സുരാജ് ഗുണ്ടകളെ വിട്ട് തല്ലിയെന്ന് മുന് മാനേജര്
കൊച്ചി: നടന് സുരാജ് വെഞ്ഞാറമൂടിനെതിരെ മുന് മാനേജരുടെ പരാതി. വഞ്ചന, കള്ളപ്രമാണം ഉണ്ടാക്കല്, ഭീഷണിപ്പെടുത്തല് എന്നിങ്ങനെ ഒട്ടേറെ ആരോപണങ്ങളാണ് സുരാജിന്റെ മുന് മാനേജരും തിരുവനന്തപുരം സ്വദേശിയുമായ രാജേഷ് കുമാര് നല്കിയിരിയ്ക്കുന്നത്. ഹില് പാലസ് പൊലീസ് സ്റ്റേിനിലാണ് പരാതി നല്കിയിരിയ്ക്കുന്നത്.
സുരാജില് നിന്നും മൂന്ന് ലക്ഷം രൂപ കടം വാങ്ങിയിരുന്നെന്നും പണത്തിന് ഈടായി തൃപ്പുണ്ണിത്തുറയിലുള്ള തന്റെ വസ്തുവിന്റെ ആദാരം സുരാജിന് കൈമാറിയെന്നും പരാതിയില് പറയുന്നു. എന്നാല് സുരാജ് ആധാരം തിരിച്ച് നല്കിയില്ലെന്നും സുഹൃത്തുക്കളുടെ സഹായത്തോടെ മറിച്ച് വിറ്റുവെന്നും ഇതിനായി വ്യജ രേഖകള് ഉണ്ടാക്കിയെന്നും പറയുന്നു. തലതവണ ഗുണ്ടകളെവിട്ട് സുരാജ് തന്നെ ഭീഷണിപ്പെടുത്തിയെന്നും രാജേഷ് ആരോപിയ്ക്കുന്നു.
എന്നാല് മുന് മാനേജരുടെ ആരോപണങ്ങള് സുരാജ് നിഷേധിച്ചു. തന്റെ കൈയ്യില് നിന്നും മൂന്ന് ലക്ഷം രൂപ മുന് മാനേജര് വാങ്ങിയെന്നും പണം തിരികെ നല്കിയിട്ടില്ലെന്നും സുരാജ് പറയുന്നു. ഇയാളെ മാനേജരായി നിയമിച്ചതാണ് താന് ചെയ്ത തെറ്റെന്നും സുരാജ് പറഞ്ഞു. ക്രിമിനല് കേസുകളില് പ്രതിയാണെന്ന് മനസിലാക്കിയതിനെത്തുടര്ന്ന് രാജേഷ് കുമാറിനെ മാനേജര് സ്ഥാനത്ത് നിന്ന് പിരിച്ച് വിടുകയായിരുന്നു. നാല് വര്ഷത്തോളം സുരാജിന്റെ മാനേജരായിരുന്നു രാജേഷ്. രാജേഷിനെതിരെ സുരാജ് മാനനഷ്ടകേസ് ഫയല് ചെയ്തു.