസാണെങ്കിലും പാറിയത് ലീഗിന്റെ കൊടിയാണ് എന്ന കുഞ്ഞാലിക്കുട്ടിയുടെ പ്രസ്താവനയാണ് ഇപ്പോഴത്തെ വിവാദത്തിന് തുടക്കം കുറിച്ചത്. തൊട്ടുപിന്നാലെ മുസ്ലീം ലീഗാണ് കോണ്‍ഗ്രസിന്റെ വിജയം തീരുമാനിക്കുന്നത് എന്നും അവകാശപ്പെട്ടു. എന്നാല്‍ കോണ്‍ഗ്രസിന്റെ സഹായമില്ലാതെ മത്സരിച്ചപ്പോള്‍ നിലമ്പൂരില്‍ ലീഗ് മൂന്നാം സ്ഥാനത്തായിപ്പോയത് ഓര്‍മയില്ലേ എന്നായിരുന്നു ആര്യാടന്‍ ഇതിനെ കളിയാക്കി ചോദിച്ചത്.

മുസ്ലിം ലീഗിനെ വിമര്‍ശിച്ച് കോണ്‍ഗ്രസിലെ കെ മുരളീധരനും കഴിഞ്ഞ ദിവസം രംഗത്തുവന്നിരുന്നു. മുന്നണി വേണമെന്നില്ലെങ്കില്‍ ലീഗിന് വേറെ വഴി നോക്കാം എന്നായിരുന്നു ലീഗിനോട് മുരളി പറഞ്ഞത്. ലീഗിന്റെ കൊടി പറക്കുന്നതില്‍ അസഹിഷ്ണുത തോന്നുന്നവര്‍ക്ക് വേറെ വഴി നോക്കാമെന്ന് പറഞ്ഞാണ് ലീഗ് നേതാവ് പി കെ കുഞ്ഞാലിക്കുട്ടി ഇതിനെ നേരിട്ടത്.

English summary

Congress leader Aryadan Muhammed alleges Muslim League General Secretary E T Muhammed Basheer is number one communal